އެންޑްރޫގެ މައްސަލައިގައި ބޮޑު ވަޒީރު ސްޓާމާ ވިދާޅުވީ، ޤާނޫނަށް ވުރެ މަތީގައި އެއްވެސް މީހަކަށް ނުހުރެވޭނެ ކަމަށް

އިނގިރޭސިވިލާތުގެ ޤާނޫނަށް ވުރެ މަތީގައި އެއްވެސް މީހަކަށް ނުުހުރެވޭނެ ކަމަށް ވިދާޅުވެ، އެންޑްރޫ މައުންޓްބެޓަން-ވިންޑްސާގެ މައްސަލައިގައި އެ ޤައުމުގެ ބޮޑު ވަޒީރު ކިއާ ސްޓާމާ ވާހަކަ ދައްކަވައިފި އެވެ. 

ބީބީސީ އަށް ދެއްވި އިންޓަވިޔުއެއްގައި ބޮޑު ވަޒީރު ސްޓާމާ ވިދާޅުވީ، ޤާނޫނަށް ވުރެ މަތީގައި އެއްވެސް މީހަކަށް ނުހުރެވޭނެ ކަމަށާއި، އެންޑްރޫގެ މައްސަލައިގައި ވެސް އެ އުސޫލު ތަންފީޒު ކުރަން ޖެހޭނެ ކަމަށެވެ. 

އެ އިންޓަވިޔުގައި ވާހަކަ ދައްކަވަމުން ސްޓާމާ ވިދާޅުވީ، އެންޑްރޫ އަމިއްލަފުޅަށް ޕޮލިހަށް ހާޒިރުވާން ޖެހޭނެތޯ، ނުވަތަ ނޫންތޯ ނިންމާނީ ފުލުހުން ކަމަށެވެ. އެކަމަކު ޤާނޫނުގެ ކުރިމަތީގައި ހުރިހާ މީހުން ހަމަހަމަ ވާނެ ކަމަށާއި، އެއްވެސް މީހަކަށް ޤާނޫނަށް ވުރެ މަތީގައި ނުހުރެވޭނެ ކަމަށް ބޮޑު ވަޒީރު ވިދާޅުވި އެވެ. ބޮޑު ވަޒީރު ސްޓާމާ މިހެން ވިދާޅުވީއިރު، އިނގިރޭސިވިލާތުގެ ފުލުހުން ވަނީ އެންޑްރޫ ހައްޔަރު ކޮށްފަ އެވެ. 

ތެމްސް ވެލީގެ ފުލުހުން އެންޑްރޫ ހައްޔަރުކޮށް ބަންދު ކޮށްފައިވާއިރު، އޭނާގެ މައްޗަށް ކުރެވޭ ތުހުމަތަކީ އެމެރިކާގެ ޖިންސީ ކުށްވެރިޔާ ޖެފްރީ އެޕްސްޓީންއާ ގުޅުން ބާއްވައި، އަންހެނުންނާއި އަންހެން ކުދިންނަށް އަނިޔާ ކުރުމާއި، ޖިންސީ އަނިޔާ ކުރުމުގައި ބައިވެރިވެފައިވާ ކަމުގެ ތުހުމަތެވެ. އެންޑްރޫގެ މައްޗަށް ކުރެވޭ އެންމެހާ ތުހުމަތު ތަކަށް އޭނާ ވަނީ އިންކާރު ވެސް ކޮށްފަ އެވެ. 

އެންޑްރޫގެ މައްޗަށް ކުރެވޭ މި ތުހުމަތުތައް ފެންމަތިވެފައި ވަނީ އެމެރިކާގެ ޑިޕާޓްމަންޓް އޮފް ޖަސްޓިސް އިން އާންމު ކޮށްފައިވާ ލިޔުން ތަކުންނެވެ. އެ ލިޔުން ތަކުގައި ވަނީ އެންޑްރޫ އާއި އެޕްސްޓީންއާ ދެމެދު ގާތް ގުޅުމެއް އޮތް ކަމަށް ފާހަގަވެފަ އެވެ. އާންމު ކޮށްފައިވާ ފޮޓޯ ތަކުގައި އެޕްސްޓީން އާއެކު އެންޑްރޫ އުޅޭ މަންޒަރު ވެސް ފެނެ އެވެ. އެއާ އެކު، ސަރުކާރުގެ ސިއްރު ލިޔެކިޔުންތަކާއި، ވިޔަފާރީގެ މުއާމަލާތްތައް އެންޑްރޫ، އެޕްސްޓީން އަށް ފޮނުވާފައިވާ މައްސަލަ ވެސް ވަނީ ފެންމަތިވެފަ އެވެ. 

ބޮޑު ވަޒީރު ސްޓާމާގެ އިންޓަވިޔުގައި ވަނީ، އެމެރިކާގެ ކޮންގްރެސްގައި އެންޑްރޫ ހެކި ބަސް ދޭން ޖެހޭނެ ކަމަށް ވިދާޅުވެފަ އެވެ. މިއީ މި މައްސަލައިގައި މީގެ ކުރިން ވެސް ބޮޑު ވަޒީރު ވިދާޅުވަމުން އަންނަ ވާހަކަ އެކެވެ. އެންޑްރޫއާ ގުޅުން ހުރި މައުލޫމާތެއް އެއްވެސް މީހެއްގެ އަތުގައި ހުރި ނަމަ، އެ މައުލޫމާތެއް ހިއްސާ ކުރަން ޖެހޭނެ ކަމަށް ވެސް ސްޓާމާ ވަނީ ވިދާޅުވެފަ އެވެ. 

މި މައްސަލައިގައި އިނގިރޭސިވިލާތުގެ ޝާހީ އާއިލާ އިން ވެސް ވަނީ އެންޑްރޫއާ ދެކޮޅަށް ފިޔަވަޅު އަޅައިފަ އެވެ. އެގޮތުން ޝާހީ ގަނޑުވަރުން އޭނާ ބޭރުކޮށްލުމަށް ފަހު، އޭނާ އަށް ދީފައިވާ ލަޤަބު ވެސް ވަނީ އަތުލައިފަ އެވެ. މީގެ އިތުރުން ޝާހީ އާއިލާގެ ވެރިކަން ވާރުތަވާ ތަރުތީބުން، ނުވަތަ ލައިން އޮފް ސަކްސެޝަން އިން އެންޑްރޫ އުނިކުރުމަށް ޓަކައި ޚާއްޞަ ގާނޫނެއް ތައާރަފު ކުރުމަށް ސަރުކާރުން ވިސްނަމުން ދާކަމަށް ބީބީސީގައި ވަނީ ބުނެފަ އެވެ.