އެފްއޭއެމް ވެޓަރަންސް ކަޕް: މުއިވެޔޮ އިން ފުރަތަމަ މެޗު ކާމިޔާބު ކުރިއިރު، މިފަހަރު ވެސް ކެޕްޓަން އަކީ ނައިބު ރައީސް ޙުސެއިން

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ކުރިއަށް ގެންދާ، އެފްއޭއެމްގެ ވެޓަރަންސް ކަޕްގައި ދިވެހި ސިފައިންގެ ކުލަބާ ދެކޮޅަށް ކުޅުނު މެޗުން މުއިވެޔޮ ފްރެންޑްސް ކުލަބު މޮޅުވެއްޖެ އެވެ. 

ގުރޫޕް އޭގައި ހޮނިހިރު ދުވަހުގެ ހަވީރު މާފަންނު ޓާފް ދަނޑުގައި ކުޅުނު މެޗު މުއިވެޔޮ އިން ކާމިޔާބު ކުރީ 1-0 އިންނެވެ. މި ގުރޫޕުގައި މި ދެ ޓީމުގެ އިތުރުން ދެން އޮތީ ނިއު ރޭޑިއަންޓްސް ސްޕޯޓްސް ކުލަބާއި، ދަ ގްރާންޑެ އަދި ވިލިމާލެ ޔުނައިޓެޑެވެ. 

މެޗުގައި މުއިވެޔޮ އިން ލަނޑު ޖެހީ މެޗުގެ ދެ ވަނަ ހާފުގަ އެވެ. އެގޮތުން މެޗުގެ ދެ ވަނަ ހާފުގެ 52 ވަނަ މިނެޓުގައި މުއިވެޔޮ އަށް ލީޑު ނަގައިދިނީ މުޙައްމަދު ޝަހީމް އެވެ. މީގެ އިތުރުން ވެސް މެޗުގައި ލަނޑު ޖަހަަން މުއިވެޔޮ އިން ވަނީ ފުރުސަތު ހޯދައިފަ އެވެ. 

މިއަހަރު ވެސް މުއިވެޔޮ ޓީމުގެ ކެޕްޓަން އަކީ ރައީސުލްޖުމްހޫރިއްޔާގެ ނައިބު އަލްއުސްތާޛް ޙުސެއިން މުޙައްމަދު ލަޠީފް (ސެމްބެ) އެވެ. މީގެ ކުރީ އަހަރު ތަކުގައި ބޭއްވި ވެޓަރަންސް ލީގުގައި ވެސް މުއިވެޔޮ ވާދަކޮށްފައިވާއިރު، އެ ޓީމުގެ ކެޕްޓަން އަކީ ނައިބު ރައީސް ޙުސެއިން އެވެ. މިއަހަރު ވެޓަރަންސް ކަޕްގެ ނަމުގައި މުބާރާތް ބާއްވަނީ އެފްއޭއެމް އިންނެވެ.

މުބާރާތުގެ ފުރަތަމަ ދެ ދުވަހު ގުރޫޕް އޭގެ މެޗުތައް ކުޅެފައިވާއިރު، ކުރިއަށް އޮތް ދެ ދުވަހު ވެސް ކުޅުމަށް ހަމަޖެހިފައި ވަނީ ގުރޫޕް ބީގެ މެޗު ތަކެވެ. ގުރޫޕް ބީގައި އޮތީ ހުއްރިއްޔާ ސްޕޯޓްސް ކުލަބު (ހުރާ) އާއި، ހުޅުމާލެ ވެޓަރަންސް ކުލަބާއި، ޔުނައިޓެޑު ވިކްޓްރީ އާއި، ޕޮލިސް ކުލަބު އަދި ބުރު ސްޕޯޓްސް ކުލަބެވެ.