ޕޮލިހުން ސްޓެލްކޯގެ މައްޗަށް ކުރި ހޯދައިފި

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ވެޓަރަންސް ލީގުގައި ސްޓެލްކޯއާ ދެކޮޅަށް ކުޅުނު މެޗުން، ޕޮލިސް ކުލަބު މޮޅުވެއްޖެ އެވެ.

މާފަންނު ޓާފު ދަނޑުގައި އަންގާރަ ދުވަހުގެ ހަވީރު ކުޅުނު މެޗު ޕޮލިސް ކުލަބުން ކާމިޔާބު ކުރީ 4-1 އިންނެވެ. މެޗުގައި ޕޮލިސް ކުލަބުން ތިން ލަނޑު ޖެހި ފަހުން، ސްޓެލްކޯ އިން ލަނޑެއް ޖެހި އެވެ. ނަމަވެސް، ޕޮލިސް ކުލަބުން ވަނީ އިތުރު އެއް ލަނޑު ޖަހައިފަ އެވެ.

މެޗު ފަށައިގެން އަށް ވަަނަ މިނެޓުގައި ޕޮލިސް ކުލަބަށް ލީޑު ނަގައިދިނީ އަޙުމަދު ޝާހިދު އެވެ. އޭގެ ފަހުން 16 ވަނަ މިނެޓުގައި އާޔަތުﷲ އިބްރާހީމް ވަނީ ޕޮލިސް ކުލަބުގެ ދެ ވަނަ ލަނޑު ޖަހައިފަ އެވެ.

ދެ ވަނަ ލަނޑު ޖެހިތާ ތިން މިނެޓު ފަހުން އާޔަތުﷲ ވަނީ އިތުރު ލަނޑެއް ޖަހައި ޕޮލިސް ކުލަބުގެ ލީޑު ތިން ލަނޑަށް ފުޅާ ކޮށްފަ އެވެ. އޭގެ ފަހުން މެޗުގެ 29 ވަނަ މިނެޓުގައި ސްޓެލްކޯގެ ހަމައެކަނި ލަނޑު ޖެހީ މުޙައްމަދު ނަޒީފް އެވެ. އަދި މެޗުގައި ޕޮލިސް ކުލަބުގެ ހަތަރު ވަނަ ލަނޑު ޖަހައި އާޔަތުﷲ އޭނާގެ ހެޓްރިކް ހަމަ ކުރީ 56 ވަނަ މިނެޓުގަ އެވެ.

މިއަހަރުގެ ވެޓަރަންސް ލީގު ކުރިއަށް ދާނީ މި މަހުގެ 27 ވަނަ ދުވަހުގެ ނިޔަލަށެވެ. މިއަހަރުގެ މުބާރާތުގައި ޖުމުލަ 10 ޓީމަކުން ބައިވެރިވެ އެވެ.

މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕު އޭގައި އޮތީ ދިވެހި ސިފައިންގެ ކުލަބު، ވިލިމާލެ ޔުނައިޓެޑު، ހުޅުމާލޭ ވެޓަރަންސް ކުލަބު، ޒެލޮޓް އަދި ހުއްރިއްޔާ އެވެ. ގުރޫޕު ބީ ގައި ހިމެނެނީ ޕޮލިސް ކުލަބު، ސްޓެލްކޯ، ކުލަބު އީގަލްސް، މުއިވެޔޮ އަދި ދަ ގްރާންޑޭ އެވެ.