އީރާނުގެ އިސް ސެކިއުރިޓީ އޮފިޝަލް އޮމާން އަށް ވަޑައިގެންފި
އީރާނުގެ އިސް އޮފިޝަލް އަލީ ލަރީޖާނީ އޮމާންގެ އިސްވެރިންނާ ބައްދަލުކުރައްވައި، ސަރަހައްދީ މަސްލަހަތާއި ދެ ގައުމުގެ ގުޅުން ބަދަހިކުރުމާ ގުޅޭގޮތުން މަޝްވަރާކުރައްވާނެ.
އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ސެކްރެޓަރީ އަލީ ލަރިޖާނީ (މ) 2026 ވަނަ އަހަރުގެ ފެބްރުއަރީ މަހުގެ 10 ވަނަ ދުވަހު އޮމާންގެ މަސްކަޓަށް ވަޑައިގެންފި. | ޕްރެސް ޓީވީ
އީރާނާއި އެމެރިކާއާ ދެމެދު ނިއުކްލިއާ މައްސަލައިގައި ނުސީދާކޮށް ކުރިއަށްގެންދާ މަޝްވަރާތައް ފެށިފައިވާ ދަނޑިވަޅެއްގައި، އީރާނުގެ ސުޕްރީމް ނޭޝަނަލް ސެކިއުރިޓީ ކައުންސިލް (އެސް.އެން.އެސް.ސީ) ގެ ސެކްރެޓަރީ އަލީ ލަރިޖާނީ މަތީ ފަންތީގެ މަޝްވަރާތަކަކަށް އޮމާންގެ ވެރިރަށް މަސްކަޓަށް ވަޑައިގެންފި އެވެ.
އަންގާރަ ދުވަހުގެ ހެނދުނުގެ ވަގުތެއްގައި ތެހެރާނުން ފުރާވަޑައިގެންނެވި ލަރިޖާނީ، އޮމާންގެ ފޮރިން މިނިސްޓަރު ބަދުރު ބިން ހަމަދު އަލް ބޫސައިދީ ހިމެނިވަޑައިގަންނަވާހެން އެ ގައުމުގެ އިސް އޮފިޝަލުންނާ ބައްދަލުކުރެއްވުމަށް ވަނީ ހަމަޖެހިފަ އެވެ.
މި ބައްދަލުވުންތަކުގައި މައިގަނޑު ގޮތެއްގައި މަޝްވަރާ ކުރައްވާނީ ސަރަހައްދީ އަދި ބައިނަލްއަގުވާމީ ފަހުގެ ކުރިއެރުންތަކުގެ އިތުރުން، ދެ ގައުމުގެ ދެމެދުގައި އޮތް ގުޅުން އިތުރަށް ބަދަހިކުރެވިދާނެ ގޮތްތަކާ ގުޅޭގޮތުންނެވެ.
މިދިޔަ ހުކުރު ދުވަހު އީރާނާއި އެމެރިކާއިން ވަނީ ނިއުކްލިއާ މައްސަލައާ ގުޅޭ ނުސީދާ މަޝްވަރާތަކުގެ އާ ބުރެއް މަސްކަޓުގައި ކުރިއަށް ގެންގޮސްފަ އެވެ.
އީރާނުގެ މަޝްވަރާ ޓީމުގެ އިސްވެރިޔާ، ފޮރިން މިނިސްޓަރު އައްބާސް އަރަގްޗީ ވަނީ އެ މަޝްވަރާތަކަކީ "ރަނގަޅު ފެށުމެއް" ގޮތުގައި ސިފަކުރައްވައި، ދެ ފަރާތުން ވެސް މަޝްވަރާތައް ކުރިއަށް ގެންދިއުމުގެ ނިޔަތް އޮތް ކަމަށް ވިދާޅުވެފަ އެވެ.
މި މަޝްވަރާތައް ކުރިއަށް މިދަނީ އެމެރިކާ އިން އެ ސަރަހައްދުގައި އަސްކަރީ ބާރުތައް ވަރުގަދަކޮށްފައިވާ ދަނޑިވަޅެއްގަ އެވެ. މީގެ ސަބަބުން އީރާނާއެކު އަސްކަރީ ކުރިމަތިލުމަކަށް ގޮސްފާނެ ކަމުގެ ގިނަ ތުހުމަތުތަކެއް ވަނީ ފެންމަތިވެފަ އެވެ.
ޚާއްޞަކޮށް، ޚިޔާލުތަފާތުވުންތަކަށް ޑިޕްލޮމެޓިކް ހައްލެއް ހޯދުމަށް އީރާނާއި އެމެރިކާގެ އޮފިޝަލުންގެ މެދުގައި މަޝްވަރާތައް ކުރިއަށް ދަނިކޮށް، މިދިޔަ ޖޫން މަހު އިޒްރޭލުން އީރާނާ ދެކޮޅަށް 12 ދުވަހުގެ މުއްދަތަށް ކުރި ހަނގުރާމައިގައި އެމެރިކާއިން ވަނީ ބައިވެރިވެފަ އެވެ.
ނަމަވެސް، އިޒްރޭލުގެ އެ ހަމަލާތަކަށް އީރާނުން ވަނީ ވަރުގަދަ ރައްދު ހަމަލާތަކެއް ދީފަ އެވެ. މިއާއެކު، ވޮޝިންޓަން މެދުވެރިކޮށް ހަމަލާ ބަދަލުކުރުން ހުއްޓާލުމަށް އިޒްރޭލުން ވަނީ އެދިފަ އެވެ.
