"ޕަރީ - ޗެޕްޓަރ 2" ގެ ރަސްމީ ޕޯސްޓަރު ކުޅުދުއްފުށި ސިޓީގައި ކުލަގަދަކޮށް ރިލީޒްކޮށްފި
އަލީ ސީޒަންގެ "ޕަރީ - ޗެޕްޓަރ 2" ގެ ރަސްމީ ޕޯސްޓަރު ކުޅުދުއްފުށި ސިޓީގައި މިއަދު ލޯންޗްކޮށްފިއެވެ. ކުޅުދުއްފުށީގެ ރައްޔިތުން ފިލްމީ ދާއިރާއަށް ދޭ ތަރުހީބު ފާހަގަކުރުމުގެ ގޮތުން ބޭއްވި މި ހަރަކާތް ޝަރަފްވެރިކޮށްދެއްވީ އެ ސިޓީގެ ޑެޕިއުޓީ މޭޔަރު އަޙުމަދު އަބްދުالله އެވެ. ބެލުންތެރިންގެ ބޮޑު މަޤްބޫލުކަމެއް ހޯދި މި ސިލްސިލާގެ ފުރަތަމަ ބަޔަށްފަހު، ދެވަނަ ބައިގެ ޕޯސްޓަރު އާންމުކުރުމާއެކު ގިނަ ބަޔަކު މިހާރު އިންތިޒާރު ކުރަމުންދަނީ މި ފިލްމު ސިނަމާތަކަށް އަންނާނެ ދުވަހަކަށެވެ.
ޕަރީ ޗެޕްޓަރ 2 ގެ ޕޯސްޓަރު ކުޅުދުއްފުށި ސިޓީގައި ރިލީޒްކުރުމަށް ބޭއްވި ރަސްމިއްޔާތުގެ ތެރެއިން. | ރާއްޖެ އެމްވީ
ދިވެހި ފިލްމީ ދާއިރާގައި ބޮޑު މަޤްބޫލުކަމެއް ހޯދާފައިވާ މަޝްހޫރު ފަންނާނު އަލީ ސީޒަންގެ "ސީޒަން އަލީ ޕްރޮޑަކްޝަން" އިން އުފައްދާ ފިލްމު "ޕަރީ - ޗެޕްޓަރ 2" ގެ ރަސްމީ ޕޯސްޓަރު މިއަދު ކުޅުދުއްފުށި ސިޓީގައި ރިލީޒްކޮށްފިއެވެ.
މިއަދު ހަވީރު 16:30 ގައި ކުޅުދުއްފުށި ސިޓީގެ ރަށްމަތިފަންނު ސަރަހައްދުގެ ބްރީޒް ބަރ ކުރިމަތީގައި ބޭއްވި މި ޚާއްޞަ ހަރަކާތް ޝަރަފްވެރިކޮށްދެއްވީ އެ ސިޓީގެ ޑެޕިއުޓީ މޭޔަރު އަޙުމަދު އަބްދުالله (ރޯޒޭ) އެވެ. މި ރަސްމިއްޔާތުގައި ފިލްމުގެ ޑައިރެކްޓަރު އަދި ބަތަލު އަލީ ސީޒަން އާއި އައިޝަތު ރިޝްމީ ވެސް ވަނީ ބައިވެރިވެފައެވެ.
މި ފިލްމުގެ ޕޯސްޓަރު ލޯންޗްކުރުމުގެ ރަސްމިއްޔާތު ކުޅުދުއްފުށި ސިޓީގައި ބޭއްވުމާ ގުޅޭގޮތުން "ރާއްޖެ އެމްވީ" އަށް މަޢުލޫމާތު ދެމުން އަލީ ސީޒަން ބުނީ، މާލެ ފިޔަވައި ރާއްޖޭގައި ފިލްމު ބެލުމަށް އެންމެ ބޮޑު ތަރުހީބެއް އޮންނަ އެއް ރަށަކީ ކުޅުދުއްފުށި ސިޓީ ކަމަށެވެ. އެހެންކަމުން، އެ ސިޓީގެ ރައްޔިތުން ފިލްމީ ދާއިރާއަށް ބަހައްޓާ ގާތްކަމާއި ދޭ ސަމާލުކަން ފާހަގަކޮށް، އެކަމުގެ އުފަލުގައި މި ޚާއްޞަ ފުރުޞަތު އެ ސިޓީއަށް ދިނުމަށް ނިންމީ ކަމަށް ސީޒަން ބުންޏެވެ.
މި ސިލްސިލާގެ ފުރަތަމަ ފިލްމު "ޕަރީ - ޗެޕްޓަރ 1" އަކީ ބެލުންތެރިންގެ މެދުގައި ވަރަށް ބޮޑު މަޤްބޫލުކަމެއް ހޯދި ފިލްމެކެވެ. އަހުމަދު އަހުސަން އާއި އަލީ ސީޒަން ޕްރޮޑިއުސްކުރި އެ ފިލްމުގެ 99 އިންސައްތަ މަންޒަރުތައް ޝޫޓްކޮށްފައިވަނީ އަވަށްޓެރި ސްރީލަންކާގައެވެ.
"ޕަރީ" ގެ ފުރަތަމަ ބައިގައި ދިވެހި ސިނަމާގެ ފުންނާބު އުސް ތަރިން ކަމަށްވާ އަލީ ސީޒަން، ރިޝްމީ ރަމީޒް، ޝީލާ ނަޖީބް، ޖުމައްޔިލް ނިމާލް، އަދި މުހައްމަދު ނައުޝާދު އަލީ ފަދަ ދިވެހި ސިނަމާގެ ތަރިން ހިމެނެއެވެ.
މީގެ އިތުރުން ލަންކާގެ ބައެއް މަޝްހޫރު ފިލްމީ ތަރިންވެސް އެ ފިލްމުން ފެނިގެން ގޮސްފައިވާއިރު، ކޮންމެ އެކްޓަރަކުވެސް ވަނީ ފާހަގަކޮށްލެވޭ ފަދަ ތަފާތު މޮޅު ހުނަރެއް ދައްކުވައިދީފައެވެ.
"ޕަރީ" ގެ ފުރަތަމަ ބަޔަށް ލިބުނު ބޮޑު ތަރުހީބާއެކު، މިއަދު މި ލޯންޗްކުރެވުނު ދެވަނަ ބައިގެ ޕޯސްޓަރާއެކު ފިލްމީ ދާއިރާގައި އަނެއްކާވެސް ބޮޑު ހަލަބޮލިކަމެއް ވަނީ އުފެދިފައެވެ. ގިނަ ބަޔަކު މިހާރު އިންތިޒާރު ކުރަމުންދަނީ މި ފިލްމު ސިނަމާތަކަށް އަންނާނެ ދުވަހަކަށެވެ. އަދި މިއަދުގެ މި ހަރަކާތަކީ ކުޅުދުއްފުށި ސިޓީގެ ރައްޔިތުންނަށް ލިބިގެންދިޔަ ވަރަށް ޚާއްޞަ ހަދިޔާއެއްގެ ގޮތުގައި ފާހަގަކޮށްލެވެއެވެ.
