ރާއްޖޭގައި އެއްވެސް މަޝްރޫއެއް ކުރިއަށް ނުދަނީ ސަރުކާރުގެ ނާގާބިލުކަމުން، އެ މީހުންނަށް އެކަން ކުރަން ނޭނގޭތީ: ފަލާހު
ރާއްޖޭގައި ތަރައްގީގެ މަޝްރޫއުތައް ހުއްޓިފައި ވަނީ ސަރުކާރުގެ ނާގާބިލުކަމުން ކަމަށް ވިދާޅުވެ، ކުރީގެ މެންބަރު މުހައްމަދު ފަލާހު ވަނީ ފާޑުވިދާޅުވެފަ. އިންޑިއާއިން ބޮޑު ހިލައިގެ ކޯޓާ ދިން ނަމަވެސް، އެ ތަކެތި ގެނެސް މަސައްކަތްތައް ކުރިއަށް ނުގެންދެވުމަކީ ސަރުކާރުގެ އިހުމާލެއް ކަމަށާއި، މަޝްރޫއުތައް ހަވާލުކުރާ ކުންފުނިތަކަށް ފައިސާ ނުދީ ރައްޔިތުންނަށް އޮޅުވާލަމުންދާ ކަމަށް އޭނާ ތުހުމަތު ކުރެއްވި. އެހެންކަމުން، ރައްޔިތުންނަށް އިތުރު ގެއްލުން ނުދީ ރައީސް އިސްތިއުފާ ދެއްވުމަށް ފަލާހު ވަނީ ގޮވާލައްވާފަ.
ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު | ރާއްޖެއެމްވީ
ރާއްޖޭގައި އެއްވެސް ޕްރޮޖެކްޓެއްގެ މަސައްކަތް ކުރިއަށް ނުދަނީ ރައީސް ޑރ. މުހައްމަދު މުއިއްޒުގެ ސަރުކާރުގެ ގާބިލުކަމެއް ނެތުމުން ކަމަށް ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު ވިދާޅުވެއްޖެ އެވެ.
ރާއްޖެޓީވީ ގެ ފަލަސުރުޚީ ޕްރޮގްރާމްގައި ވާހަކަދައްކަވަމުން ފަލާހު ވިދާޅުވީ ރާއްޖޭގައި ތަރައްގީގެ އެއްވެސް މަޝްރޫއެއް މިހާރު ނުހިނގާ ކަމަށެވެ. އެގޮތުން ރާއްޖޭގެ އެކި ހިސާބުތަކުގައި ޕޮލިސް ސްޓޭޝަންތައް ހަދަމުންދާ ކަމަށް ސަރުކާރުން ބުނާ ކަމަށާއި އެހެން ނަމަވެސް އެ މަޝްރޫއުތައް ވެސް ކުރިއަށް ނުދާ ކަމަށެވެ. އޭގެ އިތުރުން ބަނދަރު ހެދުން ފަދަ މަޝްރޫއުތައް ވެސް ހުއްޓިފައިވާ ކަމަށް ފަލާހު ވިދާޅުވި އެވެ.
ފަލާހު ވިދާޅުވީ މިއަދު ގައުމުގައި މަޝްރޫއުތަކަށް ބޭނުންވާ ސާމާނު ވެސް ނެތް ކަމަށެވެ. އެގޮތުން ބޮޑު ހިލައިގެ ވާހަކަ ފާހަގަ ކުރައްވާ އޭނާ ވިދާޅުވީ ބޮޑު ހިލައިގެ ޝިޕްމަންޓްތައް ގަނޑުކޮށް ގެންނަވާނެ ކަމަށް ރައީސް މީގެ ކުރިން ވިދާޅުވި ކަމަށެވެ. ރާއްޖެއަށް ބޮޑު ހިލަ ފޯރުކޮށްދެނީ އިންޑިއާ އިން ކަން ފާހަގަ ކުރައްވާ ފަލާހު ވިދާޅުވީ މި ސަރުކާރުން އަވަށްޓެރި އިންޑިއާ އާ މެދު ކަންތައް ކުރި އިހާނެތި ގޮތާ، އެ ގައުމަށް އަމާޒުކޮށް ކީ އެއްޗިއްސަށް ފަހު ވެސް އެ ގައުމުން ކޯޓާ ދިން އިރު ދުނިޔޭގެ އެހެން އެއްވެސް ގައުމަކަށް ދީފައި ނުވާވަރުގެ ބޮޑު ކޯޓާ އެއް ދިން ކަމަށެވެ.
މިހުރިހާ ކަމަކާ އެކުވެސް މިއަދު ސަރުކާރުން ބުނަމުން ދަނީ ބޮޑު ހިލަ ނެތް ވާހަކަ ކަމަށާ މި ހުރިހާ ކަމަކުން ވެސް ހާމަވަނީ މި ސަރުކާރުގެ ނާގާބިލުކަން ކަމަށް އޭނާ ވިދާޅުވި އެވެ.
އެހެންވީމަ އެވަރަށް ދިނީމަ ވެސް މިއަދު މިއޮތް ސަރުކާރުން އެކަންކަން ނުކުރަނީ އަޅުގަނޑު ދަންނަވާނީ ހަމަ ގާބިލުކަމެއް ނެތީއޭ. ހަމަ ނޭނގެނީއޭ ކުރަން. ކުރަން އެނގިވަޑައިގަންނަވާނަމަ ބޮޑު ހިލަ ވެސް ގެންނާނެ. ރާއްޖޭގެ ޕްރޮޖެކްޓްތައް ވެސް ހިނގާނެ. ބަނދަރުތައް ވެސް ހެދޭނެ. ރާއްޖޭގެ ރަށްރަށުގަ މަގުތައް ވެސް ހެދޭނެ. އިމާރާތްތައް ވެސް ހެދޭނެ.ރައްޔިތުންގެ މަޖިލީހުގެ މާފަންނު ހުޅަނގު ދާއިރާގެ ކުރީގެ މެންބަރު މުހައްމަދު ފަލާހު
ފަލާހު ވިދާޅުވީ ނާގާބިލު ކަމުގެ އިތުރަށް މި ސަރުކާރަކީ ކޮންމެ ކަމެއްގައި ވެސް މަކަރާ ހީލަތް ހަދައި، ރައްޔިތުންނަށް އޮޅުވާލާ ބައެއް ކަމަށެވެ. އެގޮތުން މަޝްރޫއުތައް ކުރިއަށް ގެންދިއުމަށް ކުންފުނިތަކާ ހަވާލުކުރާ ކަމަށާ ނަމަވެސް އެ ފަރާތްތަކަށް ފައިސާ ނުދޭ ކަމަށެވެ. އެކަމުން ވެސް ހަދަނީ މަކަރާ ހީލަތް ކަމަށާ މަޝްރޫއުތައް ކުރިއަށް ނުދާ އަނެއް ސަބަބަކީ އެއީ ކަމަށް ފަލާހު ވިދާޅުވި އެވެ.
ފަލާހު ވިދާޅުވީ ތަރައްގީ އާއި ކުރިއެރުމަށް ކަންކަން ކުރެވޭ ގާބިލް ބޭފުޅުން ނެތުމުން ވާ ހުރިހާ ކަމެއް މި ގައުމުގައި ވަމުންދާ ކަމަށާއި، އެއްވެސް މަޝްރޫއެއްގެ މަސައްކަތް ކުރިއަށް ނުދާ ކަމަށެވެ. ރައްޔިތުންނަށް މިއަދު ޖެހިފައިވާ ހުރިހާ އުދަނގުލަކީ ވެސް އުރައްޕެއް ނެތް ބޭފުޅުން ރައްޔިތުންނަށް ޚިދުމަތް ކުރަން ފެށުމުން ޖެހިފައިވާ އުދަނގޫތައް ކަމަށް އޭނާ ވިދާޅުވި އެވެ. އަދި ވިދާޅުވީ މިއަދު ރައްޔިތުންނަށް ރައީސް މުއިއްޒު ހެވާ ލާބަޔަށް އެދޭ ކަމަށް ވާނަމަ އިސްތިއުފާ ދެއްވުމަށް ފަހު ގެއަށް ވަޑައިގަންނަވަން ޖެހޭ ކަމަށެވެ.
މިސަރުކާރު އޮތުމުން ރާއްޖޭގެ ރައްޔިތުންނަށް އެއްވެސް ފައިދާ އެއް ނުލިބޭނެކަން ފާހަގަކުރައްވައި ފަލާހު ވިދާޅުވީ ރައްޔިތުންނަށް ލިބޭނީ ގެއްލުން ކަމަށެވެ. އަދި ވަޒީފާ ދިނުމާއި މުސާރަ ދިނުމާއި މިކަންކަން ކޮށްގެން ސަރުކާރުގެ ޕާޓީ، ޕީއެންސީގެ މެންބަރޝިޕް ބޮޑު ކުރެވިދާނެ ކަމަށާއި، ޕާޓީއަށް ދައުލަތުން ލިބޭ ރުފިޔާ ގިނަ ކުރި ނަމަވެސް ތަރައްގީގެ މަޝްރޫއެއް ނުވަތަ ރައްޔިތުންނަށް މަންފާވާ ކަމެއް ނުހިނގާނެ ކަމަށެވެ.
