އެންޑްރޫ އަށް ރަސްކަމުގެ ތަޚުތަށް އިސްވުމުގެ ފުރުސަތު މުޅިން ބަންދުވާ ގާނޫނެއް ތައާރަފް ކުރަނީ

ޝާހީ އާއިލާގެ ވެރިކަން ވާރުތަވާ ތަރުތީބުން ނުވަތަ "ލައިން އޮފް ސަކްސެޝަން" އިން އެންޑްރޫ މައުންޓްބެޓަން-ވިންޑްސަރ އުނިކުރުމަށްޓަކައި ޚާއްޞަ ގާނޫނެއް ތައާރަފުކުރުމަށް ސަރުކާރުން ވިސްނަމުންދާކަން ބީބީސީ އިން ރިޕޯޓް ކޮށްފި އެވެ.

މި ފިޔަވަޅަކީ ފުލުހުން ކުރިއަށްގެންދާ ތަހުގީގުތައް ނިމުމުން އަޅާނެ ފިޔަވަޅެއް ކަމަށާއި، މި ބަދަލާއެކު އެންޑްރޫއަށް ރަސްކަމުގެ ތަޚުތަށް އިސްވުމުގެ ފުރުސަތު މުޅިން ބަންދުވެގެންދާނެ ކަމަށް ވެސް ރިޕޯޓުކޮށްފައިވެ އެވެ.

ކުޑަކުދިންނަށް ޖިންސީ ގޯނާކުރުމުގެ ކުށް ސާބިތުވެފައިވާ ޖެފްރީ އެޕްސްޓީންއާ އޮތް ގުޅުމުގެ މައްސަލައިގައި ކުރިމަތިވި ފިއްތުންތަކާ ގުޅިގެން، މިދިޔަ އޮކްޓޫބަރު މަހު "ޕްރިންސް" ނުވަތަ އަމީރުގެ ލަގަބާއެކު އެހެނިހެން ޝަރަފުވެރި ލަގަބުތައް އަތުލާފައިވީ ނަމަވެސް، ރަސްގެފާނުގެ ކޮއްކޯފުޅު އެންޑްރޫ އަދިވެސް ހުންނެވީ ތަޚުތަށް އިސްވާ ތަރުތީބުގެ އަށްވަނައިގައެވެ.

ދައުލަތުގެ މަގާމެއްގައި ހުރެ ހިންގި ނުރަނގަޅު އަމަލުތަކެއްގެ ތުހުމަތުގައި ބަންދުކުރުމަށްފަހު، 11 ގަޑިއިރު ފަހުން ބުރާސްފަތި ދުވަހުގެ ރޭ އެންޑްރޫ ވަނީ ދޫކޮށްލާފައެވެ. ނަމަވެސް އޭނާގެ މައްޗަށް ކުރެވޭ ތުހުމަތުތަކަށް އޭނާ އަދިވެސް ގެންދަވަނީ ތަކުރާރުކޮށް އިންކާރު ކުރައްވަމުންނެވެ.

ހުކުރު ދުވަހު، އެންޑްރޫ ގިނަ އަހަރުތަކެއް ވަންދެން ދިރިއުޅުއްވި 30 ކޮޓަރީގެ "ރޯޔަލް ލޮޖް" އަށް ފުލުހުންގެ އުޅަނދުތައް ވަދެ ނުކުމެ ހަދާ މަންޒަރު ވަނީ ފެނިފައެވެ.

އެއް ވަގުތެއްގައި އެ ސަރަހައްދުގައި 20 އަށްވުރެ ގިނަ އުޅަނދު ޕާކުކޮށްފައި އޮތް ނަމަވެސް، އޭގެ ތެރެއިން ތަހުގީގާއި ފާސްކުރުމުގެ މަސައްކަތުގައި ބައިވެރިވަނީ ކިތައް އުޅަނދުކަމެއް ސާފެއް ނުވެއެވެ.

އެންޑްރޫ ހައްޔަރުކުރި ތޭމްސް ވެލީ ޕޮލިހުން، އަންނަ ހޯމަ ދުވަހާ ހަމައަށް ރޯޔަލް ލޮޖް ފާސްކުރުމުގެ މަސައްކަތް ކުރިއަށް ގެންދާނެ ކަމަށް ބެލެވޭ ކަމަށް ބީބީސީން ރިޕޯޓުކުރެއެވެ.

ސަރުކާރުން މިފަދަ ގާނޫނެއް ގެނައުމަށް ހުށަހަޅާފައިވަނީ ލިބަރަލް ޑިމޮކްރެޓްސް އަދި އެސް.އެން.ޕީ ފަދަ ބައެއް ސިޔާސީ ޕާޓީތަކުގެ މެންބަރުން އެކަމަށް ތާއީދުކުރާކަން ހާމަކުރުމާ ގުޅިގެންނެވެ.

ނަމަވެސް، ޝާހީ އާއިލާއަށް ފާޑުކިޔާ ލޭބަރ ޕާޓީގެ ބައެއް މެންބަރުން ބީބީސީއަށް ބުނެފައިވަނީ، ކުރީގެ ޑިއުކް އޮފް ޔޯކް (އެންޑްރޫ) ތަޚުތާ އަރާ ހަމަވުމަކީ ވަރަށް ނާދިރު ކަމަކަށްވާތީ، މިފަދަ ގާނޫނެއް ގެނައުމުގެ މުހިންމުކަމާ މެދު ސުވާލު އުފެދޭ ކަމަށެވެ.

މިދިޔަ އޮކްޓޫބަރު މަހު ޑައުނިންގް ސްޓްރީޓުން ބުނެފައިވަނީ ތަރުތީބަށް ބަދަލު ގެނައުމުގެ އެއްވެސް ވިސްނުމެއް ނެތް ކަމަށެވެ. މިފަދަ ބަދަލެއް ގެނައުމަށްޓަކައި ޕާލަމެންޓުގެ ދެ މަޖިލީހުން ފާސްކުރާ ގާނޫނެއް ބޭނުންވާނެއެވެ. އަދި ޗާލްސް ރަސްގެފާނަކީ ދައުލަތުގެ އެންމެ އިސްވެރިޔާ ކަމަށް ބަލާ ކޮމަންވެލްތުގެ ހުރިހާ ގައުމެއްގެ ތާއީދުވެސް މިކަމަށް ބޭނުންވާނެއެވެ.

އެންމެ ފަހުން ޕާލަމެންޓުގެ ގާނޫނަކުން ތަޚުތުގެ ތަރުތީބަށް ބަދަލެއް ގެނައީ 2013 ވަނަ އަހަރުއެވެ. އެއީ ކެތޮލިކް ދީނުގެ މީހުންނާ ކައިވެނިކުރުމުގެ ސަބަބުން ތަރުތީބުން އުނިކޮށްފައިވާ ފަރާތްތަކަށް އަލުން އެ ފުރުސަތު ދިނުމަށެވެ.

ގާނޫނެއްގެ ދަށުން މީހަކު ތަރުތީބުން އުނިކުރި އެންމެ ފަހު ފަހަރަކީ 1936 ވަނަ އަހަރެވެ. އެއީ އެޑްވަރޑް އަށްވަނަ ރަސްކަން ދޫކޮށްލެއްވުމާ ގުޅިގެން، އޭނާއާއި އޭނާގެ ދަރިފަސްކޮޅު ތަރުތީބުން އުނިކުރި ފަހަރެވެ.

ލިބަރަލް ޑިމޮކްރެޓްސްގެ ލީޑަރު ސަރ އެޑް ޑޭވީ ވިދާޅުވީ، ފުލުހުންގެ މަސައްކަތަށް އެއްވެސް ނުފޫޒެއް ނެތި، މިނިވަންކަމާއެކު އެ މަސައްކަތް ކުރުމުގެ ފުރުސަތު ދޭންޖެހޭނެ ކަމަށެވެ.

އޭނާ އިތުރަށް ވިދާޅުވީ، މިއީ އެކަށީގެންވާ ވަގުތު ޖެހުމުން ޕާލަމެންޓުން ވިސްނަންޖެހޭނެ ކަމެއް ކަމަށާއި، އެންޑްރޫއަށް ދުވަހަކުވެސް ރަސްކަމަށް ނާދެވޭނެކަން ކަށަވަރުކުރުމަށް ޝާހީ އާއިލާއިން ބޭނުންވާނެ ކަމީ ޝައްކެއް އޮތް ކަމެއް ނޫން ކަމަށެވެ.

އެސް.އެން.ޕީގެ ވެސްޓްމިންސްޓަރ ލީޑަރު ސްޓީވަން ފްލިން ވިދާޅުވި ގޮތުގައި، ގާނޫނެއް ބޭނުންވާ ނަމަ އެންޑްރޫ ތަރުތީބުން އުނިކުރުމަށް އެ ޕާޓީން ތާއީދުކުރާނެއެވެ. ޔޯކް ސެންޓްރަލް ދާއިރާގެ ލޭބަރ މެންބަރު ރޭޗަލް މަސްކެލް ވެސް ވަނީ މިކަމަށް ތާއީދުކުރައްވާފައެވެ.

އޭނާ ވިދާޅުވީ، ތަޚުތުގެ ތަރުތީބުންނާއި "ކައުންސެލަރ އޮފް ސްޓޭޓް" ގެ މަގާމުން އެންޑްރޫ ވަކިކުރުމަށް ގެންނަ ގާނޫނަށް ތާއީދުކުރައްވާނެ ކަމަށެވެ.

"ކައުންސެލަރ އޮފް ސްޓޭޓް" އަކީ ރަސްގެފާނު އާލާސްކަންފުޅާ އުޅުއްވާ ވަގުތުތަކުގައި ނުވަތަ ގައުމުން ބޭރުގައި އުޅުއްވާ ވަގުތުތަކުގައި ރަސްގެފާނުގެ މަސްއޫލިއްޔަތުތަކާ ހަވާލުވާ ފަރާތްތަކެވެ. އާންމު އުސޫލުން މި މަގާމަށް އައްޔަންކުރަނީ ޝާހީ އާއިލާގެ ރަސްމީ މަސައްކަތްތަކުގައި އުޅުއްވާ ބޭފުޅުންނެވެ.

ހައުސް އޮފް ކޮމަންސްގެ ލައިބްރަރީން ބުނާ ގޮތުގައި، ތަޚުތުގެ ތަރުތީބުން އެންޑްރޫ އުނިކޮށްފި ނަމަ، އޭނާއަށް އެ މަގާމުވެސް ގެއްލޭނެއެވެ.

އެޕްސްޓީންއާ އޮތް ގުޅުމާ ގުޅޭގޮތުން ބީބީސީގެ ނިއުސްނައިޓް ޕްރޮގްރާމަށް ދިން އިންޓަވިއުއަކަށްފަހު އާންމުންގެ ނުރުހުން އަމާޒުވުމުން، 2019 ވަނަ އަހަރު އެންޑްރޫ ވަނީ ޝާހީ ރަސްމީ ޒިންމާތަކުން ދުރުވެވަޑައިގެންފައެވެ.