ހެޔޮ ނިޔަތެއްގައި ޤާނޫނުއަސާސީ އިސްލާހު ކުރާ ނަމަ ކުރަންވީ ކަމަކީ ޖުޑީޝަލް ސަރވިސް ކޮމިޝަން މިނިވަން ވާ ގޮތަށް ޤާނޫނުއަސާސީ އިސްލާހުކުރުން: ފައިސަލް
ފުވައްމުލަކުގައި ބޭއްވި ޖަލްސާއެއްގައި ވާހަކަދައްކަވަމުން ފައިސަލް ވިދާޅުވީ، ގައުމާއި ރައްޔިތުންގެ ހައްގުގައި ވަކާލާތުކުރުމުގެ ޖާގަ މެންބަރުންނަށް ގެއްލިފައިވާ ކަމަށާއި، މިހާރު ފެންނަނީ ޖުޑީޝަރީގެ މިނިވަންކަން ވެސް ގެއްލެމުންދާ މަންޒަރު ކަމަށް. އެހެންކަމުން، ގާނޫނުއަސާސީގެ ބާރު ދަމަހައްޓައި ލާމަރުކަޒީ ނިޒާމު ނަގަހައްޓަން ކުރިއަށް އޮތް އިންތިޚާބުގައި އެމްޑީޕީއަށް ވޯޓު ދިނުމަށް އޭނާ ވަނީ ގޮވާލައްވާފަ.
މިދިޔަ ސަރުކާރުގެ ނައިބު ރައީސް ފައިސަލް ނަސީމް | ރާއްޖެއެމްވީ
ހެޔޮ ނިޔަތެއްގައި ޤާނޫނުއަސާސީ އިސްލާހު ކުރާ ނަމަ ކުރަންވީ ކަމަކީ ޖުޑީޝަލް ސަރވިސް ކޮމިޝަން މިނިވަން ވާ ގޮތަށް ޤާނޫނުއަސާސީ އިސްލާހުކުރުން ކަމަށް ކުރީގެ ނައިބު ރައީސް ފައިސަލް ނަސީމް ވިދާޅުވެއްޖެ އެވެ.
ފައިސަލް އެފަދައިން ވިދާޅުވީ އެމްޑީޕީ އިން ފުވައްމުލަކުގައި ބޭއްވި "ހޭވައްލާ ތައްޔާރު" ޖަލްސާގައި ވާހަކަދައްކަވަމުންނެވެ.
މި ސަރުކާރު ވެރިކަމަށް އައި ފަހުން ކުރާހާ ވެސް ކަމަކީ އެކި ނަންނަމުގައި ޤާނޫނުއަސާސީ ބަދަލުކުރުން ކަމަށް ފައިސަލް ވިދާޅުވި އެވެ. އަދި ޤަނޫނުއަސާސީ އިސްލާހު ކުރާ ނަމަ ރައްޔިތުންގެ އިތުބާރި ލިބޭނެ ބަދަލުތައް ގެނައުމަށް ފައިސަލް ގޮވާލެއްވި އެވެ.
އެންމެ ފުރަތަމަ ކަމަކަށް މި ސަރުކާރުން ކުރި ކަމަކީ ރައްޔިތުންގެ މަޖިލީހުގައި ތިބި ރައްޔިތުންގެ ޚާދިމުންގެ ބާރު ގެއްލުވާލާ ގޮތަށް މަގުފަހިކޮށްދޭ އިސްލާހެއް ޤާނޫނުއަސާސީ އަށް ގެނައުން ކަމަށް ފައިސަލް ވިދާޅުވި އެވެ. އެ މެމްބަރުންނަށް ސަރުކާރަށް ފާރަވެރިވެ ސަރުކާރު ޖަވާބުދާރީ ކުރުވަން ތިބި މީހުން ކަަމަށް ވީ ނަމަވެސް ގައުމާއި ރައްޔިތުންގެ ހައްގުގައި ވަކާލަތު ކުރުމުގެ ޖާގަ އެއްކޮށް ގެއްލިފައިވާ ކަމަށް ފައިސަލް ވިދާޅުވި އެވެ.
ޖުޑީޝަރީގެ މިނިވަންކަން ވެސް ގެއްލޭ ގޮތަށް މިހާރު ކަންކަން އޮތް ކަމަށް ފާހަގަކުރައްވާ ފައިސަލް ވަނީ ރައީސްގެ ބާރު ވެރިކަން ކުޑަ ވާ ގޮތަށް ޖޭއެސްސީ އެކުލަވާލައިފި ނަމަ އެ ތަނަށް ވެސް އާއްމުންގެ އިތުބާރު ލިބޭނެ ކަމަށެވެ. މިހާރު ސަރުކާރުން އަމަލުކުރަމުންދާ ގޮތުން ރައްޔިތުންގެ އިތުބާރު ސަރުކާރަށް ނެތް ކަމަށް ފައިސަލް ވިދާޅުވި އެވެ.
"ޤާނޫނުއަސާސީ އަށް ބަދަލުގެނައުން، ކޮން ބޭނުމެއްގައި ތޯ އެކަން ކުރީ މިކަމާއި ވިސްނަވާ ރައްޔިތުން. ޤާނޫނުއަސާސީ އެއް ލިބުނީ ކިހިނެތްކަން ވަރަށް ސާފު. އެއީ ބުރަ މަސައްކަތެއް. އެތައް ބަޔަކު ޖަލަށް ދާން ޖެހުނު. ވެރިކަން ހިންގުމުގެ ކުރިއަށް އަންނާނީ ޤާނޫނު ހިންގުމުގެ ބާރު. ދެން އޮތީ އަދުލު އިންސާފުގެ ބާރު." ފައިސަލް ވިދާޅުވި އެވެ.
ފައިސަލް ވިދާޅުވީ ޤާނޫނުއަސާސީގެ 230 ވަނަ މާއްދާ އިން ބާރު ލިބިގެން، ލާމަރުކަޒީ ނިޒާމް ރާއްޖެ އަށް ގެނައުމުގެ ފައިދާ ރާއްޖޭގެ ރަށްތަކަށް ފާއިތުވެ ދިޔަ އަހަރުތަކުގައި ލިބެމުން ގޮސްފައިވާ ކަމަށް ފައިސަލް ވިދާޅުވި އެވެ. ރައްޔިތުން ބޭނުންވާ ކަންކަން ކުރެވި ރައްޔިތުންނަށް ކުރިއެރުން ލިބޭނެ ޖާގަ ވަރަށް ބޮޑަށް ލިބިގެން ދިޔަ ކަމަށް ފައިސަލް ވިދާޅުވި އެވެ. ޤާނޫނުއަސާސީގެ ބާރު ދަމަހައްޓާ، ލާމަރުކަޒީ ނިޒާމް ނަގަހައްޓަން ކުރިއަށް އޮތް ކައުންސިލް އިންތިޚާބުގައި އެމްޑީޕީ އަށް ވޯޓު ދިނުމަށް އޭނާ ވަނީ ގޮވާލައްވާފަ އެވެ.
