ވެމްކޯގެ މުވައްޒަފުންނަށް އަދިވެސް ރޯދަ އިނާއަތް ނުދޭ، ގިނަ މުވައްޒަފުން ދަނީ ކަންބޮޑުވުންފާޅު ކުރަމުން
ވެމްކޯގެ ބައެއް މުވައްޒަފުންނަށް ރޯދަ އިނާޔަތާއި މުސާރަ ދިނުން ލަސްވަމުންދާ މައްސަލަ ބޮޑު ވެފައިވާއިރު، މުވައްޒަފުންގެ އަތުން އުނިކުރާ ޕެންޝަން ފައިސާ ޖަމާނުކުރާތާ އަހަރަކަށްވުރެ ގިނަ ދުވަސް ވަނީ ވެފައި. ކުންފުނީގެ މާލީ ހާލަތު ގޯސްވެ ބަގުރޫޓުވުމުގެ ބިރު އޮތްއިރު، ސިޔާސީ ބޭނުމަށް ގިނަ އަދަދެއްގެ ބަޔަކަށް ވަޒީފާދީ ބޮޑު މުސާރަ ދެމުންދާ ކަމުގެ ޝަކުވާ ވެސް ވަނީ ފެންމަތިވެފައި.
ވެމްކޯ ގެ މެނޭޖިންގ ޑިރެކްޓަރު މުޖުތަބާ ޖަލީލް، ގާނޫނުގައިވާ ގޮތުން ރޯދަ މަސް ފެށުމުގެ ކުރީން ކޮންމެ މުވައްޒަފަކަށް ވެސް 3000 ރުފިޔާގެ އިނާއަތެއް ދޭން ޖެހޭ. | ރާއްޖެ އެމްވީ
ވޭސްޓް މެނޭޖްމެންޓް ކޯޕަރޭޝަން (ވެމްކޯ)ގެ ބައެއް މުވައްޒަފުންނަށް ރޯދަ އިނާޔަތް ނުދޭ ކަމަށް އެ ކުންފުނީގެ ބައެއް މުވައްޒަފުން ބުނެފި އެވެ.
ރާއްޖެއެމްވީއަށް މައުލޫމާތު ދިން އެކުންފުނީގައި މަސައްކަތް ކުރާ މުވައްޒަފެއް ބުނީ، ރޯދަ އިނާއަތުގައި ލިބެން ޖެހޭ 3000 ރުފިޔާ އަދިވެސް ނުލިބޭ ކަމަށާއި، އެކަމުގެ ޝަކުވާ ވަރަށް ބޮޑުވެފައިވާ ކަމަށެވެ. އަދި ލިބޭނެ އިރެއް ވެސް އެޗްއާރުން އަންގާފައިނުވާއިރު، ލިބޭނެ ކަމަށް އަބަދުވެސް ބުނަމުންދާ ކަމަށް އޭނާ ބުންޏެވެ.
މީގެ އިތުރުން އެމުވައްޒަފު ބުނީ މިމަހުގެ 17 ވީ އަންގާރަ ދުވަހުގެ ރޭ ބައެއް މުވައްޒަފުންނަށް ރޯދަ އިނާއަތް ޖަމާކޮށްފައިވާ ކަމަށެވެ.
ވެމްކޯގެ ބައެއް މުވައްޒަފުންނަށް ރޯދަ އިނާޔަތް ނުދޭ ކަމަށް ކަމަށް އެ ކުންފުނީގެ ބައެއް މުވައްޒަފުން ބުނެފައިވާއިރު، މުސާރަ ލަހުން ދޭ މައްސަލަ ވަނީ ފެންމަތިވެފަ އެވެ. ޖެނުއަރީ މަހުގެ މުސާރަ މުވައްޒަފުންނަށް ދީފައިވަނީ ފެބްރުއަރީ މަހުގެ 5 ގެ ފަހުންނެވެ.
ނަން ނުޖެހުމަށް ޝަރުތުކޮށް ވެމްކޯގައި މަސައްކަތް ކުރާ ސީނިއަރ ބޭފުޅެއް ވިދާޅުވީ، ބިދޭސީ ބައެއް މުވައްޒަފުން އަދިވެސް މުސާރަ ނުދޭ ކަމަށާއި، މިދިޔަ މަހު ވެސް އެމުވައްޒަފުންނަށް މުސާރަ ދީފައިވަނީ 20 ގެ ފަހުން ކަމަށެވެ. އަދި އެވާހަކަ ނުދެއްކުމަށް އަންގައި ބައެއް ބިދޭސީ މުވައްޒަފުންނަށް ބިރު ދައްކާ ކަމަށް އޭނާ ތުހުމަތު ކުރެއްވި އެވެ.
ކުންފުނިތަކުން ވެމްކޯއަށް ދައްކަން ޖެހޭ ފައިސާ ނުދައްކާ ކަމަށް މެނޭޖްމަންޓުން ކުރާ ތުހުމަތުތަކަށް އިޝާރާތް ކުރައްވައި އޭނާ ވިދާޅުވީ ކޮންމެ ދުވަހަކު ވެސް ނަގުދު ފައިސާ ވަރަށް ގިނައިން ވަންނަ ކަމަށާއި، ކުންފުނިތަކުން ވެސް ބިލްތަކަށް ފައިސާ ދައްކާ ކަަމަށެވެ. އަދި ބައެއް ކުންފުނިތަކުން ފައިސާ ދެއްކުމަށް ބައެއް ފަހަރު ލަސްތަކެއް ކުރިމަތި ނަމަވެސް ބިލަށް ފައިސާ ދޭ ކަމަށް އޭނާ ވިދާޅުވި އެވެ.
އެބޭފުޅާ ވިދާޅުވީ މިއީ ދައްކާ އުޒުރެއް ކަމަށާއި، އެއީ އަސްލު މައްސަލަ ނޫން ކަމަށެވެ. މިހާރު ވެސް ކުންފުންޏަށް ގެއްލުންވާ ގޮތަށް ސިޔާސީ ގޮތުން އެތައް ބަޔަކަށް ވަޒީފާ ދީފައިވާ ކަމަށާއި، އެމީހުންނަކީ ފިންގަރ ޖެހުމަށްފަހު ގެއަށް ދާމީހުން ކަމަށް އޭނާ ވިދާޅުވި އެވެ. އަދި ވިދާޅުވީ ބައެއް މީހުން އޮފީސްތެރޭގައި ތާސް ކުޅުމާއި، ގޭމްފަދަ އެކި ކަހަލަ ކުޅިވަރު ކުޅުމުގައި ވަގުތު ހޭދަ ކޮށްލާ ކަަމަށެވެ.
ނަމަވެސް އެމީހުންގެ މުސާރަ ކުންފުނީގައި މަސައްކަތް ކުރާ މުވައްޒަފުންނަށް ވުރެ އެތައް ގުނައެއް ބޮޑު ކަމަށާއި، މުސަރާގެ މައްސަލައެއް ސިޔާސީ މުވައްޒަފުންނަށް ކުރިމަތިނުވާ ކަމަށެވެ. މަސް ފެށުމުގެ ކުރިން އެމީހުންނަށް މުސާރަ ވެސް ލިބޭ ކަމަށާއި، ރޯދަ އިނާއަތް ވެސް އަވަހަށް ލިބުނު ކަމަށް އޭނާ ވިދާޅުވި އެވެ.
ވެމްކޯގެ ހާލަތު ވަރަށް ގޯސްކަން ފާހަގަކުރައްވައި އެބޭފުޅާ ވިދާޅުވީ މިގޮތަށް މިކަން ހިނގާނަމަ މާގިނަ ދުވަހެއް ނުވެ، ޚިދުމަތްތަކަށް ބުރޫއަރައި، ކުންފުނި އެއްކޮށް ބަގުރޫޓުވާނެ ކަމަށެވެ. އަދިި މިހާރު ވެސް ހިންގަމުންދަނީ ގެއްލުމުގައި ކަމަށް އޭނާ ވިދާޅުވި އެވެ.
ވެމްކޯގެ ގިނަ މައްސަލަތައް ފެންމަތިވަމުންދާއިރު، މުވައްޒަފުންގެ މުސާރައިން ޕެންޝަން ފަންޑަށް ފައިސާ ކެނޑުމަށްފަހު އެފައިސާ ޖަމާނުކުރާތާ އަހަރަކަށް ވުރެ ވަނީ ގިނަ ދުވަސްވެފަ އެވެ.
މި މައްސަލަތަކާ ގުޅޭގޮތުން ވެމްކޯގެ ފަރާތުން ރަސްމީ ބަހެއް ވަނީ ލިބޭ ގޮތް ނުވެފަ އެވެ.
