ރައީސް މުއިއްޒު އަތޮޅު ކައުންސިލްތައް އުވާލައްވައިފި، ކައުންސިލަރުންގެ އެލަވަންސް ކަނޑާލައްވައިފި، ދެން ކިހިނެއްތޯ ރަށަކަށް ދާނީ؟: ބޮންޑާ

ރައީސް ޑރ. މުހައްމަދު މުއިއްޒު އަތޮޅު ކައުންސިލްތައް އުވާލައްވާފައިވާ ކަމަށާއި، ރަށޫ ކައުންސިލަރުންގެ އެލަވަންސްތައް ވެސް ކަނޑާލައްވާފައިވާއިރު ރަށްރަށަށް ވަޑައިގަންނަވާނީ ކިހިނެއްތޯ މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ) ސުވާލު އުފައްދަވައިފި އެވެ. 

ރާއްޖެޓީވީ ގެ "ފަލަސުރުޚީ" ޕްރޮގްރާމްގައި ވާހަކަ ދައްކަވަމުން ބޮންޑާ ވަނީ ކެންޕޭންގެ ބޭނުމުގައި ކުރިއަށް އޮތް ލޯކަލް ކައުންސިލް އިންތިޚާބުގައި އެއްވެސް ރަށަކަށް ދިއުމަށް ގަސްތު ނުކުރައްވާ ކަމަށް ރައީސް ވިދާޅުވެފައި ވާތީ އެމަނިކުފާނު ރަށަކަށް ދަތުރެއް ކުރައްވާނީ ވެސް ކިހިނެއްތޯ ސުވާލު އުފައްދަވާފަ އެވެ. 

ބޮންޑާ ވިދާޅުވީ ރައީސް މުއިއްޒަށް އަތޮޅު ކައުންސިލްތަކާ ކުރިމަތިލައްވާކަށް ކެރިވަޑައިނުގަންނަވާނެ ކަމަށެވެ. އެއީ އެ ކައުންސިލްތައް އެމަނިކުފާނު އުވާލައްވާފައިވާތީ ކަމަށާ ރަށްރަށަށް ޒިޔާރަތް ނުކުރައްވާނެ ކަމަށް ވިދާޅުވެފައިވާއިރު ރަށްރަށަށް ވަޑައިގަންނަވާނީ ވެސް ކޮން ހައިސިއްޔަތަކުންތޯ ސުވާލު އުފެއްދެވި އެވެ. 

ރަށްރަށަށް ކިހިނެއް ދާނީ. އަތޮޅު ކައުންސިލްތަކާ ކުރިމަތިލާކަށް ނުކެރޭނެ. އެ އުވާލައިފި. ދެން ރަށްރަށުގެ ކައުންސިލުގެ އިތުރު ގަޑީގެ އެލަވަންސްތަކާ އެއްޗެހި ކަނޑާލައިފި. އެމީހުންނަށް ދެވޭނެ އެއްޗެއް ނެތް. އެމީހުންގެ ޝަކުވާ އޮންނާނެ. ހުރިހާ ކައުންސިލަރުންނަކީ މުޅި ރަށުގެ ބޮޑު ނެޓްވަރކް އެއް. އެމީހުންނަކީ ސިޔާސީ ބައެއް. އެމީހުންނާ ގުޅިފަ އޮންނާނެ މުޅި ރަށް. އެހެންވީމަ އަތޮޅުތަކަށް ނުދާނެތާ. އެހެންވީމަ އެއުޅެނީ މިހާރު ހުރިހާ އެއްޗެއް އެއްކޮށްލައިގެން އެއް އިންތިޚާބަކަށް ހަދައިގެން ވެސް ހޮވޭނެ ކަމަށް. އަޅުގަނޑަކަށް ހަމަ އެއްގޮތަކަށް ވެސް ނުފެނޭ ހުރިހާ އިންތިޚާބެއް އެއްކޮށްލިއަސް،

 މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ) 

ބޮންޑާ ވިދާޅުވީ މި ސަރުކާރަށް ރައްޔިތުން މިހާރު އިތުބާރު ނުކުރާ ކަމަށެވެ. ޚާއްސަކޮށް ރައީސް މުއިއްޒު ކައުންސިލް އިންތިޚާބުގައި ސަރުކާރު ކެންޑިޑޭޓުންނަށް ވޯޓު ދޭން ޖެހޭ ކަމަށް ވިދާޅުވި ނަމަވެސް އެކަން ރައްޔިތުން ގަބޫލު ނުކުރާ ކަމަށް ބޮންޑާ ވިދާޅުވި އެވެ. ސަބަބަކީ މަޖިލިސް އިންތިޚާބުގައި ވެސް ސަރުކާރު މެންބަރުން ހޮވައިފިނަމަ ރައްޔިތުންނަށް ފަސޭހަ ވާނެ ކަމަށް ވިދާޅުވުމަށް ފަހު މިހާރު މަޖިލިސް ވެސް ކޮންޓްރޯލް ކުރަނީ އެމަނިކުފާނު ކަމަށް ވާތީ ކަމަށް ބޮންޑާ ވިދާޅުވި އެވެ. 

ބޮންޑާ ވިދާޅުވީ މިހާރު އޮތީ ރައްޔިތުންގެ މަޖިލީހެއް ނޫންކަން ރައްޔިތުން ގަބޫލުކުރާ ކަމަށާ މިހާރު އޮތީ ރައީސުލްޖުމްހޫރިއްޔާގެ މަޖިލީހެއް ކަން ވެސް ރައްޔިތުން ގަބޫލު ކުރާ ކަމަށެވެ. 

ކުރިއަށް އޮތް ލޯކަލް ކައުންސިލް އިންތިޚާބާ ދިމާކޮށް އެއްވެސް ރަކަށް ދިއުމަށް ގަސްތު ނުކުރައްވާކަން ފާހަގަކުރައްވައި ރައީސް މުއިއްޒު ވިދާޅުވީ، މިއީ ކުރީގައި ކަންކަން ހިނގި ގޮތް ނޫން ކަމަށާއި، އިންތިޚާބުތަކާ ދިމާކޮށް ދަތުރުތައް ހަދައިގެން ދަތުރު ކުރާ ކަމަށެވެ.  

ރައީސް މުއިއްޒު މިމޭރުމުން ވާހަކަފުޅު ދެއްކެވިއިރު، ރާއްޖޭގެ މީހުން ދިރިއުޅޭ 187 ރަށަށާއި ސިޓީތަކަށް، އެމަނިކުފާނުގެ ވެރިކަމުގެ ފުރަތަމަ އަހަރާއި 11 މަސް ދުވަހުގެ ތެރޭގައި ވަނީ ވަޑައިގެންފަ އެވެ. މި މުއްދަތުގައި އެމަނިކުފާނު ވަނީ 63 ރަށަކަށް ދެވަނަ ފަހަރަށް ވެސް ޒިޔާރަތް ކުރައްވާފަ އެވެ. 

މަޖިލިސް އިންތިޚާބުގެ ކެންޕޭން ދުވަސްވަރު ވެސް ވަރަށް ގިނަ ރަށްރަށަށް ވަޑައިގެންނެވީ ސަރުކާރުގެ ބޮޑު ވަފުދަކާ އެެކު އެވެ. 

ރަށްރަށަށް ކެމްޕޭނަށް ވަޑައިނުގަންނަވާނެ ކަމަށް ވިދާޅުވާއިރު، ރައީސުލްޖުމްހޫރިއްޔާގެ ރަސްމީ ގެ މުލީއާގޭގައި ވެސް ގެންދަވަނީ ސީދާ ކެމްޕޭނާ ގުޅޭ ހަރަކާތްތައް މުއިއްޒު ހިންގަވަމުންނެވެ. އަދި ކެމްޕޭން ކުރުމަށް އަތޮޅުތަކަށް މިނިސްޓަރުންނާއި އެމްޑީން އިންނާއި މަޖިލިސް މެމްބަރުން ގެންދަނީ ދަތުރުތައް ކުރަމުންނެވެ.

ރަށްރަށުގެ އުމްރާނީ ތަރައްގީގެ މަޝްރޫއުތައް ހުއްޓުވުމަށްފަހު، މިގޮތަށް ދަތުރު ކުރައްވާތީ ގިނަ ބައެއްގެ ފާޑު ކިޔުން ސަރުކާރަށް އަމާޒުވެފައިވެ އެވެ. އަދި މިއީ ދައުލަތުގެ ފައިސާ އިސްރާފު ކުރުން ކަމަށް ގިނަ ރައްޔިތުން ބުނެފައިވެ އެވެ.