ޕެންޓަގަން އާއި ޖަސްޓިސް ޑިޕާޓްމަންޓުގެ ބޮޑު އިމާރާތެއް އެޕްސްޓީން އަށް ވިއްކާލަން ހުށަހެޅި

އެމެރިކާގެ ޖަސްޓިސް ޑިޕާޓްމަންޓުން އާންމުކުރި ފައިލްތަކުން ހާމަވާގޮތުގައި، ކުޑަކުދިންނަށް ޖިންސީ ގޯނާކުރިކަމުގެ ކުށް ސާބިތުވެފައިވާ އަދި މިހާރު މަރުވެފައިވާ ޖެފްރީ އެޕްސްޓީންއަށް، 2016 ވަނަ އަހަރު އެމެރިކާގެ ޑިފެންސް ޑިޕާޓްމަންޓާ ގުޅުންހުރި ބޮޑު އިމާރާތެއް ގަތުމުގެ ފުރުސަތު ހުށަހަޅާފައިވާ ކަމަށް އިނގިރޭސިވިލާތުގެ އައިޓީވީ ނިއުސްއިން ރިޕޯޓްކޮށްފިއެވެ.

ވާޖިނިއާގެ އާލިންގްޓަންގައި، ޕެންޓަގަންއާ ގާތްގަނޑަކަށް 1.6 ކިލޯމީޓަރު ދުރުގައި ހުންނަ 84,710 އަކަމީޓަރުގެ މި ބޮޑު އިމާރާތަކީ، އިންވެސްޓަރުންނަށް ތައްޔާރުކޮށްފައިވާ ލިޔެކިޔުންތަކުގައި ބަޔާންކޮށްފައިވާ ގޮތުގައި "މިޝަން-ކްރިޓިކަލް" ނުވަތަ ނުހަނު މުހިންމު ތަނެކެވެ. އަދި މިއީ ޕެންޓަގަން ފިޔަވައި، ޑިފެންސް ޑިޕާޓްމަންޓުގެ ޖާގައާއި އިންފްރާސްޓްރަކްޗާގެ ބޭނުންތައް ފުއްދައިދެވޭނެ އާލިންގްޓަންގައި ހުރި ހަމައެކަނި ބިނާގެ ގޮތުގައިވެސް ވަނީ ސިފަކޮށްފައެވެ.

މި އިމާރާތް ވިއްކުމަށް ހުށަހަޅާފައިވާ އަގަކީ ގާތްގަނޑަކަށް 116 މިލިއަން ޑޮލަރެވެ. މި މުއާމަލާތް ހަމަޖެހިފައިވާ ގޮތުން، އެޕްސްޓީންއަކީ އެ އިމާރާތުގެ އެއް ހިއްސާދާރަކަށް ވުމުގެ އިތުރުން، އަމަލީ ގޮތުން އެމެރިކާ ސަރުކާރުގެ ލޭންޑްލޯޑް އަކަށް ވުމުގެ ފުރުސަތު އޮތެވެ.

މި މުއާމަލާތް ނިމުމަކަށް އައިސް ކުރިއަށްދިޔަކަމުގެ އެއްވެސް ހެއްކެއް ފެންނާކަށް ނެތެވެ. ނަމަވެސް، ޖިންސީ ކުށްވެރިއެއްގެ ގޮތުގައި ކަނޑައެޅިފައިވާ މީހަކު، ޕެންޓަގަންއަށް ޚިދުމަތްދޭ މުހިންމު ބިނާއެއްގެ ހިއްސާ ހޯދުމަށް މަސައްކަތްކޮށްފައިވުމަކީ ސަލާމަތީ ގޮތުން ސީރިއަސް ސުވާލުތަކެއް އުފެދޭ ކަމެކެވެ.

ވޭތުވެދިޔަ މަހު އާންމުކުރި މިލިއަނަކަށްވުރެ ގިނަ އީމެއިލްތަކުގެ ތެރޭގައި ހިމެނޭ އެފްބީއައިގެ އިންފޯމަންޓަކު ލިޔެފައިވާ މެމޯއެއްގައި ބުނެފައިވަނީ، އެޕްސްޓީންއަކީ އިޒްރޭލަށް މަސައްކަތްކޮށްދޭ "މޮސާޑް އެޖެންޓެއް" ކަމަށެވެ.

އެ މެމޯގައި އިތުރަށް ބަޔާންކޮށްފައިވާ ގޮތުގައި، އެޕްސްޓީންއަކީ އިޒްރޭލުގެ ކުރީގެ ބޮޑުވަޒީރު އިހޫދު ބަރާކްއާ ގާތް ގުޅުމެއް އޮތް މީހެއް ކަމަށާއި، އޭނާ ޖާސޫސެއްގެ ގޮތުގައި ތަމްރީނުވީވެސް ބަރާކްގެ ދަށުން ކަމުގައެވެ.

އެޕްސްޓީން ވަނީ އިޒްރޭލުގެ ކުރީގެ ބޮޑުވަޒީރު އަދި އަސްކަރީ ޖާސޫސީ އިދާރާގެ އިސްވެރިއެއްގެ ގޮތުގައި ކުރިން މަސައްކަތްކުރެއްވި އިހޫދު ބަރާކްއާ އެކު ދިހަ އަހަރަށްވުރެ ގިނަ ދުވަހު ގާތް ގުޅުމެއް ބާއްވާފައެވެ. އަދި 2013 އާއި 2017 އާ ދެމެދު ބަރާކް ވަނީ ނިއުޔޯކްގައި ހުންނަ އެޕްސްޓީންގެ ގެއަށް 30 އަށްވުރެ ގިނަ ފަހަރު ޒިޔާރަތްކުރައްވާފައެވެ.

މި ލިޔެކިޔުންތައް އާންމުވުމާ ގުޅިގެން، އެޕްސްޓީންއާއި އިޒްރޭލާ ދެމެދު އޮތް ގުޅުމަށް މިވަނީ ވަރަށް ބޮޑަށް ސަމާލުކަން ހުއްޓިފައެވެ. ބަރާކް ފަދަ ދުނިޔޭގެ ނުފޫޒުގަދަ ފަރާތްތަކާ އޮތް ގުޅުމުގެ އިތުރުން، އިޒްރޭލުގެ އަސްކަރިއްޔާއަށް އެހީތެރިވާ ޖަމިއްޔާތަކަށާއި، ޔަހޫދީ ވަޒަންވެރިންގެ ޖަމިއްޔާއެއް ކަމަށްވާ ޖޫވިޝް ނޭޝަނަލް ފަންޑަށް އެޕްސްޓީން މާލީ އެހީތެރިކަން ފޯރުކޮށްދީފައިވާކަން މި ފައިލްތަކުން ހާމަވެއެވެ. އަދި އިޒްރޭލުގެ ޚާރިޖީ ޖާސޫސީ އިދާރާ، މޮސާޑާ އޭނާއާ އޮތް ގުޅުންވެސް މި ލިޔެކިޔުންތަކުގައި ފާހަގަކޮށްފައިވެއެވެ.

ޕެންޓަގަންއާ ގުޅުންހުރި މި ހުށަހެޅުން ހިމެނެނީ އަލަށް އާންމުކުރި ފައިލްތަކުގައި ހިމެނޭ ތިން ލިޔުމެއްގެ މައްޗަށެވެ. އެއީ އީމެއިލަކާއި، އިންވެސްޓަރުންނަށް ތައްޔާރުކުރި ޕްރެޒެންޓޭޝަނަކާއި، އަދި މުއާމަލާތުގެ ޚުލާސާއެކެވެ.

އަމިއްލަ އަށް އެޕްސްޓީންގެ ވަރަށް ގާތް މީހެއްގެ ގޮތުގައި ސިފަކުރާ ވިޔަފާވެރިޔާ ޑޭވިޑް ސްޓާން ވަނީ މި ހުށަހެޅުން އެޕްސްޓީންއަށް ފޮނުވާފައެވެ. ސްޓާންއަކީ އެޕްސްޓީންގެ ފައިލްތަކުން ހާމަވި މައުލޫމާތުތަކާ ގުޅިގެން، "ދައުލަތުގެ މަގާމެއްގައި ހުރެ ހިންގި ނޭދެވޭ އަމަލުތަކެއްގެ ތުހުމަތުގައި" މިދިޔަ ބުރާސްފަތި ދުވަހު ހައްޔަރުކުރި އެންޑްރޫ މައުންޓްބެޓަން-ވިންޑްސާގެ ގާތް އެހީތެރިއެއްގެ ގޮތުގައިވެސް މަސައްކަތްކުރި މީހެކެވެ.

ޕެންޓަގަން ސަރަހައްދުގެ މި ހުށަހެޅުން ސްޓާން ފޮނުވި އަހަރު، އޭނާ ވަނީ ވިންޑްސާ ކާސަލްގެ ސެއިންޓް ޖޯޖް ހައުސް ޓްރަސްޓްގެ ޑައިރެކްޓަރުކަން ހޯދައި، ސެއިންޓް ޖޭމްސް ޕެލަސްގައި ބޭއްވި ހަފްލާއެއްގައި އޭރުގެ ރާނީ އެލިޒަބަތު ދެވަނައިގެ އަރިހުގައި ހުރުމުގެ ޖާގަ ހޯދާފަ އެވެ.

މީގެ އިތުރުން، 2015 ވަނަ އަހަރު ސްޓާން ވަނީ ރިޗްމަންޑާއި ބޯލްޓިމޯގައި ހުންނަ އެފްބީއައިގެ ދެ އޮފީހަކާއި ކޯޓު އިމާރާތްތަކަކަށް އިންވެސްޓްކުރުމުގެ ވަކި ހުށަހެޅުމެއްވެސް އެޕްސްޓީންއަށް ފޮނުވާފައެވެ. "ސެކްސީ އެސެޓްސް" ނުވަތަ ނުހަނު ފައިދާހުރި މުދަލުގެ ގޮތުގައި ސިފަކޮށްފައިވާ މި މުއާމަލާތަށް ފުރަތަމަ 25 މިލިއަން ޑޮލަރު ބޭނުންވާއިރު، އޭގެ ފަހުން އިތުރު 80 މިލިއަން ޑޮލަރު ބޭނުންވާ ކަމަށް ބުނެފައިވެ އެވެ. މި މުއާމަލާތުގެ މިލްކުވެރިކަން ހަމަޖައްސަން އޮތީ ކޭމަން އައިލެންޑްސްގެ އޮފްޝޯ ކުންފުންޏެއް މެދުވެރިކޮށެވެ.