މިހާރު ކުރިއަށްދާ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ވެޓަރަންސް ލީގުގައި ޒަލޮޓް އާއި ވިލިމާލެ ޔުނައިޓެޑު ބައްދަލު ކުރަން އޮތް މެޗު، ޒަލޮޓް އިން ދޫކޮށްލައިފި އެވެ.

ބުދަ ދުވަހުގެ ހަވީރު ކުޅެން ހަމަޖެހިފައި އޮތް މެޗަށް ޙާޟިރު ވެވެން ނެތް ކަމަށް ޒަލޮޓް އިން ވަނީ މުބާރާތް އިންތިޒާމު ކުރާ ފަރާތަށް އަންގައިފަ އެވެ. އެހެންވެ، އެ މެޗު ވަނީ ވިލިމާލެ އަށް ލިބިފަ އެވެ.

އެހެންކަމުން އެ މެޗުން ވިލިމާލެ މޮޅުވީ ކަމަށް ވަނީ ނިންމައިފަ އެވެ. އެއާ އެކު އެ ޓީމަށް ވަނީ އެ މެޗުން ތިން ޕޮއިންޓާއި، ދެ ލަނޑު ދިނުމަށް މުބާރާތުގެ ކޮމެޓީން ވަނީ ނިންމައިފަ އެވެ.

މީގެ ކުރިން މުބާރާތުގެ ގުރޫޕު ސްޓޭޖުގައި ޒަލޮޓް ކުޅުނު ތިން މެޗުން ވެސް އެ ޓީމު ވަނީ ބަލިވެފަ އެވެ. ވިލިމާލެ އިން ހަތަރު މެޗު ކުޅުނުއިރު، ދެ މެޗުން ވަނީ މޮޅުވެފަ އެވެ. އަދި އަނެއް ދެ މެޗު ވަނީ އެއްވަރުވެފަ އެވެ.

މިއާ އެކު ވިލިމާލެ އަށް ވަނީ މުބާރާތުގެ ސެމީ ފައިނަލްގެ ޖާގައެއް ކަށަވަރު ވެފަ އެވެ. ނަމަވެސް ގުރޫޕު ސްޓޭޖުގައި ހުއްރިއްޔާ ކުޅޭ ފަހުން މެޗުން މޮޅުވެ، އެއް ވަނައިގައި ސެމީ ފައިނަލްގެ ޖާގަ ހޯދުމުގެ ފުރުސަތު އެ ޓީމަށް އެބަ އޮތެވެ.

މިއަހަރުގެ ވެޓަރަންސް ލީގު ކުރިއަށް ދާނީ މި މަހުގެ 27 ވަނަ ދުވަހުގެ ނިޔަލަށެވެ. މިއަހަރުގެ މުބާރާތުގައި ޖުމުލަ 10 ޓީމަކުން ބައިވެރިވެ އެވެ.

މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕު އޭގައި އޮތީ ދިވެހި ސިފައިންގެ ކުލަބު، ވިލިމާލެ ޔުނައިޓެޑު، ހުޅުމާލޭ ވެޓަރަންސް ކުލަބު، ޒެލޮޓް އަދި ހުއްރިއްޔާ އެވެ. ގުރޫޕު ބީ ގައި ހިމެނެނީ ޕޮލިސް ކުލަބު، ސްޓެލްކޯ، ކުލަބު އީގަލްސް، މުއިވެޔޮ އަދި ދަ ގްރާންޑޭ އެވެ.