ހުރިހާ މުބާރާތެއްގައި އާސެނަލް އޮތުމަކީ އާޓެޓާ އަށް އޮތް ހިތްހަމަ ޖެހުމެއް

ސީޒަންގެ ހުރިހާ މުބާރާތެއްގައި ވެސް އާސެނަލް އޮތުމަކީ އެންމެ ބޮޑު އެއް ހިތްހަމަ ޖެހުން ކަމަށް، އާސެނަލް އަށް އިރުޝާދު ދެމުން އަންނަ މިކޭލް އާޓެޓާ ބުނެފި އެވެ. 

އިނގިރޭސި ޕްރިމިއާ ލީގުގައި ވުލްވްސްއާ ދެކޮޅަށް ނިކުންނަ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުން އާޓެޓާ ބުނީ، ހުރިހާ މުބާރާތެއްގައި އާސެނަލް އޮތްއިރު، ޓީމުގެ ފަރާތުން ރަނގަޅު ކުޅުމެއް ފެންނަމުން އަންނަ ކަމަށެވެ. އެއީ އޭނާ އަށް އޮންނަ އެންމެ ބޮޑު އެއް ހިތްހަމަ ޖެހުން ކަމަށާއި، އެކަން ދަމަހައްޓަން މަސައްކަތް ކުރަން ޖެހޭ ކަމަށް އާޓެޓާ ބުންޏެވެ.

މީގެ އިތުރުން ޕްރިމިއާ ލީގާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، ލީގު ރޭހުން އާސެނަލް ބޭރުވާން ބޭނުން ނުވާ ކަމަށާއި، ލީގު ރޭހުގެ ކުރީގައި އާސެނަލް އޮތުމަކީ އެންމެ ބޭނުންވާ ކަންތައް ކަމަށެވެ. ކުރިއަށް އޮތް މަދު ހަފުތާ ތަކުގެ ތެރޭގައި އާސެނަލް އިން މޮޅު ތަކެއް ހޯދަން ޖެހޭ ކަމަށާއި، އޭރުން އެ ޓީމުގެ ފަރަގު ދެމެހެއްޓޭނެ ކަމަށް އޭނާ ބުންޏެވެ. އާސެނަލް އޮންނަން ބޭނުންވާ ހިސާބުގައި އޮތުމަށް، އެންމެ މުހިންމީ މެޗު ތަކުން މޮޅުވުން ކަމަށް އޭނާ ބުންޏެވެ.

ވުލްސްއާ ގުޅޭ ގޮތުން ވާހަކަ ދައްކަމުން އާޓެޓާ ބުނީ، ވުލްވްސް އަކީ އިދިކޮޅަށް ކުޅެން އުނދަގޫ ޓީމެއް ކަމަށެވެ. އާސެނަލްގެ އަމިއްލަ ދަނޑުގައި ކުޅުނު މެޗުގައި ވެސް އެކަން ފެނުނު ކަމަށާއި، ވުލްވްސްގެ ދަނޑުގައި އެ ޓީމާ ދެކޮޅަށް ނިކުންނައިރު އިތުރަށް ސަމާލުވާން ޖެހޭނެ ކަމަށް އޭނާ ވަނީ ބުނެފަ އެވެ. މެޗުގައި އާސެނަލް އަށް ލިބޭ ފުރުސަތުގެ ބޭނުން އެންމެ ރަނގަޅު ގޮތުގައި ހިފުމަށް ޚާއްސަ ސަމާލުކަމެއް ދޭން ޖެހޭނެ ކަމަށް އޭނާ ފާހަގަ ކުރި އެވެ. 

ވުލްވްސްއާ ދެކޮޅަށް ނިކުންނައިރު، އެއް ވަނައިގައި އާސެނަލް އޮތީ ހަތަރު ޕޮއިންޓުގެ ލީޑަކުންނެވެ. އާސެނަލް އެންމެ ފަހުން ކުޅުނު މެޗުތަކުގައި ނަތީޖާ ނުނެރެވުނުއިރު، އެއް ވަނައިގައި އެ ޓީމު އޮތީ 26 މެޗުން 57 ޕޮއިންޓާ އެކު އެވެ. ހަމަ އެ އަދަދަށް މެޗު ކުޅެގެން ދެ ވަނައިގައި މެންޗެސްޓަރ ސިޓީ އަށް ލިބެނީ 53 ޕޮއިންޓެވެ.