ރާއްޖެއިން ބޭރުގައާއި ސިނާއީ ރަށްތަކުގައި ވޯޓު ފޮށި ބަހައްޓަން ކަނޑައެޅި ތްރެޝްހޯލްޑަކީ މީގެ ކުރިން ކަނޑައަޅާފައި ނުވާ ވަރުގެ ބޮޑު އަދަދެއް: ވަހީދު

ރާއްޖެއިން ބޭރުގައާއި ސިނާއީ ރަށްތަކުގައި ވޯޓު ފޮށި ބަހައްޓަން އިލެކްޝަންސް ކޮމިޝަނުން ކަނޑައެޅި ތްރެޝްހޯލްޑަކީ މީގެ ކުރިން ކަނޑައަޅާފައި ނުވާ ވަރުގެ ބޮޑު އަދަދެއް ކަމަށާއި، އެއީ އެތަންތަނުގައި ވޯޓު ފޮށި ބަހައްޓަން ސަރުކާރުން ބޭނުން ނުވާތީ ކުރި ކަމެއް ކަމަށް ކައުންސިލް އިންތިޚާބަށް އެމްޑީޕީން ހަމަޖައްސާފައިވާ ތަރުޖަމާން ދިއްދޫ ދާއިރާގެ ރައީސް އަބްދުﷲ ވަހީދު ވިދާޅުވެއްޖެ އެވެ. 

އެމްޑީޕީ އިން ބުރާސްފަތި ދުވަހުގެ މެންދުރު ބޭއްވި ނޫސްވެރިންގެ ބައްދަލުވުމުގައި ވަހީދު ވިދާޅުވީ އިންތިހާބުގެ ކަންކަމާއި ގުޅިގެން ފާހަގަވި އެއްކަމަކީ އިލެކްޝަންސް ކޮމިޝަންގެ ފަރާތުން ރަޖިސްޓްރީވުމަށް ހުޅުވާލި ފުރުޞަތުގައި ފެނިގެންދިޔައީ ސިނާޢީ އަދި ރާއްޖޭގެ ރިސޯޓުތަކާއި، ރާއްޖެއިން ބޭރުގައި ފޮށިތައް ބެހެއްޓުމަށްޓަކައި ހުޅުވައިލި ހުޅުވައިލުމުގެ ތެރޭގައި ހުރި ކަންބޮޑުވުންތައް ކަމަށެވެ. އެގޮތުން، ފާހަގަވެގެންދިޔައީ، ސްރީލަންކާ އާއި މެލޭޝިއާގައި ފޮށި ބެހެއްޓުމަށްޓަކައި ގެންގުޅުނު ތްރެޝްހޯލްޑަކީ މިއިން އެއްވެސް އިންތިޚާބެއްގައި އިލެކްޝަނުން ބޭނުންކުރި ވަރަށްވުރެ، މާ މަތީ ތްރެޝްހޯލްޑެއް ކަމަށެވެ.

އެއީ، 2000 މީހުން ރަޖިސްޓްރީވެގެން ނޫނިއްޔާ އެއިން އެއްވެސް ދާއިރާއެއްގައި ވޯޓު ފޮށްޓެއް ނުބެހެއްޓޭނެ ކަމަށް އިލެކްޝަންސް ކޮމިޝަނުން ނިންމާފައިވާ ނިންމުން ކަމަށް ވަހީދު ވިދާޅުވި އެވެ. އޭނާ ވިދާޅުވީ އޭގެ ނަތީޖާއަކަށްވެގެން ދިޔައީ، އެއިން އެއްވެސް ސަރަޙައްދެއްގައި އިލެކްޝަންގެ ވޯޓު ފޮށްޓެއް ނުބެހެއްޓޭނެ ކަމަށް އިލެކްޝަނުން އިޢުލާނުކުރުން ކަމަށެވެ.

އަޅުގަނޑުމެން މިކަމުގެ އިންތިހާއަށް ކަންބޮޑުވުން އެބައޮތް. ސަބަބަކީ، ރާއްޖޭގައި 400 މީހުން އުޅޭ ރަށެއްގައި ވެސް ވޯޓު ފޮށި ބެހެއްޓޭ. އެހެންވީމާ، ދެހާހުން މަތީގެ އާބާދީ ތަކެއްގެ ގޮތުގައި އަޅުގަނޑުމެންނަށް ފާހަގަވެގެންދޭ، ސްރީލަންކާ އާއި އަދި މެލޭޝިއާގެ އުޅެމުންދާއިރުގައި. އެ ތަންތާނގައި ވޯޓު ފޮށި ބެހެއްޓުމަށްޓަކައި އެހާ ބޮޑު އަދަދެއްގެ ރަޖިސްޓްރޭޝަނެއް އޮންނަންޖެހޭނެ ކަމަށް އެ ނިންމި ނިންމުމަކީ ޙަޤީޤަތުގައި އިލެކްޝަންގެ ހެޔޮ ނިޔަތް، ގިނަ ރައްޔިތުންނަށް ވޯޓު ލެވޭނެ ފުރުޞަތު ނުދިނުމަށްޓަކައި ނިންމި ނިންމުމެއް. އަޅުގަނޑުމެންނަށް ފާހަގަވެގެން މި ދަނީ، އެ ސަރަޙައްދު އެ ތަންތާނގައި ބަހައްޓަން ނިންމި ވޯޓުފޮށިތައް ނުބެހެއްޓުމުގެ ތެރޭގައި ގިނަގުނަ ސަބަބުތަކެއް އެބަހުރި. ސަރުކާރަށް އިންތިހާއަށް ފައިދާވާނެ ގޮތަށް އެކަންކަން ކުރި.

ކައުންސިލް އިންތިހާބުގެ ތަރުޖަމާނު އަބްދުﷲ ވަހީދު

ވަހީދު ވިދާޅުވީ ރާއްޖެއިން ބޭރުގައި މަތީ ތަޢުލީމު ހާސިލުކުރަމުންދާ ދަރިވަރުންނަށް ސަރުކާރުން ދޭންޖެހޭ އެލަވަންސެއް ނުދެވޭތީ، އެ ފަރާތްތަކުގެ ވޯޓު ސަރުކާރަށް ނުލިބޭނެކަން ޔަޤީންވާތީވެ، އިލެކްޝަންސް ކޮމިޝަން ބޭނުންކޮށް، އެ ތަންތަނުގައި ވޯޓުފޮށި ބެހެއްޓުން އެއީ ނެތް ކަމެއްގެ ގޮތުގައި ހަދާފައވާ ކަމަށެވެ.

ވަހީދު ވިދާޅުވީ އެމްބަސީތަކުގައި މަސައްކަތްކުރާ ހުރިހާ ފަރާތްތަކެއް ސަރުކާރުގެ ޓިކެޓުގައި މާލެ ގެނެސް، މާލޭގައި ވޯޓުލުމަށްޓަކައި މަސައްކަތްކުރާ ވާހަކަ ކަމަށެވެ. 

މިއަދު މި ފާހަގަވެގެންދިޔައީ އެ ސަރަޙައްދުތަކުގައި ތިއްބެވި ބޭފުޅުންނަށް ވޯޓު ނުލެވޭނެ ގޮތަކަށް އިލެކްޝަނުން ޢަމަލުކުރި ތަން. އަޅުގަނޑުމެން އަދިވެސް ގޮވާލަން އޮތީ، ތި ބޭފުޅުން ތި ޢަމަލުކުރަންޖެހޭނީ ގިނަ ރައްޔިތުންނަށް ވޯޓުލެވި، ގިނަ ރައްޔިތުންނަށް ބައިވެރިވެވޭނެ ގޮތަކަށޭ މި އިންތިޚާބު ކުރިއަށް ގެންދަންޖެހޭނީ. ޚާއްޞަކޮށް، ދެ އިންތިޚާބު އެކުގައި ބާއްވާއިރުގައި އެ ޖާގަ ދޭން އެބަޖެހޭ. އެގޮތަށް ފަހިވާނެ ގޮތަކަށް އެ ކަންކަން ކުރަން އެބަޖެހޭ. އިލެކްޝަންގެ މި އިންތިޚާބަށް ތައްޔާރުވާން ފެށުނު ހިސާބުން ފެށިގެން އަޅުގަނޑުމެން މި ދަނީ ކަންބޮޑުވުން ފާޅުކުރަމުން، އިލެކްޝަންގެ ޢަމަލުތަކާ މެދުގައި ސަރުކާރުގެ ނުފޫޒަށް އިލެކްޝަން ތަބާވެގެން މި އިންތިޚާބަށް ތައްޔާރުވުމަށް ބޭއްވި އިންތިޒާމީ ހުރިހާ ކަމަކުން ވެސް އަޅުގަނޑުމެންނަށް ފާހަގަވެގެން މި ދަނީ، މި އިންތިޚާބުގައި ވޯޓުލާން ތިބި ފަރާތްތަކަށް ވޯޓުނުލެވޭނެ ގޮތަކަށް މުޅި ޕްރޮސެސް އެއްކޮށް ގެންދާ ތަން. 

ކައުންސިލް އިންތިހާބުގެ ތަރުޖަމާނު އަބްދުﷲ ވަހީދު

ވަހިދު ވިދާޅުވީ އެދެނީ ގިނަ ރައްޔިތުންނަށް މި އިންތިޚާބުގައި ވޯޓުލެވޭނެ ގޮތަށް އިލެކްޝަންގެ އިންތިޒާމުތައް ހަމަޖެއްސުން ކަމަށެވެ. އަދި ރާއްޖެއިން ބޭރުގައާއި ސިނާޢީ ރަށްރަށުގައި ވޯޓުފޮށި ބެހެއްޓުމަށްޓަކައި މިހާރު އިލެކްޝަނުން ކަނޑައަޅާފައި ހުރި އިތުރު ތްރެސްހޯލްޑްތައް ދަށްކޮށް، އެ ސަރަޙައްދުތަކަށް ވޯޓުލެވޭނެ ގޮތެއް ހަދަންޖެހޭ ކަމަށެވެ.