ރައީސް ސޯލިހު ބައިވެރިވެވަޑައިގެންނެވި މާފަންނު މެދު ދާއިރާގެ ދޮރުން ދޮރަށް ހަރަކާތް ކާމިޔާބުކަމާއި އެކު ނިންމާލައިފި
ކުރިއަށް އޮތް ކައުންސިލް އިންތިޚާބާއި، ޑަބްލިޔުޑީސީ.ގެ އިންތިޚާބުގެ ކެމްޕޭނަށް އެމްޑީޕީން ކުރިއަށްގެންދާ މި ހަރަކާތުގައި އެ ޕާޓީގެ އިސް ބޭފުޅުންނާއި އާންމު މެންބަރުން ބައިވެރިވެވަޑައިގެންނެވި. މި ޒިޔާރަތްތަކުގައި ދާއިރާގެ އާންމު ރައްޔިތުންގެ ޚިޔާލު ހޯދައި، އެ މީހުންނަށް ދިމާވެފައިވާ ދަތިތަކާ ގުޅޭގޮތުން މަޝްވަރާކޮށްފައިވޭ.
އެމްޑީޕީ ދޮރުން ދޮރަށް ހަރަކާތުގެ ތެރެއިން | އެމްޑީޕީ
ކުރީގެ ރައީސް އިބްރާހިމް މުހައްމަދު ސޯލިހު ބައިވެރިވެވަޑައިގެންނެވި މާފަންނު މެދު ދާއިރާގެ ދޮރުން ދޮރަށް ހަރަކާތް ކާމިޔާބުކަމާއި އެކު ނިންމާލައިފި އެވެ.
އެމްޑީޕީ އިން ބޭއްވި އެ ހަރަކާތުގައި ބައިވެރިވެވަޑައިގެން ރާއްޖެ އެމްވީ އަށް މައުލޫމާތުދެއްވަމުން ރައީސް ސޯލިހު ވިދާޅުވީ މި ސަރުކާރުން ދަނީ ރައްޔިތުންގެ ވޯޓުލުމުގެ ހައްގުތައް ގެއްލޭ ގޮތަށް އަމަލުކުރަމުން ކަމަށެވެ. އެގޮތުން ވަޒީފާ ބަދަލުކުރުމާއި، ވަޒީފާ އިން ކަނޑާލުން ފަދަ ކަންކަން ވެސް ކުރަމުން ދަނީ އާއްމުންނަށް ފިއްތުންތައް ކުރިމަތި ކުރުވުމަށް ކަމަށް އެ މަނިކުފާނު ވިދާޅުވި އެވެ. ކޮންމެ މީހަކަށް ވެސް، އެ މީހަކު ބޭނުންވާ ސިޔާސީ ހަރަކާތްތަކުގައި ބައިވެރިވުމުގެ ފުރުސަތު އޮންނަން ވާނެ ކަމަށް އެ މަނިކުފާނު ވިދާޅުވި އެވެ.
"މިފަދަ ކޮންމެ ކަމަކީ ބިރުދެއްކުމުގެ އަމަލެއް. ކުރިން ވެސް ބޭއްވި އިންތިޚާބުތަކެއް އަޅުގަނޑުމެންގެ ވެރިކަމުގައި ވެސް. ވަޒީފާ އިން ވަކި އެއް ނުކުރޭ. ވަޒީފާ ބަދަލެއް ނުކުރޭ. މިކަންކަން ބަލާ އެމްޑީޕީގެ ވެރިކަމެއްގައި ފިޔަވަޅު އަޅާނަން." ރައީސް ސޯލިހު ވިދާޅުވި އެވެ.
އެ ހަރަކާތުގައި ވާހަކަދައްކަވަމުން މާލޭގެ މޭޔަރ އަދި އެމްޑީޕީގެ މޭޔަރ ކެނޑިޑޭޓް އާދަމް އާޒިމް ވިދާޅުވީ ދޮރުން ދޮރަށް ހަރަކާތްތަކުން ފެނިގެން ދަނީ، ހާމަވަނީ، އާއްމުން މާޔޫސްވެފައިވާ މަންޒަރު ކަމަށެވެ. ކޮންމެ ގެއަކުން ވެސް އަޑު އިވެނީ ސަރުކާރާއި މެދު ހުރި ޝަކުވާތައް ކަމަށާއި އެކަމުން ސަރުކާރާއި މެދު ރައްޔިތުންގެ ރުހުން ނެތް މިންވަރު ވަރަށް ބޮޑަށް ހާމަވާ ކަމަށް އޭނާ ވަނީ ވިދާޅުވެފަ އެވެ.
ކައުންސިލް އިންތިޚާބާއި ރިޔާސީ އިންތިޚާބާއި މަޖިލިސް އިންތިޚާބު އެއްކޮށްލުމާއި މެދު ނަގާ ފެންނަ ނުފެންނަ ވޯޓުގައި ވެސް ބޮޑުތަނުން ސަރުކާރަށް ނޫނެކޭ ބުނަން ޖެހޭ ކަމަށް އާޒިމް ވިދާޅުވި އެވެ. އެމްޑީޕީ ވެރިކަމުގައި ނެތި ރާއްޖެ އަށް، ރައްޔިތުންނަށް މަންފާކުރާނެ އެއްވެސް ކަމެއް ނުވާނެކަން އާއްމުން ގަބޫލުކުރާ ކަމަށް އާޒިމް ވިދާޅުވި އެވެ.
