ރައްޔިތުން އިތުބާރު ކުރަނީ އެމްޑީޕީ އަށް، އެއީ ވައުވެ، ވައުދު ފުއްދާ ޕާޓީ އަކީ އެމްޑީޕީ ކަމަށް ވާތީ: ބޮންޑާ
މިހާރުގެ ސަރުކާރަށް ރައްޔިތުންގެ އިތުބާރު ނެތް ކަމަށާއި، ކުރިއަށް އޮތް ކައުންސިލް އިންތިޚާބުގައި ރައީސް ޑރ. މުއިއްޒަށް ކާމިޔާބީއެއް ނުހޯއްދެވޭނެ ކަމަށް ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ. ދައުލަތުގެ މާލިއްޔަތު ބޭނުންކޮށްގެން ގޮނޑިތައް ގަތުމުގެ ފުރުސަތު އޮތް ނަމަވެސް، އިންސާފުވެރި އިންތިޚާބެއް ބާއްވައިފި ނަމަ އެމްޑީޕީން ގިނަ ގޮނޑިތައް ކާމިޔާބު ކުރާނެ ކަމަށް އޭނާ ފާހަގަކުރެއްވ. އެހެންކަމުން، ކުރިއަށް އޮތް އިންތިޚާބަކީ ރައްޔިތުންގެ ހަގީގީ ތާއީދު ފެނިގެންދާނެ މުހިއްމު އިންތިޚާބެއް ކަމަށް ބޮންޑާ ވިދާޅުވި.
މާފަންނު މެދު ދާއިރާގެ ކުރީގެ މަޖިލިސް މެންބަރު އިބްރާހީމް ރަޝީދު (ބޮންޑާ) | ރާއްޖެ އެމްވީ
ދިވެހީން އިތުބާރު ކުރާ ޕާޓީ އަކީ އެމްޑީޕީ ކަމަކާ އެއީ އެޕާޓީ އަކީ ވައުދު ވުމަށްފަހު ވައުދު ފުއްދާ ޕާޓީ އަކަށް ވާތީ ކަމަށް ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ) ވިދާޅުވެއްޖެ އެވެ.
އެ ޕާޓީ އިން ބުރާސްފަތި ދުވަހުގެ ރޭ ކުރިއަށް ގެންދިއަ މާފަންނު މެދު ދާއިރާގެ ދޮރުން ދޮރަށް ހަރަކާތުގައި ވާހަކަދައްކަވަމުން ބޮންޑާ ވިދާޅުވީ މިހާރު ފެންނަ މަންޒަރަކީ މިހާރުގެ ރައީސް ޑރ. މުހައްމަދު މުއިއްޒު އަށް އެއްވެސް އިންތިޚާބެއް ނުނެގޭ މަންޒަރު ކަމަށެވެ.
ބޮންޑާ ވިދާޅުވީ ރައްޔިތުން މިއަދު ސަރުކާރު ހިންގާ ޕީއެންސީ އަށް އެއްވެސް އިތުބާރެއް ނުކުރާ ކަމަށާ އެ ޕާޓީގެ މެންބަރު އެއްވެސް މަގާމަކަށް ވެސް އިންތިޚާބު ކުރަން ބޭނުން ނުވާ ކަމަށެވެ. އިންސާފުވެރި އިންތިޚާބެއް ބާއްވައިފިނަމަ ލޯކަލް ކައުންސިލް އިންތިޚާބުގައި ވެސް ގިނަ ގޮނޑި ކާމިޔާބު ކުރާނީ އެމްޑީޕީ ކަމަށް ބޮންޑާ ވިދާޅުވި އެވެ.
އަޅުގަނޑަށް ފެންނަނީ އެއްވެސް އިންތިޚާބެއް މުއިއްޒަށް ނުނެގޭތަން. މިހާރު ހަމައެކަނި އޮތް ގޮތަކީ އެމްޑީޕީ ގައި އަޅުގަނޑުމެން ކުރީއްސުރެ ހިފަހައްޓާފަ އޮތް ސަގާފަތެއް އެބައޮތް. ވައުދުތައް ވެފަ އެ ވައުދުތައް ފުއްދަން. އިތުބާރެއް އޮތީ އެމްޑީޕީ އަށް. މި ކައުންސިލް އިންތިޚާބުގައި ވެސް ގިނަ ގޮނޑިތައް ލިބޭނީ އިންތިޚާބު ކޮށްގެން ލިބޭނީ އެމްޑީޕީ އަށް. އެހެނެއް ނޫން. ވާދަ ނުކުރާ ތަންތަނުންނާ، ނުވަތަ ގަނެގެންނާ، ދައުލަތުގެ މާލިއްޔަތު ހުސްކޮށްގެން ގަނެގެންނާ އެއީ ރައްޔިތުން ތަމްސީލު ކުރަން އަންނަ ބަޔަކަށް ނުވާނެ.ރައްޔިތުންގެ މަޖިލީހުގެ މާފަންނު މެދު ދާއިރާގެ ކުރީގެ މެންބަރު އިބްރާހީމް ރަޝީދު (ބޮންޑާ)
ނަމަވެސް ދައުލަތުގެ މާލިއްޔަތު ހުސްކޮށްގެން ބައެއް ދާއިރާތަކުގެ ގޮނޑި ގަނެގެން އެ ދާއިރާތަކުގެ ގޮނޑި ޕީއެންސީ އަށް ކާމިޔާބު ކުރެވިދާނެ ކަމަށާ ނަމަވެސް އެ މެންބަރުންނަކީ ރައްޔިތުން ތަމްސީލު ކުރަން އަންނަ މެންބަރުން ނޫން ކަމަށް ބޮންޑާ ވިދާޅުވި އެވެ. އޭގެ ބަދަލުގައި އެއީ ސަރުކާރު ތަމްސީލުކުރަން އަންނަ ބައެއް ކަމަށް ވެސް ބޮންޑާ ވިދާޅުވި އެވެ.
ބޮންޑާ ވިދާޅުވީ ކުރިއަށް އޮތް ކައުންސިލް އިންތިޚާބާ އަންހެނުންގެ ތަރައްގީ އަށް މަސައްކަތް ކުރާ ކޮމިޓީތަކުގެ އިންތިޚާބަކީ މުހިއްމު އިންތިޚާބެއް ކަމަށެވެ. އަދި މިކަން ދިވެހި ރައްޔިތުން ވެސް ގަބޫލު ކުރާ ކަމަށާ އެކަމާ މެދު ރައްޔިތުން ވެސް ވިސްނާ ކަމަށް ބޮންޑާ ވިދާޅުވި އެވެ.
ބޮންޑާ ވިދާޅުވީ އުއްމީދަކީ ގިނަ އަދަދެއްގެ ގޮނޑި، މި އިންތިޚާބުގައި އެމްޑީޕީ އިން ކާމިޔާބު ކުރުން ކަމަށާ އެ މަންޒަރު ފެންނަ ކަމަށެވެ.
