އިންތިހާބުތަކާ ދިމާކޮށް މި ސަރުކާރުން ގެންގުޅޭ ހަމައެކަނި ސިޔާސަތަކީ، އިދިކޮޅު ފަރާތްތަކަށް އިންޒާރުދީ ފުރައްސާކުރުން: ފައްޔާޒް
އެމްޑީޕީން ބޭއްވި "ލޫޓުވައިފި" މުޒާހަރާއާ ގުޅިގެން މަޖިލިސް މެންބަރު މައުރޫފް ޒާކިރު ހިމެނޭހެން އެ ޕާޓީގެ ހަތަރު މެންބަރަކަށް ދައުވާކުރަން ފޮނުވުމުން، އެއީ ސިޔާސީ ބިރުދެއްކުމެއް ކަމަށް ބުނެ ފައްޔާޒް އިސްމާއިލް ކަންބޮޑުވުން ފާޅުކުރައްވައިފި. ފުލުހުން މި މައްސަލަ ޕީޖީ އޮފީހަށް ފޮނުވީ ގާނޫނާ ހިލާފަށް އެއްވެ، ދަތުރުފަތުރަށާއި ފުލުހުންގެ ވާޖިބަށް ހުރަސްއެޅި ކަމުގެ ތުހުމަތުގަ. މި ފިޔަވަޅު އަޅާފައިވަނީ އެމްޑީޕީން އަންނަ މާރިޗު މަހު ބޮޑު މުޒާހަރާއެއް ބާއްވާނެކަން އިއުލާންކޮށްފައި ވަނިކޮށް ކަމަށްވާތީ، މިއީ އިދިކޮޅު ހަރަކާތްތަކަށް ހުރަސްއެޅުމުގެ އަމަލެއްގެ ގޮތުގައި އެ ޕާޓީން ސިފަކުރޭ.
އެމްޑީޕީ ގެ ކުރީގެ ޗެއާޕާސަން ފައްޔާޒު އިސްމާއީލް | އެމްޑީޕީ ސެކްރިޓޭރިއެޓް
ކޮންމެ އިންތިޚާބަކާ ދިމާކޮށް ރައީސް ޑރ. މުހައްމަދު މުއިއްޒުގެ މި ސަރުކާރުން ގެންގުޅޭ ހަމައެކަނި ސިޔާސަތަކީ، އިދިކޮޅު ފަރާތްތަކަށް ބިރުދައްކައި ފުރައްސާރަކުރުން ކަމަށް އެމްޑީޕީގެ ކުރީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެ އެވެ.
ފައްޔާޒް މިހެން ވިދާޅުވީ، 2025 ވަނަ އަހަރުގެ އޮކްޓޯބަރު މަހުގެ 3 ވަނަ ދުވަހު އެމްޑީޕީން ކުރިއަށް ގެންދިޔަ "ލޫޓުވައިފި" މުޒާހަރާއާ ގުޅިގެން، ރައްޔިތުންގެ މަޖިލީހުގެ ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) ހިމެނޭހެން އެ ޕާޓީގެ ހަތަރު މެންބަރަކަށް ދައުވާކުރުމަށް ފުލުހުން ޕްރޮސެކިއުޓަރ ޖެނެރަލްގެ އޮފީހަށް ފޮނުވުމާ ގުޅިގެންނެވެ.
އެމްޑީޕީ ސަރުކާރުގެ އިކޮނޮމިކް މިނިސްޓަރުކަން ވެސް ކުރެއްވި ފައްޔާޒް ވަނީ މި މައްސަލާގައި ނުހަނު ބޮޑަށް ކަންބޮޑުވުން ފާޅުކުރައްވާފަ އެވެ. ފައްޔާޒް ވިދާޅުވީ، މި ބިރުވެރިކަމާއި ނާމާންކަން އޮތް ސަރުކާރުގެ ބާކީ އޮތް ދުވަސްތަކުގައި ރާއްޖޭގެ ހާލަތު އޮންނާނީ މިފަދަ ގޮތަކަށް ކަމަށެވެ. އަދި އިންތިޚާބުތަކާ ދިމާކޮށް އިދިކޮޅު ސިޔާސީ ފަރާތްތަކަށް ބިރުދައްކައި، އިންޒާރުދީ އަދި ފުރައްސާރަކުރުމަކީ މި ސަރުކާރުގެ އާންމު އުސޫލެއް ކަމަށް އޭނާ ތުހުމަތު ކުރެއްވި އެވެ.
މި މައްސަލާގައި ދައުވާކުރުމަށް ޕީޖީ އޮފީހަށް ފޮނުވި އެމްޑީޕީގެ މެންބަރުންގެ ތެރޭގައި މެންބަރު މައުރޫފްގެ އިތުރުން ހިމެނެނީ، ކުރިއަށް އޮތް ލޯކަލް ކައުންސިލް އިންތިޚާބުގައި މާލޭ ސިޓީ ކައުންސިލްގެ ހުޅުމާލޭ އުތުރު ދާއިރާއަށް އެމްޑީޕީގެ ޓިކެޓުގައި ވާދަކުރާ ފާތުމަތު ޒަހިއްޔާ (ޒާޔާ) އާއި، ނ. ހޮޅުދޫ، މާފޮޅޭވިލާ، އަބްދުއްސަލާމްގެ އިތުރުން ހދ. ކުޅުދުއްފުށީ ޑިސްކް، އައިޝަތު ނަޖުދާ އަލީ އެވެ. ދައުވާކުރުމަށް ފޮނުވިކަން އަންގައި ފުލުހުން މި ފަރާތްތަކަށް ފޮނުވި ލިޔުމުގައި ބުނެފައިވަނީ، އެ ރޭގެ މުޒާހަރާ ކުރިއަށް ގެންދިޔައީ ސުލްހަވެރިކަމާއެކު އެއްވެ އުޅުމުގެ މިނިވަންކަމުގެ ގާނޫނާ ހިލާފަށް ކަމަށެވެ.
ފުލުހުން ބުނެފައިވާ ގޮތުގައި، މި މީހުންގެ މައްޗަށް ދައުވާ ކުރަން ފޮނުވީ ގާނޫނާ ހިލާފަށް މާލޭގެ އެކި ސަރަހައްދުތަކަށް އެއްވެ އަޑުގަދަކޮށް މުޒާހަރާކުރުމާއި، އާންމު ދަތުރުފަތުރަށް ހުރަސްއެޅުމާއި، ވިޔަފާރިތަކަށް ދަތިވާނެހެން ހަރަކާތްތެރިވި ކަމުގެ ތުހުމަތުގަ އެވެ. މީގެ އިތުރުން ފުލުހުންގެ ދައުރު އަދާކުރުމަށް ހުރަސްއަޅައި، ފުލުހުންގެ އަމުރަށް ނުކިޔަމަންތެރިވެ ވާޖިބަށް ހުރަސްއެޅި ކަމުގެ ތުހުމަތު ވެސް ވަނީ ކޮށްފަ އެވެ.
ފާހަގަކޮށްލެވޭ ގޮތުގައި، މީގެ ފަސް މަސް ކުރިން ކުރި މުޒާހަރާއެއްގެ މައްސަލާގައި އެމްޑީޕީގެ އިސް ބޭފުޅުންނަށް ދައުވާކުރަން މި ފޮނުވީ، އެ ޕާޓީ އިން އިތުރު މުޒާހަރާ އެއް އިއުލާންކޮށްފައި ވަނިކޮށެވެ. އަންނަ މާރިޗު މަހުގެ 21 ވަނަ ދުވަހު ބޮޑު މުޒާހަރާ އެއް ބާއްވާނެކަން އެމްޑީޕީ އިން އިއުލާން ކުރީ މިދިޔަ އަންގާރަ ދުވަހު އެވެ. އެ މުޒާހަރާ އިންތިޒާމު ކުރުމުގައި އެންމެ އިސްކޮށް ހަރަކާތްތެރިވާ އެކަކީ މެންބަރު މައުރޫފެވެ. މައުރޫފަކީ ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާ ދެކޮޅަށް އެމްޑީޕީ އިން ކުރިއަށްގެންދާ ކެމްޕެއިންގެ ޓާސްކްފޯސް ތަރުޖަމާނު ވެސް މެ އެވެ.
