މަގާމުގެ ނުފޫޒު ނާޖާއިޒު ގޮތުގައި ބޭނުންކުރެއްވިކަމުގެ ތުހުމަތުގައި ހައްޔަރުކުރި ޕްރިންސް އެންޑްރޫ ދޫކޮށްލައިފި

ލަންޑަން، އިނގިރޭސިވިލާތް: އާންމު މަގާމެއްގެ ނުފޫޒު ނާޖާއިޒު ގޮތުގައި ބޭނުންކުރިކަމުގެ ސީރިއަސް ތުހުމަތުތަކެއްގައި އިނގިރޭސި ފުލުހުންގެ ބެލުމުގެ ދަށަށް ގެންދިޔަ ޝާހީ އާއިލާގެ ކުރީގެ މެމްބަރު އެންޑްރޫ މައުންޓްބެޓަން-ވިންޑްސަރ (ޕްރިންސް އެންޑްރޫ) ފުލުހުންގެ ބަންދުން ދޫކޮށްލައިފިއެވެ.

ސީއެންއެން ފަދަ ބައިނަލްއަޤްވާމީ ބޮޑެތި މީޑިއާތަކުން ރިޕޯޓުކޮށްފައިވާ ގޮތުގައި، އުމުރުން 66 އަހަރުގެ އެންޑްރޫ ދޫކޮށްލާފައިވަނީ ހައްޔަރުކުރިތާ ގާތްގަނޑަކަށް 11 ވަރަކަށް ގަޑިއިރު ފަހުންނެވެ. ތޭމްސް ވެލީ ފުލުހުންނާ ހަވާލާދީ މީޑިއާތަކުން ކަށަވަރުކޮށްދޭ ގޮތުގައި، އޭނާ ދޫކޮށްލާފައިވަނީ "އަންޑަރ އިންވެސްޓިގޭޝަން" ނުވަތަ މައްސަލައިގެ ތަހުގީގު ކުރިއަށްދާ ގޮތަށް ޝަރުތުތަކަކާއެކުގައެވެ. މީގެ މާނައަކީ އޭނާގެ މައްޗަށް އަދި ރަސްމީކޮށް ދައުވާއެއް އުފުލިފައި ނުވި ނަމަވެސް، އޭނާގެ މައްޗަށް ކުރެވޭ ތުހުމަތުތަކުން އަދި މިންޖު ނުވާ ކަމެވެ.

އިނގިރޭސިވިލާތުގެ ނޯފޯލްކްގައި ހުންނަ އެއިލްޝަމް ޕޮލިސް ސްޓޭޝަނުން ނުކުމެވަޑައިގެން އޭނާ ކާރެއްގެ ފަހަތު ސީޓުގައި ވަޑައިގަންނަވާ މަންޒަރު ފެންނަ ފޮޓޯތަކާއި ވީޑިއޯތައް މީޑިއާތަކުގައި ވަނީ އާންމުވެފައެވެ. ފުލުހުން ނެރުނު ބަޔާނެއްގައި ބުނެފައިވަނީ، މި މައްސަލައާ ގުޅިގެން ނޯފޯލްކްގައި ހުރި އޭނާއާ ގުޅުންހުރި ބައެއް ތަންތަން ބަލައި ފާސްކުރުމުގެ މަސައްކަތް މިހާރު ނިންމާލާފައިވާ ކަމަށެވެ. ނަމަވެސް އެހެނިހެން ބައެއް ތަންތަން އަދިވެސް ފާސްކުރަމުންދާ ކަމަށް މަޢުލޫމާތު ލިބެއެވެ.

އެންޑްރޫ ހައްޔަރުކޮށްފައިވަނީ އިނގިރޭސިވިލާތުގެ ވިޔަފާރީގެ މަންދޫބެއްގެ ގޮތުގައި ހުންނެވި ދުވަސްވަރު (2001 އިން 2011 އަށް)، އެމެރިކާގެ މަހުޖަނު އަދި ކުޑަކުދިންނަށް ޖިންސީ ގޯނާކުރުމުގެ ކުށް ސާބިތުވެފައިވާ ޖެފްރީ އެޕްސްޓީންއަށް ދައުލަތުގެ ސިއްރު މައުލޫމާތުތަކެއް ހިއްސާކުރި ކަމަށް ބުނާ މައްސަލައެއްގައެވެ. މިއީ އެޕްސްޓީންގެ މައްސަލައިގައި ދާދިފަހުން އެމެރިކާގެ ޖަސްޓިސް ޑިޕާޓްމަންޓުން އާންމުކުރި ލިޔެކިޔުންތަކާ ގުޅިގެން އަލަށް ފެންމަތިވި ތުހުމަތުތަކެކެވެ.

މިކަމާ ގުޅިގެން އިނގިރޭސި ރަސްގެފާނު ޗާލްސް ނެރުއްވި ހާއްސަ ބަޔާނެއްގައި ވިދާޅުވެފައިވަނީ، "ގާނޫނު އޭގެ މަގުން ހިނގަންޖެހޭނެ ކަމަށް ވަރަށް ސާފުކޮށް ދަންނަވަން" ކަމަށެވެ. އަދި ތަހުގީގު ކުރިއަށްދާ މި ދަނޑިވަޅުގައި މިކަމާ ގުޅޭގޮތުން އިތުރު އެއްޗެއް ވިދާޅުވުން ރަނގަޅު ނުވާނެ ކަމަށްވެސް އެމަނިކުފާނު ވަނީ ވިދާޅުވެފައެވެ.

މިއީ ފަހުގެ ތާރީޚެއްގައި (ގާތްގަނޑަކަށް 4 ގަރުނު ފަހުން) އިނގިރޭސި ޝާހީ އާއިލާއަށް ނިސްބަތްވާ އިސް ބޭފުޅަކު މިފަދަ ޖިނާއީ ތުހުމަތެއްގައި ހައްޔަރުކުރެވުނު ފުރަތަމަ ފަހަރެވެ. އެޕްސްޓީންގެ މައްސަލައިގައި އެންޑްރޫއަށް ކުރެވުނު ތުހުމަތުތަކާ ގުޅިގެން މީގެ ކުރިން ޝާހީ އާއިލާއިން ވަނީ އޭނާގެ ހުރިހާ ޝާހީ ލަގަބުތަކާއި އަސްކަރީ މަގާމުތައް އަތުލާފައެވެ. އަދި އޭނާ ދިރިއުޅުއްވަމުން ގެންދެވި ވިންޑްސަރ އެސްޓޭޓްގެ "ރޯޔަލް ލޮޖް" އިންވެސް އޭނާ ވަނީ ދާދި ފަހުން ބޭރުކޮށްލާފައެވެ.

އެންޑްރޫ ވަނީ އޭނާގެ މައްޗަށް ކުރެވޭ ހުރިހާ ތުހުމަތުތަކަކަށް އިންކާރުކުރައްވާފައެވެ. ނަމަވެސް، މި މައްސަލައިގެ ތަހުގީގު ފުޅާވަމުން އަންނައިރު، މިއީ އިނގިރޭސި ޝާހީ އާއިލާއަށް ކުރިމަތިވެފައިވާ ވަރަށް ބޮޑު ގޮންޖެހުމެއްކަމަށް މަސްރަހު ދިރާސާކުރާ ފަރާތްތަކުން ދަނީ ބުނަމުންނެވެ.