ބިން ހިއްކާއިރު ކިސަޑު އާދޭ، އެ މަންޒަރު ފެންނަން ވެސް ފެނޭ، އެކަމަކު ބިން ހިއްކަން ޖެހޭ: މިނިސްޓަރު ތޯރިގް

ބިން ހިއްކާއިރު ކިސަޑު އަންނަ ކަމަށާ އެ މަންޒަރުތައް ފެނިވަޑައިގަތް ނަމަވެސް ބިން ހިއްކުމަކީ ވެސް ކުރަން ޖެހޭ ކަމެއް ކަމަށް ރައީސް ޑރ. މުހައްމަދު މުއިއްޒުގެ ތިމާވެށްޓާ ބެހޭ ވަޒީހު ތޯރިގް އިބްރާހިމް ވިދާޅުވެއްޖެ އެވެ. 

މިނިސްޓަރު އެހެން ވިދާޅުވީ އާދިއްތަ ދުވަހު ރައީސް އޮފީހުން ބޭއްވި ނޫސްވެރިންގެ ބައްދަލުވުމެއްގައި މާލެ ސަރަހައްދުގެ ކިލަނބުކަން ޑްރޯން ފޮޓޯތަކާއި މަތިންދާ ބޯޓުތަކުގެ އިތުރުން ސެޓަލައިޓު ފޮޓޯތަކަށް ވެސް އަރާފައިވާއިރު ޚާއްސަކޮށް ރަސްމާލެ ސަރަހައްދަށް ބޭރުގެ ކުންފުންޏެއްގެ ބޮޑު ޑްރެޖަރުން ވެލި އަޅަމުންދާ އިރު ފަރުމައްޗަށް ކިސަޑު ފައިބައިގެން ދާ މަންޒަރު ފެންނާތީ އެކަމާ ގުޅިގެން ރާއްޖެޓީވީ އިން ކުރި ސުވާލަށް ޖަވާބުދެއްވަމުންނެވެ.

މިނިސްޓަރު ވިދާޅުވީ އެ ހުރިހާ މަންޒަރެއް ވެސް ފެނިވަޑައިގަންނަވާ ކަމަށެވެ. ފޮޓޯ ތަކުންނާ ދަތުރު ކުރައްވާއިރު އެ މަންޒަރުތައް ފެނިވަޑައިގަންނަވާ ކަމަށެވެ.

އަޅުގަނޑަށް ވެސް ފެނިފަ ހުރީ ފޮޓޯ ތައް. ނުފެނެއެކޭ ނުދަންނަވަން. މަތިން ދާއިރުވެސް ފެނޭ. 

ރައީސް ޑރ. މުހައްމަދު މުއިއްޒުގެ ތިމާވެއްޓާ ބެހޭ ވަޒީހު ތޯރިގް އިބްރާހިމް

މިނިސްޓަރު ވިދާޅުވީ އެހެން ނަމަވެސް ބިން ހިއްކުމަކީ ވެސް ކުރަން ޖެހޭ ކަމެއް ކަމަށެވެ. ގެދޮރުގެ މަޝްރޫއުތައް ކުރިއަށް ގެންދިއުމަށް ވެސް އެކަން ކުރަން ޖެހޭ އިރު ބިން ހިއްކުން ފަދަ ކޮންމެ ޑިވެލޮޕްމަންޓް ޕްރޮޖެކްޓަކީ ވެސް އޭގެ ސަބަބުން ކޮންމެވެސް ވަރަކަށް ތިމާވެއްޓަށް ގެއްލުންވާ ޕްރޮޖެކްޓުތަކެއް ކަމަށް ވެސް މިނިސްޓަރު ވިދާޅުވި އެވެ. 

ބިން ހިއްކާއިރު ކިސަޑު އަންނާނެ. އެކަމު ބިން ހިއްކުމަކީ ވެސް ކުރަން ޖެހޭ ކަމެއް. އެއީ އަޅުގަނޑުމެންގެ ގެދޮރު އެޅުމަށް އެބަ ޖެހޭ ބިން ހިއްކަން. އެއީ އަޅުގަނޑުމެން އެންމެން ވެސް ގަބޫލު ކުރާ ކަމެއް. ރާއްޖޭގަ ގެދޮރުވެރިކަން އެބަ ބޭނުންވޭ ކަން. ބިން ހިއްކާފަ، ކުރިއަށް އޮތް ތަނުގަ މޫސުމަށް އަންނަ ބަދަލުތަކާ ގުޅިގެން ލިބޭ ގެއްލުންތައް ކުޑަކުރުމަށް ކުރިއަށް ވުރެ ރަނގަޅަށް ބިން ހިއްކައިގެން އަޅުގަނޑުމެން ތަންތަން އުފައްދަން ޖެހެނީ. 

ރައީސް ޑރ. މުހައްމަދު މުއިއްޒުގެ ތިމާވެއްޓާ ބެހޭ ވަޒީހު ތޯރިގް އިބްރާހިމް

މިނިސްޓަރު ވިދާޅުވީ އެހެން ކަމުން މިކަންކަން ކުރުމުގައި ބަލަނީ އެންމެ ގެއްލުން ކުޑަކޮށް އެކަމެއް ކުރެވޭނެ ގޮތެއް ކަމަށެވެ. އަދި ޑިވެލޮޕްމަންޓް ޕްރޮޖެކްޓުތަކުން ތިމާވެއްޓަށް ލިބޭ ގެއްލުމަކީ ކޮބައިތޯ ބަލައި، އެ ގެއްލުން ކުޑަކުރަން މަސައްކަތް ކުރަމުން ދާ ކަމަށް ވެސް މިނިސްޓަރު ވިދާޅުވި އެވެ. 

މާލެ ސަރަހައްދުގެ ކިލަނބުކަން ޑްރޯން ފޮޓޯތަކާއި މަތިންދާ ބޯޓުތަކުގެ އިތުރުން ސެޓްލައިޓު ފޮޓޯތަކަށް ވެސް އަރަ އެވެ. ޚާއްސަކޮށް ރަސްމާލެ ސަރަހައްދަށް ބޭރުގެ ކުންފުންޏެއްގެ ބޮޑު ޑްރެޖަރުން ވެލި އަޅަމުންދާ އިރު ފަރުމައްޗަށް ކިސަޑު ފައިބައިގެން ދާ މަންޒަރު ފެންނަ ވިީޑިއޯތައް ވަނީ ރަސް،ީ މިޑީއާތަކުގައި ވެސް ދައުރުވެފަ އެވެ. އޭގެ އިތުރުން ފޭސް ތިނެއް ހިއްކުމަށް އަޅަމުންދާ ވެލީގެ ސަބަބުން އުފެދޭ ކިސަޑާއި އޮޅަ ހުޅުމާލެ ފަޅުން ބޭރުވެ ހުޅުލޭގެ ފަޅާއި އެ ދިމާ ބޭރަށް ފެތުރޭ މަންޒަރުތަކުގެ ވީޑިއޯ ވެސް އާންމުވެފައިވާ އިރު ކިސަޑާއި ވެލި ގުޅި އަދި މާފުށީގެ އިތުރުން އެ ހިސާބުގައިވާ ފަޅުތަކާއި އެ ފަޅުތަކުގައި ހުރި ރިސޯޓުތަކުގެ ފަރަށް ފެތުރި އެކަމުގެ ކަންބޮޑުވުން ވެސް ގިނަބަޔަކު ވަނީ ފާޅު ކޮށްފަ އެވެ. 

މި މަޝްރޫއުތަކާ ގުޅިގެން ތިމާވެށީގެ މައްސަލަތަކުގައި މިހާތަނަށް ކިހާ ޝަކުވާއެއް ލިބިފައިވޭތޯ އާއި އެކަމާ ގުޅިގެން ކޮންޓްރެކްޓަރަށް އެއްވެސް ފިޔަވަޅެއް އެޅިންތޯ ރާއްޖެޓީވީ އިން  މީގެ ކުރިން ވެސް މިނިސްޓަރާ ސުވާލު ކުރި ނަމަވެސް މިނިސްޓަރު ވަނީ ކުރި މެސެޖަށް ޖަވާބު ދެއްވުމަށް ދެކޮޅު ހައްދަވާފަ އެވެ.