އެފްއޭއެމް ވެޓަރަންސް ކަޕް: ފުރަތަމަ މެޗުގައި ގްރާންޑޭ ބަލިކޮށް ނިއު އަށް ރަނގަޅު ފެށުމެއް

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ބާއްވާ، އެފްއޭއެމް ވެޓަރަންސް ކަޕްގައި ނިއު ރޭޑިއަންޓް ސްޕޯޓްސް ކުލަބުން ކުޅުނު ފުރަތަމަ މެޗުން މޮޅުވެއްޖެ އެވެ.

މާފަންނު ޓާފްގައި ކުޅުނު ފުރަތަމަ މެޗުގައި ނިއު ނިކުމެފައި ވަނީ ދަ ގްރާންޑޭއާ ދެކޮޅަށެވެ. އެ މެޗު ނިއު އިން ކާމިޔާބު ކޮށްފައި ވަނީ 2-0 އިންނެވެ. މެޗުގައި ނިއު އިން އެ ޓީމުގެ ދެ ލަނޑު ވެސް ޖަހާފައި ވަނީ މެޗުގެ ފުރަތަމަ ހާފުގަ އެވެ.

މެޗު ފަށައިގެން 16 ވަނަ މިނެޓުގައި ނިއު އަށް ލީޑު ނަގައިދިނީ އެ ޓީމުގެ ލެޖެންޑް އަލީ އުމަރު އެވެ. އޭގެ މިނެޓެއް ފަހުން ނިއު އިން ވަނީ ދެ ވަނަ ލަނޑެއް ޖަހައި ލީޑު ފުޅާ ކޮށްފަ އެވެ. އެ ލަނޑު ނިއު އަށް ޖަހައިދިނީ އެ ޓީމުގެ ކުރީގެ ކުޅުންތެރިޔާ އަޙުމަދު ނިޔާޒް އެެވެ. މެޗުގައި ނިއު އިން ވަނީ އިތުރު ލަނޑު ޖަހަން ވެސް ފުރުސަތު ތަކެއް ހޯދައިފަ އެވެ.

މިއަހަރުގެ ވެޓަރަންސް ކަޕްގައި ޖުމުލަ 10 ޓީމެއް ބައިވެރިވެފައިވާއިރު، މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. ނިއު އާއި ގްރާންޑޭގެ އިތުރުން، މުއިވެޔޮ ފްރެންޑްސް ކުލަބު، ވިލިމާލެ ޔުނައިޓެޑު އަދި ދިވެހި ސިފައިންގެ ކުލަބު އޮތީ ގުރޫޕް އޭގަ އެވެ. 

ގުރޫޕް ބީގައި އޮތް ފަސް ޓީމަކީ ހުއްރިއްޔާ ސްޕޯޓްސް ކުލަބު (ހުރާ) އާއި، ހުޅުމާލެ ވެޓަރަންސް ކުލަބު އާއި، ޔުނައިޓެޑު ވިކްޓްރީ އާއި، ޕޮލިސް ކުލަބު އަދި ބުރު ސްޕޯޓްސް ކުލަބެވެ.