ކޮރެއާގެ ރައީސްގެ އިތުބާރު ނެތް ކަމަށް ފާސްކޮށްފި

ދެކުނު ކޮރެއާގެ ރައީސްގެ އިތުބާރު ނެތް ކަމަށް ހޮނިހިރު ދުވަހު އެ ގައުމުގެ ގާނޫނު ހަދާ މަޖިލީހުން ފާސްކޮށްފިއެވެ. 204 މެންބަރުން އިތުބާރު ނެތް ކަމަށް ހުށަހެޅުނު ގަރާރަށް ތާއީދުކޮށް ވޯޓުދީފައެވެ.

މީގެ މާނައަކީ ރައީސް ޔޫން ވަގުތުން ވަޒީފާއިން ސަސްޕެންޑްކުރެވި، ބޮޑުވަޒީރު ވަގުތީ ރައީސްގެ ގޮތުގައި މަސައްކަތް ކުރައްވަން ފެއްޓެވުމެވެ.

އިތުބާރު ނެތް ކަމުގެ މައްސަލަ ހުށަހެޅުނު ފަހުން ހަފްތާގެ ގިނަ ދުވަސްތަކުގައި ރައީސް އުޅުއްވީ މައިގަނޑު ގޮތެއްގައި ފިއްލަވައިގެން ކަމަށް ރިޕޯޓުތައް ބުނެއެވެ. ނަމަވެސް ބުރާސްފަތި ދުވަހު ކުއްލި ގޮތައް ގައުމާ މުޚާތަބު ކުރައްވާ، މާޝަލް ލޯ ތަންފީޒުކުރުމަށް ނިންމި ނިންމެވުން ދިފާޢުކުރައްވާ ހަރުކަށި ވާހަކަފުޅެއް ދެއްކެވިއެވެ. އިސްތިއުފާ ނުދެއްވާނެ ކަމަށާއި އެންމެ ފަހު ވަގުތާ ޖެހެންދެން ވެސް "ހަނގުރާމަ" ކުރައްވާނެ ކަމަށް ވިދާޅުވިއެވެ.

އެ ވާހަކަފުޅާއެކު އޭނާ އާ ދެކޮޅަށް މަސައްކަތް ކުރަމުންދާ ފަރާތްތަކަށް އޭނާ މަގާމުން ދުރުކުރުމަށް އިތުރު ހިތްވަރު ލިބިގެން ދިޔަ ކަމަށްވެއެވެ.

ޚިޔާލު ހޯދުމުގެ ވޯޓުން ފެންނަ ގޮތުގައި ޔޫން އަށް މިހާރު ތާއީދު ކުރަނީ ކޮރެއާ ރައްޔިތުންގެ އެންމެ 11 އިންސައްތަ މީހުންނެވެ.

ނަތީޖާ އިއުލާންކުރުމާއެކު، މެޖޯރިޓީ އޮންނަ އިދިކޮޅު ޑިމޮކްރެޓިކް ޕާޓީގެ މެންބަރުން އުފާފާޅު ކުރަން ފެށިއެވެ. އަދި ވެރިކަންކުރާ ޕާޓީގެ މެންބަރުން މަޑުމަޑުން މަޖިލިސް ދޫކޮށް ނުކުމެގެން ވަނީ ގޮސްފައެވެ.

މަޖިލީހުގެ ޖުމްލަ 300 މެންބަރުން ވޯޓުގައި ބައިވެރިވެފައިވެއެވެ. 204 މެންބަރުން ފެންނަ ކަމަށް ވޯޓު ދިން އިރު 85 މެންބަރުން ވޯޓުދިނީ ނުފެންނަ ކަމަށެވެ. 3 މެންބަރުން ވަކި ގޮތަކަށް ވޯޓު ދީފައެއް ނުވެއެވެ. 4 ވޯޓު ބާތިލްވިއެވެ.

މަޖިލީހުން އިތުބާރު ނެތް ކަމަށް ފާސް ކުރިއަސް އުސޫލު ހަމަ ޖެހިފައިވާ ގޮތުން ރައީސް މަގާމުން ވަކި ކުރުމަށް އަދި އިތުރު މަރުހަލާއެއް ކަޑައްތު ކުރަން ޖެހެއެވެ.

އިމްޕީޗްމަންޓްގެ މުޅި މަރުޙަލާ ފުރިހަމަ ކުރުމަށް ހަފްތާތަކެއް ނަގާނެއެވެ. އެއީ ކޮންސްޓިޓިއުޝަނަލް ކޯޓުގައި އަދިވެސް ޝަރީޢަތެއް ބާއްވަންޖެހޭތީއެވެ. ކޮންސްޓިޓިއުޝަނަލް ކޯޓުގެ 9 މެންބަރުންގެ ކައުންސިލުގެ ތެރެއިން 6 މެންބަރުން އިމްޕީޗްމަންޓް ދެމެހެއްޓުމަށް ވޯޓުދީފިނަމަ، ރައީސް މަޤާމުން ވަކިވާނެއެވެ.

މިފަދަ ހާލަތެއްގައި، އާ ރައީސަކު އިންތިޚާބުކުރުމަށް ޙުކުމް އިއްވާތާ 60 ދުވަހުގެ ތެރޭގައި އިންތިޚާބަކަށް ގޮވާލެވޭނެއެވެ.