ވެންޓިލޭޓަރުގައި ފަރުވާ ދިން ވެމްކޯގެ މުވައްޒަފު ވޯޑަށް ބަދަލު ކޮށްފި

ވެމްކޯގެ ކުނި ހުސްކުރާ ރޭމްޕް މަތިން ވެއްޓި ލިބުނު އަނިޔާތަކާ ގުޅިގެން ވެންޓިލޭޓަރުގައި ފަރުވާ ދިން ވެމްކޯގެ މުވައްޒަފު ވޯޑަށް ބަދަލު ކޮށްފި އެވެ.

22 ފެބްރުއަރީ 2026 ވަނަ ދުވަހުގެ ރޭ ދަންވަރު 3:00 ހާއިރު، ވެމްކޯގެ ކުނި ހުސްކުރާ ރޭމްޕް މަތިން ވެއްޓުނީ ހަސަން ނަޒީރު ނަމަކަށް ކިޔާ ދިވެއްސެކެވެ. އޭނާ ބޮޑެތި އަނިޔާތަކެއް ލިބި ފުރަތަމަ ފަރުވާ ދީފައިވަނީ ވެންޓިލޭޓަރުގަ އެވެ. އާއިލާއިން މައުލޫމާތު ދިން ގޮތުގައި،  އޭނާ ގެ މޭކަށިގަނޑުގެ ތިން ތަނަކުން ބިންދައިގެން ގޮސް، އަމިއްލައަށް ނޭވާލުމަށް ނުކެޅިދިފައިވެ އެވެ.

މިހާދިސާ ހިނގުމުން ވެމްކޯއިން މިމައްސަލަ ފުރަތަމަ ސިއްރު ކުރި އެވެ. މީޑީއާތަކަށް މިމައްސަލަ ހާމަވެގެން ދިޔައީ، ވެެމްކޯގެ ބޮޑެތި އިހުމާލުތަކެއް ހުރި ކަމަށާއި، ނަޒީރަށް އެއްވެސް ގޮތަކަށް އަޅާނުލާ ކަަމަށް ބުނެ، އާއިލާއިން މި މައްސަލަ ހާމަ ކުރުމާ ގުޅިގެންނެވެ.

އޭނާ ގެ އެންމެފަހުގެ ހާލަތާ ގުޅޭގޮތުން ރާއްޖެއެމްވީން އައިޖީއެމްއެޗްގެ މީޑިއާ އޮފިޝަލްއާ ސުވާލު ކުރުމުން ވިދާޅުވީ، ވެންޓިލޭޓަރުގައި ފަރުވާ ދިނުމަށްފަހު، މިހާރު ވޯޑަށް ބަދަލު ކޮށްފައިވާ ކަމަށެވެ.

މައުލޫމާތު ލިބިފައިވާ ގޮތުގައި، ނަޒީރުގެ ހާލަތު އަންނަނީ ރަނގަޅުވަމުންނެވެ. 

ވެމްކޯގެ މުވައްޒަފުންނަށް ކުންފުނިން އިހުމާލުވަމުން އަންނަ ކަމުގެ އެތައް އަޑުތަކެއް ފެތުރިފައިވާ އިރު، އެކުންފުނީގެ ހެލްތު އިޝިއުރަންސް 2022 ވަނަ އަހަރު ކަނޑާލާފައިވާ ކަމަށް ވެމްކޯގައި މަސައްކަތް ކުރާ މުވައްޒަފުން ބުނެ އެވެ.

މީގެ އިތުރުން ވެމްކޯގެ މަސައްކަތުގެ މާހައުލުގައި މުވައްޒަފުންނަށް ތަކުރާރުކޮށް އަނިޔާލިބި، ފުރާނައަށް ގެއްލުންވާ ފަދަ ނުރައްކާތެރި ހާދިސާތަކެއް ހިނގަމުންދާތީ، އެ ކުންފުނީގެ މަސައްކަތްތެރިންގެ ސަލާމަތާއި ރައްކާތެރިކަމާ ގުޅޭ މައްސަލައެއް ތަހުގީގު ކުރަމުންދާ ކަމަށް ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އިން ބުނެފައިވެ އެވެ.