ފްރާންސުން ހަނގުރާމަމަތީ ބޯޓާއި އެންމެ ވަރުގަދަ އެއާކްރާފްޓް ކެރިއާ މެޑިޓެރޭނިއަނަށް ފޮނުވަނީ

ފްރާންސްގެ ރަފޭލް މަރުކާގެ ހަނގުރާމަމަތީ ބޯޓުތަކާއި، ވައިގެ ސަރަހައްދު ދިފާއުކުރާ ނިޒާމުތަކުގެ އިތުރުން، މިސައިލާއި ޑްރޯން ހަމަލާތައް ހުއްޓުވުމަށް ބޭނުންކުރާ އެއާ ރޭޑާ ސިސްޓަމްތައް ހަރަކާތްތެރިވަމުންދާ ކަމަށް ރައީސް އެމަނުއެލް މެކްރޮން ވިދާޅުވެއްޖެއެވެ.

މީގެ އިތުރުން، ފްރާންސްގެ ކަނޑުގެ ސިފައިންގެ އެންމެ ވަރުގަދަ މަނަވަރު ކަމަށްވާ، އެއާކްރާފްޓް ކެރިއާ "ޗާލްސް ޑި ގޯލް" މެޑިޓެރޭނިއަން ކަނޑަށް ފޮނުވަމުންދާކަން ވެސް ރައީސް މެކްރޮން ވަނީ ކަށަވަރުކޮށްދެއްވާފައެވެ.

މެކްރޮން އިތުރަށް ފާހަގަކުރެއްވި ގޮތުގައި، ގަތަރާއި، ކުވެއިތާއި، ޔުނައިޓެޑް އެރަބް އެމިރޭޓްސް (ޔޫއޭއީ) އާއި، އުރުދުންގެ އިތުރުން އިރާގާއެކު ފްރާންސުން ދިފާއީ އެއްބަސްވުންތަކެއް ގާއިމުކޮށްފައިވެއެވެ. އަދި އެ ގައުމުތަކާއެކު ފްރާންސް ސާބިތުކަމާއެކު އޮންނާނެކަން އޭނާ ހާމަކުރެއްވިއެވެ.

ލުބުނާނުގައި ހިޒްބުﷲ އާއި އިޒްރޭލާ ދެމެދު އަލުން ހަނގުރާމަ ފެށިފައިވާ ދަނޑިވަޅެއްގައި، އެ ސަރަހައްދުގެ ހާލަތާ ގުޅޭގޮތުން ވެސް މެކްރޮން ވާހަކަދެއްކެވިއެވެ. މިގޮތުން، ހިޒްބުﷲ އިން އިޒްރޭލަށް ދިން ހަމަލާއަކީ ހެދި "ބޮޑު ގޯހެއް" ކަމަށް ވިދާޅުވެ އެކަން ކުށްވެރިކުރެއްވުމުގެ އިތުރުން، އިޒްރޭލުން  ލުބުނާނަށް އެއްގަމު މަގުން އަރައިގަނެފާނެތީ އެކަމުގެ އިންޒާރު ވެސް މެކްރޮން ވަނީ ދެއްވާފައެވެ.