ދެކުނު ކޮރެއާގެ ރައީސް ޔޫން ސުކް-ޔެއޯލްގެ ބާރުތައް އަވަހަށް ހިފެހެއްޓުމަށް, ރައީސް ނިސްބަތްވާ އެ ގައުމުގެ ވެރިކަން ކުރާ ޕާޓީގެ ލީޑަރު ގޮވާލައްވައިފިއެވެ.

އޭނާ މިކަމަށް ގޮވާލެއްވީ ދެކުނު ކޮރެއާގެ ރައީސް މާޝަލް ލޯ އިއުލާނުކުރެއްވީ، އިދިކޮޅު ސިޔާސީ ލީޑަރުން ހައްޔަރުކުރެއްވުމުގެ ބޭނުމުގައި ކަން އެނގޭ "އިތުބާރުހުރި ހެކި" ހުރިކަމަށް ވިދާޅުވެއެވެ.

ވެރިކަން ކުރާ ޕީޕަލްސް ޕަވަރ ޕާޓީ (ޕީޕީޕީ)ގެ ލީޑަރު ހަން ޑޮންގް-ހޫން، ކުރިން ވަނީ ރައީސް ގެ އިތުބާރު ނެތް ކަމުގެ މައްސަލަ އާ ދެކޮޅު ހައްދަވާ ކަން ހާމަ ކުރައްވާފައެވެ.

އެހެން ނަމަވެސް، އޭގެ ފަހުން "އަލަށް ފާޅުވަމުންދާ ހަގީގަތްތަކުން" ރައީސްއާ މެދު ދެކެމުން އައި ގޮތް ބަދަލުވެފައިވާކަމަށް އޭނާ ހާމަ ކުރެއްވިއެވެ.

"އިއްޔެ ރޭ އަޅުގަނޑުމެންނަށް އެނގުނީ ރައީސް ވަނީ ސިޔާސީ ލީޑަރުން ހައްޔަރުކުރުމަށް، ދިފާއީ ކައުންޓަރ-އިންޓެލިޖެންސް ކޮމާންޑަރަށް އަމުރުކުރައްވާފައިކަމާއި، އެމީހުންނަކީ ދައުލަތާ ދެކޮޅު ބަޔަކު ކަމަށް ސިފަކޮށް، އިންޓެލިޖެންސް އިދާރާތައް މިކަމުގައި ބޭނުންކޮށްފައިވާކަން،" ހަން ވިދާޅުވިއެވެ.

"މި ގައުމު އިތުރަށް ހަމަނުޖެހުމަކަށް ދިޔަނުދިނުމަށްޓަކައި، މިފަހަރު އިމްޕީޗްމަންޓް ބިލް ފާސްވިޔަ ނުދިނުމަށް މަސައްކަތް ކުރާނެކަމަށް އަޅުގަނޑު ބުނެފައިވާނެ،" ހަން އިތުރަށް ވިދާޅުވިއެވެ.

"އެހެން ނަމަވެސް ހާމަވެފައިވާ ކަންތައްތަކުގެ މައްޗަށް ބިނާކޮށް، ދެކުނު ކޮރެއާ އާއި އަޅުގަނޑުމެންގެ ރައްޔިތުން ރައްކާތެރިކުރުމަށްޓަކައި، ރައީސް ޔޫންގެ ރައީސްކަމުގެ ބާރުތައް ބޭނުންކުރުން އަވަހަށް ހުއްޓުވުމަކީ މުހިންމުކަމެއްކަމަށް އަޅުގަނޑު ގަބޫލުކުރަން."

ހަން ހާމާ ކުރެއްވި ގޮތުގައި ރައީސް ޔޫން މާޝަލް ލޯ އިއުލާނުކުރެއްވުމަކީ ގާނޫނާ ޚިލާފު އަދި ނުރަނގަޅު ކަމެއް ކަމަށް ގަބޫލު ކުރައްވަން އިންކާރު ކުރައްވާފައިވާކަމަށާއި، އޭނާ މަގާމުގައި ހުންނަވައިފިނަމަ އެފަދަ ހައްދުފަހަނައަޅާފައިވާ ފިޔަވަޅުތައް އަނެއްކާވެސް އެޅުމުގެ "ބޮޑު ނުރައްކަލެއް" އޮތްކަމަށެވެ.

ދެކުނު ކޮރެއާގައި މާޝަލް ލޯ އިއުލާނުކޮށްފައިވަނީ އާދީއްތަ ދުވަހުގެ ރޭ ގާތްގަނޑަކަށް 6 ގަޑިއިރު ވަންދެނެވެ. ޔޫން މިކަން އިއުލާނު ކުރެއްވީ ގައުމާ މުޚާތަބުކުރައްވާ ކުއްލިއަކަށް ދެއްވި ޓީވީ ޚިތާބެއްގައެވެ.

އޭނާ މިކަން ކުރެއްވި ސަބަބެއްގެ ގޮތުގައި ވިދާޅުފައިވަނީ "ދައުލަތާ ދެކޮޅު ބާރުތަކާއި" އުތުރު ކޮރެއާ އަށް ތާއީދުކުރާ ފަރާތްތަކުގެ ނުރައްކަލުގެ ސަބަބުން ކަމުގައެވެ.

އެހެން ނަމަވެސް ދެކުނު ކޮރެއާގެ ގާނޫނު ހަދާ މަޖިލިސް ކަމަށްވާ ނެޝަނަލް އެސެމްބްލީން އަވަސް ފިޔަވަޅުތައް އަޅާ ޔޫންގެ އަމުރު 190-0 ވޯޓުން ވަނީ ބާޠިލުކޮށްފައެވެ.

ޔޫން މާޝަލް ލޯ އިއުލާނު ކުރެއްވުމާއެކު ސިފައިން ވަނީ ނެޝަނަލް އެސެމްބްލީއަށް އައިސް މެމްބަރުންނާއި އިހުތިޖާޖުކުރާ މީހުންނާ ކުރިމަތިލާފައެވެ.

އިމްޕީޗްމަންޓާ ކުރިމަތިލައްވަން ޖެހިވަޑައިގަތުމުގެ އިތުރުން، މިހާރު ޔޫން އާ މެދު ވަނީ ގައުމަށް ޣައްދާރުވުމުގެ ތުހުމަތުގައި ތަހުގީގު ފަށާފައެވެ.