މަޖިލިސް މެޖޯރިޓީ ޕީއެންސީ އަށް ދިނުމުން ޑޮލަރުގެ އަގު ދަށްވާނެ ކަމަށް ވިދާޅުވި ނަމަވެސް އަދިވެސް އެ މައްސަލަ ހައްލުނުވާ ސަބަބު މިނިސްޓަރު ސައީދަކަށް ނުދެންނެވުނު
ޑޮލަރުގެ އަގު ކުޑަކުރެވޭނެ ތާރީޚަކާ ގުޅޭގޮތުން މަޖިލީހުގައި މެންބަރަކު ކުރެއްވި ސުވާލަށް އިކޮނޮމިކް މިނިސްޓަރު މުހައްމަދު ސައީދު ސީދާ ޖަވާބެއް ނުދެއްވައި، ސަރުކާރުން ބޭރު ފައިސާ ދޫކުރި މިންވަރު އިތުރުވެފައިވާކަން ފާހަގަކުރައްވައިފި. ކަޅު ބާޒާރުގައި ޑޮލަރުގެ އަގު 20 ރުފިޔާއަށްވުރެ މަތީގައި ހުރިއިރު، މިނިސްޓަރު ވިދާޅުވީ ފޮރިން އެކްސްޗޭންޖް ސިޔާސަތަށް ގެނައި ބަދަލުތަކާއެކު މި މައްސަލައަށް ހައްލު ލިބޭނެ ކަމަށް. ނަމަވެސް ޑޮލަރު ލިބުން ދަތިވުމުގެ ސަބަބުން މުދަލުގެ އަގު އުފުލިދާނެކަމުގެ ބިރު އޮތްކަމަށް ވިޔަފާރިވެރިން ދަނީ ބުނަމުން.
ރައީސް ޑރ. މުހައްމަދު މުއިއްޒުގެ އިކޮނޮމިކް މިނިސްޓަރު މުހައްމަދު ސައީދު | ރައްޔިތުންގެ މަޖިލިސް
ރައްޔިތުންގެ މަޖިލީހުގެ މެޖޯރިޓީ، ސަރުކާރު ހިންގާ ޕީއެންސީ އަށް ދީފި ނަމަ ޑޮލަރުގެ އަގު ހުއްޓުމެއް ނެތި މައްޗަށް ދާ ދިއުން ހުއްޓޭނެ ކަމުގެ ޔަގީންކަން ސަރުކާރުން ދިން ނަމަވެސް މަޖިލީހުގެ ސުޕަ މެޖޯރިޓީ ދިން ތާ ވެސް ގިނަ ދުވަސް ފާއިތުވެގެން ގޮސްފައިވާއިރު ވެސް މި މައްސަލައަށް ހައްލު ނުލިބޭތީ ސުވާލު ކުރުމުން ރައީސް ޑރ. މުހައްމަދު މުއިއްޒުގެ އިކޮނޮމިކް މިނިސްޓަރު މުހައްމަދު ސައީދަށް ޖަވާބު ނު ދެއްވުނެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާ އަށް މިނިސްޓަރު ސައީދު ހާޒިރުވެވަޑައިގެންފައި ވާއިރު ސުވާލު ކުރުމުގެ ވަގުތުގައި ވައިކަރަދޫ ދާއިރާގެ އެމްޑީޕީ މެންބަރު ހުސައިން ޒިޔާދު ވަނީ ޑޮލަރެއް ގަންނަން ލިބޭ އަގު ކުޑަކުރެވޭނީ ކޮންއިރަކުންތޯ މިނިސްޓަރާ ސުވާލު ކުރައްވާފަ އެވެ.
އެ ސުވާލަށް ޖަވާބުނުދެއްވައި މިނިސްޓަރު ވަނީ އެހެން ވާހަކައެއް ދައްކަވާފަ އެވެ. އެގޮތުން މަޖިލީހުގެ މެޖޯރިޓީ ލިބިގެންދިއުމަކީ ދިވެހިރާއްޖަށް ފަހުން ލިބިގެންދިޔަ އެންމެ ބޮޑު ކާމިޔާބު ކަމަށް މިނިސްޓަރު ވިދާޅުވި އެވެ.
ދެން އަޅުގަނޑު ހަމަ އިއްޒަތްތެރި މެންބަރު ނާޒިލް ކުރެއްވި ސުވާލުގެ ޖަވާބުގައި ކިޔައިދިން ހަމަ ޖަވާބު ކިޔައިދޭން އިއްޒަތްތެރި މެންބަރަށް އޮންނަ އިހުތިރާމެއްގެ ބޮޑުކަމުން އަނެއްކާވެސް އަޅުގަނޑު ހަމަ ކިޔައިދޭނަން. މި އަހަރުގެ މިހާތަނަށް ބޭރު ފައިސާ ދޫކޮށްފައިވާ މިންވަރަކީ 106.2 މިލިއަން ޑޮލަރު. މިއީ އެވްރެޖްކޮށް ގާތްގަނޑަކަށް މަހަކު، އިއްޒަތްތެރި މެންބަރު އަޑުއައްސަވާތި، 35.4 މިލިއަން ޑޮލަރު. މިއީ 2025 ވަނަ އަހަރުގެ މި މުއްދަތާ އަޅާބަލާއިރު 142 ޕަސެންޓުގެ އިތުރުވުމެއް.ރައީސް ޑރ. މުހައްމަދު މުއިއްޒުގެ އިކޮނޮމިކް މިނިސްޓަރު މުހައްމަދު ސައީދު
އޭގެ އިތުރުން ސައީދު ވިދާޅުވީ ފޮރިން އެކްސްޗޭންޖް ސިޔާސަތަށް މީގެ ކުރިން އެއްވެސް ވެރިޔަކަށް ގެންނަވަން ކެރިވަޑައިނުގެންނެވި ފަދަ ބަދަލުތަކެއް މި ސަރުކާރުން ގެނަސްފައިވާ ކަމަށެވެ.
މެންބަރު ކުރެއްވި ސުވާލަށް ޖަވާބު ނުދެއްވާ އެހެން ވާހަކަތަކެއް މިނިސްޓަރު ދެއްކެވުމުން މެންބަރު ވަނީ ޑޮލަރު ގަންނަން ލިބެނީ 20 ރުފިޔާ އަށް ކަމަށް ވިދާޅުވެފަ އެވެ. އަދި ޖަވާބަކީ ލޯބީގެ ވާހަކަ އެއް ނޫން ކަމަށް ވެސް މެންބަރު ވިދާޅުވި އެވެ.
ޑޮލަރު މާރުކުރާ ގްރޫޕުތަކުން ހާމަކުރާ ގޮތުގައި މިއަދު ޑޮލަރެއް ލިބެން ހުރީ 20.20 ރުފިޔާ އާއި 20.05 ރުފިޔާ އާ ދެމެދު ގަ އެވެ. ރާއްޖެ އަށް މުދާ އެތެރެކުރާ ބައެއް ކުންފުނިތަކުން ބުނީ އެ ކުންފުނިތަކަށް ބޭރުން ދޭ ޑޮލަރު ސަޕޯޓު ވެސް ދަށްކުރުމުން ކަޅު ބާޒާރަށް ގޮސް ޑޮލަރު ގަންނަން އިންތިހާ އަށް ދަތިތައް އެބަހުރި ކަމަށެވެ. މީގެ ސަބަބުން މުދާ ގަންނަން ކުރަން ޖެހޭ ހަރަދު ބޮޑުވެ، މުދާ ވިއްކާ އަގު އުފުލުމުގެ ފުރުސަތު އެބައޮތެވެ.
ރައީސް މުއިއްޒު އާއި ސަރުކާރުގެ އިސްވެރިން އަދިވެސް ވިދާޅުވަނީ ޓޫރިޒަމް ވިޔަފާރިތަކުން ޑޮލަރު މާރުކުރަން ފެށުމުން ޑޮލަރުގެ ކަޅު ބާޒާރުގައި އަގުތައް ތިރިކުރެވޭނެ ކަމަށެވެ.
ސަރުކާރުން ގަބޫލުކުރަނީ، މިހާރު ހުރި ބޭރު ފައިސާގެ ސިޔާސަތުތައް ތަންފީޒުކޮށްގެން ޑޮލަރުގެ މައްސަލަ ހައްލުކުރެވޭނެ ކަމަށެވެ. އަދި ކުރިއަށް އޮތް ދެ އަހަރުގެ ތެރޭގައި ރަސްމީ ރޭޓުގައި ޑޮލަރު ލިބޭނެ ކަމުގެ ޔަގީންކަން ރައީސް ޑރ. މުހައްމަދު މުއިއްޒު ދެއްވި ނަމަވެސް މުއިއްޒުގެ ޑޮލަރު ސިޔާސަތު ތަންފީޒު ކުރަން ފެށި ފަހުން ޑޮލަރުގެ އަގު ދަނީ މަތިވަމުންނެވެ.
