މިސަރުކާރުން ވަކި މުއްދަތަކަށް ވެރިކަން ކުރެވޭނެ ގޮތަށް އޮތް އޮތުން ވެސް އުވާލާނެ: ފައިސަލް
14 ފެބުރުއަރީ 2026 | ހޮނިހިރު 10:43ހަރަދު ކުޑަކުރުމުގެ ނަމުގައި ގެންނަ މި ބަދަލުތަކުގެ ސަބަބުން ދާއިމަށް ވެރިކަމުގައި ހުރެވޭ ގޮތަށް ނިޒާމު ބަދަލުވެ، ސިޔާސީ ވާދަވެރިކަން ގެއްލިގެންދާނެ ކަމަށް. މީގެ އިތުރުން، ސަރުކާރުން ވަޒީފާތައް ބަހަމުންދާ ގޮތަށް ފާޑުވިދާޅުވެ، ގައުމުގެ މުސްތަގުބަލަށްޓަކައި ކުރިއަށް އޮތް ކައުންސިލް އިންތިޚާބުގައި އިދިކޮޅު އެމްޑީޕީއަށް ވޯޓު ދިނުމަށް ފައިސަލް ވަނީ ގޮވާލައްވާފައި.
ހުކުރު ދުވަހުގެ ރޭ އެމްޑީޕީން ކުޑަހުވަދޫގައި ބޭއްވި ޖަލްސާގައި މިދިޔަ ސަރުކާރުގެ ނައިބު ރައީސް ފައިސަލް ނަސީމް ވާހަކަ ދައްކަވަނީ | ރާއްޖެއެމްވީ
ދެ އިންތިޚާބު އެއްކޮށްލުމަށް ކުރާ މަސައްކަތުގެ ތެރެއިން ވަކި މުއްދަތަކަށް ވެރިކަން ކުރެވޭނެ ގޮތަށް އޮތް އޮތުން ވެސް އުވާލާނެ ކަމަށް މިދިޔަ ސަރުކާރުގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ރާއްޖޭގެ ގާނޫނުއަސާސީގައިވާ ގޮތުން ރައީސަކަށް ގިނަވެގެން ވެރިކަން ކުރެވޭނީ ދެ ދައުރެވެ. ރައީސް ޑރ.މުހައްމަދު މުއިއްޒުގެ މި ސަރުކާރުން 10 ފެބްރުއަރީ 2026 ގައި ރައްޔިތުންގެ މަޖިލީހުގެ އިންތިޚާބާއި ރިޔާސީ އިންތިޚާބު އެއްކޮށްލުމަށް ސަރުކާރުން މަޖިލީހަށް ހުށަހަޅާފައިވާ ބިލު މަޖިލީހުން ވަނީ ފާސް ކޮށްފަ އެވެ. ސަރުކާރުން މިހާރު މަސައްކަތް ކުރަމުންދަނީ އެޕްރީލް މަހަށް ތާވަލް ކޮށްފައިވާ ކައުންސިލް އިންތިޚާބާއި އެކުއެކީގައި ދެ އިންތިޚާބު އެއްކޮށްލުމާއި މެދު ފެންނަ ނުފެންނަ ވޯޓު ނެގުމަށް މަގުފަހި ކުރުމަށެވެ. އިލެކްޝަންސް ކޮމިޝަނުން ވަނީ އެޕްރީލް މަހުގެ އިންތިޚާބާއި އެކު ރެފަރެންޑަމްގެ ވޯޓު ނެގޭނީ ފެބްރުއަރީ 18 ގެ ކުރިން ގާނޫނު އިސްލާހުކޮށްގެން ކަމަށް ވެސް ބުނެފަ އެވެ.
މި މަސައްކަތްތަކަށް އިޝާރާތް ކުރައްވައި، ހުކުރު ދުވަހުގެ ރޭ އެމްޑީޕީން ކުޑަހުވަދޫގައި ބޭއްވި ޖަލްސާގައި ފައިސަލް ވިދާޅުވީ ގައުމުގައި މިހާރު ކަންކަން ހިނގަމުންދާ ގޮތަށް ބަލާއިރު، މިސަރުކާރުން ދެ އިންތިޚާބު އެއްކޮށްލުމަށް ކުރާ މަސައްކަތުގެ ތެރެއިން ވަކި މުއްދަތަކަށް ވެރިކަން ކުރެވޭނެ ގޮތަށް އޮތް އޮތުން ވެސް އުވާލާނެ ކަމަށެވެ.
ދެ ވޯޓެއް އެއްކޮށްލާ ވާހަކަ ހަރަދު ކުޑަ ކުރުމަށްޓަކައި ދެވޯޓެއް އެއްކޮށްލާ ވާހަކަ އެދެކެވެނީ. ގާނޫނު ބަދަލުކޮށް މިހާރު އެވޯޓު ވެސް މިވޯޓާއެކު ތައްޔާރީތައް ވެސް ކުރިއަށް އެދަނީ. އަޅުގަނޑު ދަންނަވާނީ އަދި އެހާ ވަރުންދާ ކަމަށްވަންޏާ ގަބޫލު ކުރައްވާ އެގޮތަށް އެ ބަދަލު ގެންނަ ކަމަށްވަންޏާ މިހާރު ގާނޫނު އަސާސީގައި ކަނޑައެޅިފައި އޮތް ޓާމް ލިމިޓްވެސް އުވާލާނެ. ވަކި މުއްދަތަކަށް ވެރިކަން ކުރެވޭނެ ގޮތަށް އޮތް އޮތުން ވެސް އުވާލާނެ. ދާއިމަށް ވެރިކަމުގައި ހުރެވޭ ގޮތަށް ބަދަލު ކޮށްލާނެ. ގަބޫލު ކުރައްވާ ވާދަވެރިކަން. ވިޔަފާރިއެއްގައި ވެސް ވާދަވެރިކަން އޮންނަން ޖެހޭ. ސިޔާސީ ގޮތުން ވެސް އިންތިޚާބުތަކުގައި ވާދަވެރިކޮށް ބައިވެރިވުމުގެ ފުރުސަތު އޮންނަންވާނެ. ރައްޔިތުންނަށް މޮޅު ގޮތަކީ އެއީ. އެންމެ މީހަކު ތާއަބަށް ވެރިކަމުގައި ހުންނަ ކަމަށްވަންޏާ ދެންވާނެ ގޮތުގެ ވާހަކަ އަޅުގަނޑުމެން ދިވެހީން ކޮންމެހެން ދައްކާނެ ކަމެއް ނެތް.މިދިޔަ ސަރުކާރުގެ ނައިބު ރައީސް ފައިސަލް ނަސީމް
މީގެއިތުރުން، ޚަރަދު ކުޑަކުރުމުގެ ނަމުގައި މި ސަރުކާރުން ކުރަމުންދާ ކަންކަމަށް އިޝާރާތް ކުރައްވައި، ފައިސަލް ވަނީ ފާޑުވިދާޅުވެފަ އެވެ.
ފައިސަލް ވިދާޅުވީ ވަޒީފާތައް ބަހަމުންދަނީ އެއްވެސް ވަރަކަށް ބެލުމެއް ނެތި ކަމަށާއި، މިއަދު މުވައްޒަފުން ކުރާނެ މަސައްކަތެއް ނެތި ޖީލެއް ކަށްނެތްވަމުންދާ ކަމަށެވެ. ދިވެހީންނަކީ އަބަދުވެސް މަސައްކަތް ކޮށްގެން އާމްދަނީ ހޯދާ ބައެއް ކަމަށާއި، މިރީތި އުސޫލު މިހާރު މުޖުތަމައުއިން ގެއްލެމުންދާ ކަމަށް އޭނާ ވިދާޅުވި އެވެ.
ފައިސަލް ވިދާޅުވީ ވަޒީފާއެއްގައި ހުރުމުން ވަކި ކަންތައްތަކެއް ކުރުމަށް މަޖުބޫރުވެ އެކަކު އަނެކަކާ ސަލާމް ކުރުމަށް ބިރު ގަންނަ ދަރަޖައަށް ގައުމުގެ ކަންކަން ދިއުމުން އެކަން ބަދަލު ކުރުމަށް ރައްޔިތުން ނުކުންނަން ޖެހޭ ކަމަށެވެ.
އެގޮތުން ގައުމުގެ މުސްތަގުބަލަށްޓަކައި ކުރިއަށް އޮތް ލޯކަލް ކައުންސިލް އިންތިޚާބުގައި އެމްޑީޕީގެ ކެންޑިޑޭޓުންނަށް ވޯޓު ދޭން ޖެހޭ ކަމަށް ފައިސަލް ވިދާޅުވި އެވެ. އަދި ވިދާޅުވީ ވަގުތީ ފައިދާއަށް ގޮތް ނިންމާ ހިސާބުން އިޔާދަ ނުކުރެވޭ ފަދަ ބޮޑު ގެއްލުމެއް ގައުމަށް ލިބޭނެ ކަމަށެވެ.
