މަގާމުގެ ނުފޫޒު ބޭނުންކުރި ކަމުގެ ތުހުމަތުގައި ކުރީގެ ޕްރިންސް އެންޑްރޫ ހައްޔަރުކޮށްފި
19 ފެބުރުއަރީ 2026 | ބުރާސްފަތި 12:37ދައުލަތުގެ މަގާމެއްގައި ހުރެ ނަހަމަ ގޮތުގައި ބާރުގެ ބޭނުންކުރި ކަމުގެ ތުހުމަތުގައި، ނޯފޯކަށް ނިސްބަތްވާ އުމުރުން 60 އަހަރުގެ ފިރިހެނަކު ތޭމްސް ވެލީ ޕޮލިހުން ވަނީ ހައްޔަރުކޮށްފައިވާ ކަމަށް ފުލުހުން ބުނެފައިވޭ. މި މައްސަލައިގެ ތަހުގީގަށް ބައެއް ތަންތަން ބަލައި ފާސްކުރަމުންދާއިރު، މިއީ އާންމުންގެ ބޮޑު ޝައުގުވެރިކަމެއް އޮތް މައްސަލައަކަށް ވާތީ މައުލޫމާތު ހާމަ ކުރަމުންދާނެ ކަމަށް ބުނި ނަމަވެސް ހައްޔަރު ކުރި މީހާގެ ނަން އިނގިރޭސި ފުލުހުން ހާމަ ކޮށްފަ އެއް ނުވޭ. މި ތުހުމަތުތަކަށް އެންޑްރޫ މައުންޓްބެޓަން ވިންޑްސަރ ވަނީ ތަކުރާރުކޮށް އިންކާރު ކުރައްވާފައި.
އެޕްސްޓީންގެ މައްސަލައާ ގުޅޭ ލިޔެކިޔުންތައް އާންމުވުމާ ގުޅިގެން، އިނގިރޭސިވިލާތުގެ ކުރީގެ ޕްރިންސް އެންޑްރޫ (ވ) ހައްޔަރުކޮށްފި. | އެކްސް
ދައުލަތުގެ މަގާމެއްގައި ހުރެ ނަހަމަ ގޮތުގައި ބާރުގެ ބޭނުންކުރި ކަމުގެ ތުހުމަތުގައި، އެންޑްރޫ މައުންޓްބެޓަން ވިންޑްސަރ ބުރާސްފަތި ދުވަހު ހައްޔަރުކޮށްފި އެވެ.
އެންޑްރޫ ހައްޔަރު ކުރުމާ ގުޅިގެން ތޭމްސް ވެލީ ޕޮލިހުން ވަނީ ބަޔާނެއް ނެރެފަ އެވެ.
ކުރީގެ ޕްރިންސް އެންޑްރޫ ވަނީ އޭނާގެ މައްޗަށް ކުރެވޭ ހުރިހާ ތުހުމަތުތަކަކަށް ތަކުރާރުކޮށް އަދި ވަރަށް ބޮޑަށް އިންކާރު ކުރައްވާފަ އެވެ.
ފުލުހުން ނެރުނު ބަޔާނުގައި ބުނެފައި ވަނީ މައްސަލައިގެ ތަހުގީގުގެ ތެރެއިން، ދައުލަތުގެ މަގާމެއްގައި ހުރެ ނަހަމަ ގޮތުގައި ބާރުގެ ބޭނުންކުރި ކަމުގެ ތުހުމަތުގައި ނޯފޯކަށް ނިސްބަތްވާ އުމުރުން 60 އަހަރުގެ ފިރިހެނަކު މިއަދު (19 ފެބްރުއަރީ ގައި) ވަނީ ހައްޔަރުކޮށްފަ އެވެ. އަދި ބާކްޝަޔަރ އާއި ނޯފޯކްގައި ހުރި ބައެއް ތަންތަން ބަލައި ފާސްކުރުމުގެ މަސައްކަތް މިހާރު ދަނީ ކުރަމުން ކަމަށް ވެސް ބުނެފައިވެ އެވެ.
ހައްޔަރުކުރެވުނު މީހާ މިވަގުތު ހުރީ ފުލުހުންގެ ބަންދުގައި ކަމަށް ވެސް އިނގިރޭސި ފުލުހުންގެ ބަޔާނުގައިވެ އެވެ.
"ގައުމީ މިންގަނޑުތަކާ އެއްގޮތްވާ ގޮތުގެ މަތިން، ހައްޔަރުކުރި މީހާގެ ނަމެއް ފުލުހުން ހާމައެއް ނުކުރާނެ،" ކަމަށް ވެސް ބުނެފައިވެ އެވެ.
އެސިސްޓަންޓް ޗީފް ކޮންސްޓަބަލް އޮލިވަރ ރައިޓް ވިދާޅުވީ: 'މި މައްސަލަ ފުރިހަމައަށް ވަޒަންކުރުމަށްފަހު، ދައުލަތުގެ މަގާމެއްގައި ހުރެ ނަހަމަ ގޮތުގައި ބާރުގެ ބޭނުންކުރި ކަމަށް ކުރެވޭ ތުހުމަތުގެ ތަހުގީގު މިހާރު ވަނީ ފަށާފަ އެވެ.
މި މައްސަލައަށް އާންމުންގެ ބޮޑު ޝައުގުވެރިކަމެއް އޮތްކަން ގަބޫލުކުރާ ކަމަށާއި، އަދި އެކަށީގެންވާ ވަގުތުތަކުގައި މައްސަލައިގެ އެންމެ ފަހުގެ މައުލޫމާތުތައް ހިއްސާކުރަމުންދާނެ ކަމަށް ވެސް ފުލުުހުންގެ ބަޔާނުގައި ވެ އެވެ.
މަސްދަރު: ބީބީސީ
