ބޭނުންވަނީ ހުރިހާ އެންމެންނާ ގުޅިގެން މިހާރު މިއޮތް ސަރުކާރުން މިކުރާ ވިޔާނުދާ ކަންކަން ހުއްޓުވޭނެ ގޮތެއް ހަދަން: ކުރީގެ ރައީސް ޔާމީން

ބޭނުންވަނީ ހުރިހާ އެންމެންނާ ގުޅިގެން މިހާރު މިއޮތް ސަރުކާރުން މި ކުރަމުންދާ ވިޔާނުދާ ކަންތައްތައް ހުއްޓުވޭނެ ގޮތެއް ހަދަން ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެ އެވެ. 

މާލެ ސިޓިގެ މޭޔަރު ކަމަށް ވާދަކުރައްވާ އިސްމާއިލް ޒަރިޔަންދުގެ ކެމްޕެއިން ހަރަކާތެއްގައި ވާހަކަދައްކަވަމުން ޔާމީން ވިދާޅުވީ ސިޔާސީ ގޮތުން ފިކުރު ދިމާނުވާ ބޭފުޅުންނާއެކު ވެސް މިއަދު މަސައްކަތް ކުރަން ޖެހިފައިވާ ކަމަށެވެ. 

އިތުރަށް ވިދާޅުވީ މި ވެރިކަމުގައި ފާއިތުވާ ކޮންމެ ދުވަހަކު ރައްޔިތުންނަށް އޭގެ ސަބަބުން އެތައް ތަކުލީފެއް ޖެހޭ ކަމަށެވެ. އަދި ފާއިތުވާ ކޮންމެ ދުވަހަކީ ރައްޔިތުންގެ އޭގެ ސަބަބުން އެތައް ބައިވަރު އުނދަގޫތަކާ ގިލަންވެރިކަމެއް އުފެދޭ ދުވަސްތަކެއް ކަމަށް ވެސް ޔާމީން ވިދާޅުވި އެވެ. 

އަޅުގަނޑު ބޭނުންވޭ ހުރިހާ އެންމެންނާ ގުޅިގެންވެސް އިނގޭތޯ މިހާރު މިއޮތް ސަރުކާރުން މިކުރާ ވިޔާނުދާ ކަންތައްތައް ހުއްޓުވޭނެ ގޮތެއް ހަދަން. އެއީ ފިކުރުގެ ގޮތުން، ޕޮލިޓިކަލް އައިޑޮލޮޖީގެ ގޮތުން އަޅުގަނޑުމެން ދިމާނުވާތީ ނޫނީ އަޅުގަނޑުމެން ގަބޫލުނުކުރާ ކަންތައްތަކެއް ހުރީމައެއް ނޫން. އެކަމަކު ދެ ޝައިތާނުން ވެސް އެއްގަލަށް އަރާނެ ދެއްތޯ އެއަށްވުރެ ބޮޑު ޝައިތޯނަކު ދުއްވާލަން ވެއްޖެއްޔާ،

ކުރީގެ ރައީސް އަބްދުﷲ ޔާމީން އަބްދުލްގައްޔޫމް

ޔާމީން މިހެން ވިދާޅުވެފައި ވާއިރު މީގެ ކުރިން ބޭއްވި ބައްދަލުވުމެއްގައި އިދިކޮޅު އެމްޑީޕީ އިން ވެސް ވަނީ ޔާމީން އާ ގުޅިގެން މަސައްކަތް ކުރެވޭނެ ކަމަށް ބުނެފަ އެވެ. 

މި ސަރުކާރު ޖަވާބުދާރީ ކުރުމުގެ މަސައްކަތް އެކުގައި ކުރުމަށްޓަކައި ކުރީގެ ރައީސް ޔާމީންއާ މަޝްވަރާ ކުރާނެ ކަމަށް ކުރީގެ ދެ ރައީސުން ކަމުގައިވާ، އިބްރާހިމް މުހައްމަދު ސޯލިހު އާއި މުހައްމަދު ނަޝީދު މިދިޔަ ޑިސެމްބަރު މަހު ނޫސްވެރިންނާ ބައްދަލުކުރައްވައި ވިދާޅުވި އެވެ. 

އެގޮތުން އެ ޕާޓީ އިން ބޭއްވި ނޫސްވެރިންގެ ބައްދަލުވުމެއްގައި ވާހަކަދައްކަވަމުން ކުރީގެ ރައީސް މުހައްމަދު ނަޝީދު އަދި ކުރީގެ ރައީސް އިބްރާހިމް މުހައްމަދު ސޯލިހު ވިދާޅުވީ ކުރީގައި ރައީސްކަން ކުރައްވައިފައި ތިއްބެވި ބޭފުޅުންނާ އެކު މި ސަރުކާރު ޖަވާބުދާރީ ކުރުވަން މަސައްކަތް ކުރެވޭނެ ކަމަށެވެ. 

އެހެންކަމުން އެގޮތުގެ މަތިން މަސައްކަތް ކުރައްވާނެ ކަމަށް ދެ ބޭފުޅުން ވިދާޅުވި އެވެ. އަދި އެކަން ކުރެވޭނެ މަގު ހޯއްދަވާނެ ކަމަށް ވެސް ވިދާޅުވި އެވެ.