ހުއްރިއްޔާ އާއި ސިފައިން ފުއްދާލަން ޖެހުނީ ޕޮއިންޓަކުން

މިހާރު ކުރިއަށްދާ، ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) ވެޓަރަންސް ލީގުގައި ހުއްރިއްޔާ އާއި ދިވެހި ސިފައިންގެ ކުލަބު ބައްދަލު ކުރި މެޗު އެއްވަރުވެއްޖެ އެވެ.

ހޯމަ ދުވަހުގެ ހަވީރު މާފަންނު ޓާފު ދަނޑުގައި ކުޅުނު މެޗު ނިމުނީ އެއްވެސް ޓީމަކަށް ލަނޑެއް ނުޖެހި، ސުމެއް ސުމަކުން އެއްވަރު ވެގެންނެވެ.

މެޗުގައި ދެ ޓީމުގެ ކުޅުންތެރިންނަށް ވެސް ވަނީ ލަނޑު ޖަހާނެ ފުރުސަތުތަކެއް ލިބިފަ އެވެ. ނަމަވެސް އެއްވެސް ޓީމަކަށް އެ ފުރުސަތުތަކުގެ ބޭނުން ކުރެވޭ ގޮތެއް ނުވި އެވެ.

މިއީ މުބާރާތުގައި ސިފައިންގެ ކުލަބުން ކުޅުނު ހަތަރު ވަނަ މެޗެވެ. އޭގެ ތެރެއިން ސިފައިންގެ ކުލަބުން ވަނީ ޒަލޮޓްގެ މައްޗަށް ކުރި ހޯދައިފަ އެވެ. މީގެ އިތުރުން ހުޅުމާލެ ވެޓަރަންސް، ވިލިމާލެ ޔުނައިޓެޑު އަދި ހުއްރިއްޔާއާ ދެކޮޅަށް ކުޅުނު މެޗު އެއްވަރުވީ އެވެ.

އަނެއްކޮޅުން މިއީ މުބަރާތުގައި ހުއްރިއްޔާ އިން ކުޅުނު ތިން ވަނަ މެޗެވެ. އެ ޓީމުން ވަނީ ޒަލޮޓް އަތުން މޮޅުވެފަ އެވެ. ވިލިމާލެ އަދި ސިފައިންގެ ކުލަބު އަތުން ވަނީ އެއްވަރުވެފަ އެވެ.

މިއަހަރުގެ ވެޓަރަންސް ލީގު ކުރިއަށް ދާނީ މި މަހުގެ 27 ވަނަ ދުވަހުގެ ނިޔަލަށެވެ. މިއަހަރުގެ މުބާރާތުގައި ޖުމުލަ 10 ޓީމަކުން ބައިވެރިވެ އެވެ.

މުބާރާތް ކުރިއަށް ގެންދަނީ ދެ ގުރޫޕަކަށް ބަހާލައިގެންނެވެ. އެގޮތުން ގުރޫޕު އޭގައި އޮތީ ދިވެހި ސިފައިންގެ ކުލަބު، ވިލިމާލެ ޔުނައިޓެޑު، ހުޅުމާލޭ ވެޓަރަންސް ކުލަބު، ޒެލޮޓް އަދި ހުއްރިއްޔާ އެވެ. ގުރޫޕު ބީ ގައި ހިމެނެނީ ޕޮލިސް ކުލަބު، ސްޓެލްކޯ، ކުލަބު އީގަލްސް، މުއިވެޔޮ އަދި ދަ ގްރާންޑޭ އެވެ.