ދެކުނު ކޮރެއާގެ ރައީސް ޔޫން ސުކް ޔެއޯލް އެ ގައުމުގައި ހުސްވި ހަފްތާގައި މާޝަލް ލޯ އިއުލާނު ކުރެއްވުމުގައި އޭރުގެ ދިފާއީ ވަޒީރުގެ ދައުރެއް އޮތް ކަމަށް ބުނެ އޭނާ ހައްޔަރު ކޮށްފިއެވެ.
މާޝަލް ލޯ އިއުލާނު ކުރުމުގެ މައްސަލަ ބޮޑުވުމާއެކު އިސްތިއުފާ ދެއްވާފައިވާ ކުރީގެ ދިފާއީ ވަޒީރު އާދީއްތަ ދުވަހު ހައްޔަރުކުރެވުނީ އެ ގާނޫނު އިއުލާނުކުރުމުގައި އޭނާގެ ދައުރެއް އޮތުމާ ގުޅިގެން ކަމަށް ޕްރޮސިކިއުޓަރުން ބުނެފައިވެއެވެ.
އަނެއްކޮޅުން އިދިކޮޅު ޕާޓީތަކުގެ އަޣްލަބިއްޔަތު އޮތް ޕާލަމެންޓުން ހޮނިހިރު ދުވަހުގެ ރޭ ރައީސްގެ އިތުބާރު ނެތް ކަމަށް ނެގި ވޯޓުން ޔޫން ވަނީ ސަލާމަތްވެފައެވެ. ރައީސްގެ މައްޗަށް އިތުބާރު ނެތް ކަމުގެ މައްސަލަ ހުށަހެޅީ އަންގާރަ ދުވަހު ކުޑަ ވަގުތުކޮޅަކަށް މާޝަލް ލޯ އިއުލާނުކުރެއްވުމާ ގުޅިގެންނެވެ. ނަމަވެސް ޔޫންގެ އަމިއްލަ ޕާޓީގެ ލީޑަރު ބުނެފައިވަނީ ރައީސް އިސްތިއުފާ ދެއްވާނެ ކަމަށާއި، އަދި މަޤާމުން އިސްތިއުފާދެއްވުމުގެ ކުރިން އޭނާގެ ވާޖިބުތަކުން އެއްކިބާވާނެ ކަމަށެވެ.
ޔޫންގެ ޕީޕަލްސް ޕަވަރ ޕާޓީގެ ލީޑަރު ހަން ޑޮންގް-ހޫން، ބުދަ ދުވަހު ވަޒީރުންގެ މަޖިލީހުގެ ރައީސާއެކު ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ ރައީސް ޔޫން އޭނާގެ މަޤާމުން އިސްތިއުފާދެއްވުމުގެ ކުރިންވެސް ބޭރާ ބެހޭ ކަންކަމާއި އަދި ދައުލަތުގެ އެހެނިހެން ކަންކަމުގައި ބައިވެރިވެވަޑައި ނުގަންނަވާނެ ކަމަށެވެ.
ޔޫން މާޝަލް ލޯ އުވާލެއްވުމާއެކު ބުދަ ދުވަހު އިސްތިއުފާދެއްވި ކުރީގެ ދިފާއީ ވަޒީރު ކިމް ޔޮންގް-ހިޔުން އަކީ މި މައްސަލައިގައި މައިގަނޑު ފަރާތެއްގެ ގޮތުގައި ބެލެވެއެވެ. އިމްޕީޗްމަންޓް ލިޔުންތަކުގައިވާ ގޮތުން ރައީސަށް މާޝަލް ލޯ އިއުލާން ކުރުމަށް ލަފާ ދެއްވާފައިވަނީ އޭނާ އެވެ.
ޕްރޮސިކިއުޝަންގެ ޚާއްޞަ ތަޙްޤީޤު ޓީމުން އާދީއްތަ ދުވަހު ކިމް ހައްޔަރުކޮށް އޭނާގެ މޯބައިލް ފޯނު އަތުލާފައިވާ ކަމަށް ނޫސްވެރިންނަށް ދިން ކުރު ބަޔާނެއްގައި ބުނެފައިވެއެވެ. ހައްޔަރުކުރުމުގެ ކުރިން، ތަޙްޤީޤުކުރާ ފަރާތްތަކުން ކިމްއާ ސުވާލުކޮށްފައިވެއެވެ. އަދި އޭނާ އަމިއްލައަށް ސޯލް ސެންޓްރަލް ޑިސްޓްރިކްޓް ޕްރޮސިކިއުޓަރސް އޮފީހަށް ހޮނިހިރު ދުވަހުގެ ރޭ މެންދަމު ހާޒިރުވި ކަމަށް ޔޮންހަޕް ނިއުސް އެޖެންސީން ރިޕޯޓުކޮށްފައިވެއެވެ.
ތިން މައިނޯރިޓީ އިދިކޮޅު ޕާޓީއަކުން ޔޫން، ކިމް އަދި މާޝަލް ލޯ ކޮމާންޑަރ ޕާކް އަން-ސޫގެ މައްޗަށް ގައުމަށް ޣައްދާރުވުމުގެ ތުހުމަތުކޮށް ޝަކުވާ ހުށަހަޅާފައިވެއެވެ. މި އެ ފަރާތްތަކުގެ މައްޗަށް މި ކުށް ސާބިތުވެއްޖެނަމަ، މަރުގެ އަދަބު ނުވަތަ ބުރަ މަސައްކަތާއެކު އުމުރު ދުވަހުގެ ޖަލު ހުކުމެއް ކަނޑައެޅިދާނެއެވެ.
އިދިކޮޅު ޕާޓީތަކުގެ މެންބަރުން ތުހުމަތުކުރަނީ ޔޫން ވަނީ ޤާނޫނު އަސާސީއާ ޚިލާފަށް އިއުލާނު ކުރި މާޝަލް ލޯ ގެ ގަރާރު ބާޠިލުކުރުމަށް މެންބަރުން ވޯޓުލުން ހުއްޓުވުމަށް ސިފައިން މޮބިލައިޒްކޮށްފައި ކަމަށެވެ.
ޔޮންހަޕްގެ ރިޕޯޓުގައިވާ ގޮތުން، ކޮރެއާގެ ފުލުހުން ވަނީ ޔޫން އަދި އިސް ވަޒީރުންގެ މައްޗަށް ކުރެވިފައިވާ ޣައްދާރުވުމުގެ ތުހުމަތުތަކާ ގުޅޭ ތަޙްޤީޤެއްގެ ތެރެއިން އާދީއްތަ ދުވަހު ކިމްގެ އޮފީހެއް ރެއިޑްކޮށްފައެވެ.
ހޮނިހިރު ދުވަހުގެ އިމްޕީޗްމަންޓް ވޯޓުގެ ކުރިން، ޔޫން ވަނީ ޓީވީން ދެއްކި ޚިޠާބެއްގައި މާޝަލް ލޯ ގަރާރަށް މަޢާފަށް އެދިވަޑައިގަންފައެވެ. އޭނާގެ މި ބަޔާނުގައި މަޤާމުން އިސްތިއުފާ ދެއްވާނެ ކަމަށް ވަނީ ވައުދުވެފައެވެ.
އަންގާރަ ދުވަހުގެ ރޭ ޔޫން ވަނީ ކުއްލި ގޮތަކަށް "ދައުލަތާ ދެކޮޅު ބާރުތަކާއި" އަދި ގައުމަށް ހުރަސްއަޅާ ސިޔާސީ ވާދަވެރިން ނައްތާލުމަށް ސިފައިންނަށް ކުއްލި ނުރައްކަލުގެ ބާރުތައް ދެއްވާފައެވެ. މި އަމުރު 6 ގަޑިއިރު ފަހުން އޭނާ އުވާލެއްވީ، ސިފައިންނާއި ފުލުހުންގެ ކޯޑަންތައް ފޫއަޅުވާލުމަށް ފަހު ގާނޫނު ހަދާ މަޖިލީހުގެ މެމްބަރުން ގޮސް އެ ގަރާރާ ދެކޮޅަށް އިއްތިފާޤުން ވޯޓުލުމާއެކުގައެވެ.
