އިރާނުން ރަޝިޔާއާއެކު 500 މިލިއަން ޔޫރޯގެ އެންމެ ޒަމާނީ މިސައިލް އެއްބަސްވުމެއްގައި ސޮއި ކޮށްފި

އިރާނުން ރަޝިޔާއާއެކު ސިއްރު އެއްބަސްވުމެއް ގާއިމުކޮށް، 500 މިލިއަން ޔޫރޯ (589 މިލިއަން ޑޮލަރު) ގެ އަގުހުރި އެންމެ ޒަމާނީ ކޮނޑުމަތީގައި ފޮނުވާލެވޭ ހާހަކަށްވުރެ ގިނަ މިސައިލް ހޯދުމަށް ނިންމާފައިވާ ކަމަށް ފައިނޭންޝަލް ޓައިމްސް (އެފްޓީ) އިން އާދިއްތަ ދުވަހު ރިޕޯޓުކޮށްފިއެވެ.

މިދިޔަ ޑިސެމްބަރު މަހު މޮސްކޯގައި ސޮއިކުރި މި އެއްބަސްވުމުގެ ދަށުން، ކުރިއަށް އޮތް ތިން އަހަރު ދުވަހުގެ ތެރޭގައި "ވާބާ" މަރުކާގެ ކޮނޑުމަތީގައި ބާއްވައިގެން ފޮނުވާލެވޭ 500 ލޯންޗް ޔުނިޓާއި، "9M336" މަރުކާގެ 2،500 މިސައިލް ފޯރުކޮށްދިނުމަށް ރަޝިޔާއިން އެއްބަސްވެފައިވާ ކަމަށް އެފްޓީން ބުނެއެވެ. އެ ނޫހުން މި މައުލޫމާތު ހާމަކޮށްފައިވަނީ އެފްޓީއަށް ފެނިފައިވާ ރަޝިޔާގެ ލީކުވެފައިވާ ލިޔެކިޔުންތަކާއި، މި މުއާމަލާތުގެ މައުލޫމާތު އެނގޭ ބައެއް ފަރާތްތަކާ ހަވާލާދީއެވެ.

މި ރިޕޯޓުގެ ސައްހަކަން ކަށަވަރުކުރުމަށް ރޮއިޓާސްއިން ކުރި މަސައްކަތް މިހާތަނަށް ކާމިޔާބުވެފައެއް ނުވެއެވެ.

އެފްޓީން ރިޕޯޓުކޮށްފައިވާ ގޮތުގައި، މި އެއްބަސްވުމުގެ ދަށުން މިސައިލްތައް ފޯރުކޮށްދިނުމަށް ހަމަޖެހިފައިވަނީ 2027 ވަނަ އަހަރުން ފެށިގެން 2029 ވަނަ އަހަރުގެ ނިޔަލަށް، ތިން ބަޔަކަށް ބަހާލައިގެންނެވެ.

މި މުއާމަލާތުގެ މަޝްވަރާތައް ކުރިއަށްގެންގޮސްފައިވަނީ ރަޝިޔާގެ ދައުލަތުގެ ހަތިޔާރު އެކްސްޕޯޓްކުރާ ކުންފުނި ކަމަށްވާ "ރޮސޮބޮރޮންއެކްސްޕޯޓް" އާއި، އިރާނުގެ މިނިސްޓްރީ އޮފް ޑިފެންސް އެންޑް އާމްޑް ފޯސަސް ލޮޖިސްޓިކްސް (އެމް.އޯ.ޑީ.އޭ.އެފް.އެލް) އިން މޮސްކޯއަށް ކަނޑައަޅާފައި ހުންނަ މަންދޫބާ ދެމެދު ކަމަށް އެފްޓީން ބުނެއެވެ.

އެފްޓީއަށް ފެނިފައިވާ ކޮންޓްރެކްޓެއްގައިވާ ގޮތުން، މި ހަތިޔާރުތައް ހޯދުމަށް އިރާނުން ރަސްމީކޮށް އެދިފައިވަނީ މިދިޔަ އަހަރުގެ ޖުލައި މަހުގައެވެ. 

ރަޝިޔާއާއި އިރާނާ ދެމެދު ސްޓްރެޓީޖިކް ޕާޓްނަޝިޕް އެއްބަސްވުމެއް އޮތް ނަމަވެސް، އޭގެ ތެރޭގައި އެއް ގައުމު އަނެއް ގައުމު ދިފާއުކުރުމުގެ މާއްދާއެއް ނުހިމެނެއެވެ. ރަޝިޔާގެ ޑިފެންސް މިނިސްޓްރީން ބުނި ގޮތުގައި، މި ފެބްރުއަރީ މަހުގެ ކުރީކޮޅު ރަޝިޔާގެ ކަނޑުގެ ސިފައިންގެ މަނަވަރެއް ވަނީ ގަލްފް އޮފް އޯމާންގައި އިރާނުގެ ކަނޑުގެ ސިފައިންނާއެކު އަސްކަރީ ތަމްރީނުތަކެއް ކުރިއަށްގެންގޮސްފައެވެ.