މާޝަލް ލޯ އިއުލާނުކުރި މައްސަލައިގައި ދެކުނު ކޮރެއާގެ ފުލުހުން ވެރިރަށް ސޯލް ގައި ހުންނަ އެ ގައުމުގެ ރައީސްގެ ރަސްމީ އޮފީސް ރެއިޑްކޮށްފި އެވެ.
ކުއްލި ގޮތަކަށް ދެކުނު ކޮރެއާ ގެ ރައީސް އެ ގައުމުގެ ސިފައިންނަށް ބޮޑެތި ބާރުތަކެއް ލިބޭ ގޮތައް މާޝަލް ލޯ އިއުލާނު ކުރެއްވުމާ ގުޅިގެން ގައުމުގެ ސިޔާސީ މަސްރަހް ވަނީ ވަރަށް ބޮޑަށް ހަލަބޮލިވެފައެވެ.
އެތައް ބަޔަކު އިސްތިއުފާ ދިނުމަށް ގޮވާލަމުން ދިޔަ ނަމަވެސް އަދިވެސް މަޤާމުގައި ދެމިހުންނެވި ރައީސް ޔޫން ވަނީ ސަރުކާރުގެ އެކި އިދާއިރާތަކުން ކުރާ ތަޙުޤީޤުތަކާ ކުރިމަތިލައްވަން ޖެހިފައެވެ. މީގެ ތެރޭގައި ގައުމަށް ޣައްދާރުވުމުގެ ތުހުމަތު ހިމެނެއެވެ.
މީގެ އިތުރުން، މާޝަލް ލޯ އިއުލާނުކުރުމުގެ ޒިންމާ ނަގާފައިވާ ކުރީގެ ދިފާއީ ވަޒީރު ކިމް ޔޯންގް-ހިޔުން ވަނީ އަންގާރަ ދުވަހުގެ ރޭ ބަންދުކޮށްފައި ހުއްޓާ އަމިއްލައަށް މަރުވާން މަސައްކަތްކޮށްފައެވެ. މިކަން ރަސްމީ ފަރާތަކުން ވަނީ ހާމަކޮށްފައިވެއެވެ.
ކިމް ބެލެހެއްޓުން މިހާރު އިތުރަށް ވަރުގަދަ ކޮށްފައިވާ ކަމަށާއި "މިވަގުތު އޭނާގެ ސިއްހީ އެއްވެސް މައްސަލައެއް ނެތް" ކަމަށް އޮފިޝަލުން ވަނީ ހާމަކޮށްފައެވެ.
ކުރީގެ ޑިފެންސް މިނިސްޓަރ ހައްޔަރުކުރެވުނީ އާދިއްތަ ދުވަހުއެވެ.
މާޝަލް ލޯ އިއުލާނުކުރުމުގެ މައްސަލަ ހޫނުވެ ރައިސް ޔޫން ސަރުކާރުގެ ގިނަ އޮފިޝަލުންވެސް ވަނީ އިސްތިއުފާ ދީފައެވެ.
ވެރިކަން ކުރާ ޕާޓީން ހާމަ ކޮށްފައިވާ ގޮތުގައި ޔޫން ވަނީ ވަރަށް އަވަހަށް އިސްތިއުފާ ދެއްވާނެ ކަމަށް އެއްބަސްވެ ވަޑައިގެންފައެވެ. އަދި އޭގެ ކުރިންވެސް ޚާރިޖީ ގުޅުންތަކާއި ގައުމުގެ މުހިންމު އެހެން ބޮޑެތި ކަންކަމުގައި ބައިވެރިވެ ވަޑައިނުގަތުމަށް ވަނީ އެއްބަސްވެފައެވެ.
މީޑިއާ ރިޕޯޓުތަކުގައި ފާހަގަ ކޮށްފައިވާ ގޮތުގައި މިހާރު ޔޫންއަށް އެއްވެސް ބާރެއް އޮތްކަން ނުވަތަ ނޫންކަން ސާފެއް ނޫނެވެ.
އަނެއްކޮޅުން އާންމު ރައްޔިތުން މަގުތަކަށް ނުކުމެ އޭނާގެ އިސްތިއުފާއަށް ގޮވާލާ ކުރަމުން ދާ މުޒާހަރާތައް އަދިވެސް ދަނީ ކުރިއަށެވެ.
ބީބީސީ އިން ހާމަ ކޮށްފައިވާ ގޮތުގައި ބުދަ ދުވަހު ތަހުގީގުގައި ހަރަކާތްތެރިވާ 18 އޮފިޝަލުން ރައީސްގެ އޮފީހަށް ގޮސްފައިވެއެވެ. މިއީ މާޝަލް ލޯ އިއުލާނުކުރި ރޭ ބޭއްވުނު ކެބިނެޓް ބައްދަލުވުމާ ގުޅޭ ލިޔެކިޔުންތައް ހޯދުމަށް ކަމަށް މީޑިއާތަކުން ރިޕޯޓުކޮށްފައިވާ ކަމަށްވެސް ބީބީސީ އިން ބުނެފައިވެއެވެ.
ސާރޗް ވޯރަންޓުގައި ހިމެނޭ ފަރާތްތަކުގެ ތެރޭގައި ހިމެނޭ ރައީސް ޔޫން ގެ އޮފީހަށް ތަހުގީގީ އޮފިޝަލުން ދިޔައިރު، އޭނާ އޮފީހުގައި ނޫޅުއްވާ ކަމަށް ވެއެވެ.
ކޮރެއާގެ ރައީސްގެ އޮފީސް އެންމެ ފަހުން ސާރޗްކުރެވުނީ 2019 ވަނަ އަހަރުގެ ޑިސެމްބަރު މަހުއެވެ. އެއީ ބުސާންގެ ކުރީގެ ޑެޕިއުޓީ މޭޔަރާ ގުޅޭ ކޮރަޕްޝަންގެ ތުހުމަތަކާ ގުޅިގެންނެވެ. އެ ޙާދިސާ ގައި ޕްރޮސެކިއުޓަރުން އޮފީހަށް ވަދެފައެއް ނުވެއެވެ. އޭގެ ބަދަލުގައި އުސޫލުތަކާ އެއްގޮތަށް އޮފީހުން ވަނީ ބޭނުންވާ މައުލޫމާތު ހަވާލުކޮށްފައެވެ.
އޭރު ޤައުމު ހިންގަވަމުން ދިޔައީ ކުރީގެ ރައީސް މޫން ޖެއި-އިންއެވެ.
ތަހުގީގު ކުރިއަށް ގެންދާ މިހާރުގެ ރައީސް ޔޫން ރައީސް ކަމާ ހަވާލުވެވަޑައިގަތީ 2022 ވަނަ އަހަރުއެވެ.
