އަނބު ހެއްދުން ޒަމާނީ ކުރާނީ ކިހިނެއް؟

މޫސުން ރަނގަޅު އަހަރުތަކުގައި ވެސް، އަނބަކީ ދަނޑުވެރިކަން ކުރުމަށް އެންމެ އުނދަގޫ މޭވާގެ ބާވަތްތަކުގެ ތެރޭގައި ހިމެނޭ އެއްޗެކެވެ.

އަނބު ހެދިބޮޑުވުން ބިނާވެފައިވަނީ މޫސުމާއި، ގަހުގެ ފިޒިއޮލޮޖީ ނުވަތަ ގަހުގެ ބާވަތާއި، އަދި ދަނޑުވެރިކަން ކުރުމުގައި ގެންގުޅޭ އުސޫލުގެ މައްޗަށެވެ.

ދުނިޔޭގައި އެންމެ ގިނައިން އަނބު އުފައްދާ ގައުމަކީ އިންޑިއާ ކަމަށްވާއިރު، އިންޑިއާގައި ކޮންމެ އަހަރަކު 23 މިލިއަން ޓަނުގެ އަނބު އުފައްދަ އެވެ. މިއީ އެ ގައުމުގައި އުފައްދާ މޭވާގެ ޖުމްލަ މިންވަރުގެ ގާތްގަނޑަކަށް ފަސްބައިކުޅަ އެއްބައެވެ.

ނަމަވެސް، ފަހަކަށް އައިސް ގިނަ ދަނޑުވެރިންނަށް އަނބު ހެއްދުމަކީ ބޮޑު ގޮންޖެހުމަކަށް ވަނީ ވެފައެވެ.

"އަނބު ދަނޑުވެރިކަމަކީ މިހާރު ލަފާކުރަން ނޭނގޭ ކަމަކަށް ވެއްޖެ،" އުތުރުގެ އުއްތަރަ ޕްރަދޭޝް ސްޓޭޓްގެ މަލީހްއާބާދުގައި 16 އޭކަރުގެ ބިމެއްގައި ދަނޑުވެރިކަން ކުރާ އުޕެންދްރަ ސިންގް ބީބީސީ އަށް ބުންޏެވެ.

އޭނާއަކީ އޭނާގެ އާއިލާގައި އަނބު ދަނޑުވެރިކަން ކުރާ ހަތަރުވަނަ ޖީލެވެ. އޭނާ ދަނޑުވެރިކަމުގެ މަސައްކަތް ފެށީ އުމުރުން އެންމެ 12 އަހަރުގައެވެ.

"މޫސުމީ ބަދަލުތަކުގެ ސަބަބުން، މާ އެޅުމާއި، މޭވާ އެޅުމާއި، އަދި އަނބު ބިނުމުގެ ވަގުތުތައް ކޮންމެ އަހަރަކު ވެސް ދަނީ ބަދަލުވަމުން،" މިހާރު އުމުރުން 62 އަހަރުގެ ސިންގް ބުންޏެވެ.

"މަސައްކަތަށް ހިނގާ ޚަރަދުތައް، އެއީ ފަނިފަކުސަ މަރާ ބޭހާއި، މަސައްކަތު މީހުންނާއި، ފެންދިނުމުގެ ޚަރަދުތައް ވަނީ އިންތިހާއަށް ބޮޑުވެފައި. އެކަމަކު ލިބޭ މޭވާގެ މިންވަރު ވަނީ މަދުވެފައި. ދަނޑުވެރިން އަނބު ދަނޑުތަކަށް ކުރާ ޚަރަދު ބޮޑުވެފައި، ލިބޭ އާމްދަނީ މިވަނީ ކުޑަވެފައި،" އޭނާ އިތުރަށް ކިޔައިދިނެވެ.

އިންޑިއާގެ އެކި ކަންކޮޅުތަކުގައި ގާތްގަނޑަކަށް 700 ބާވަތުގެ އަނބު ހައްދާއިރު، ކޮންމެ ސަރަހައްދެއްގައި ވެސް ވަކި ބާވަތެއް ބޮޑަށް މަގުބޫލެވެ. އެގޮތުން އުތުރު އިންޑިއާގައި 'ދަޝޭރީ' އަނބު އާންމުއިރު، މަހާރާޝްތުރާގައި 'އަލްފޮންސޯ' އަދި ބިހާރާއި ހުޅަނގު ބެންގޯލްގައި 'ލަންގްރާ' ގިނައިން ފެނެއެވެ.

"މޫސުމީ އާދަޔާޚިލާފު ބަދަލުތައް އާންމުވަމުން ދިއުމާއެކު، އަނބު ދަނޑުވެރިކަމަށް މިވަނީ ބޮޑު ނުތަނަވަސްކަމެއް ކުރިމަތިވެފައި،" ސެންޓްރަލް އިންސްޓިޓިއުޓް ފޯ ސަބްޓްރޮޕިކަލް ހޯޓިކަލްޗަރ (އައި.ސީ.އޭ.އާރް) ގެ ސައިންސްވެރިއެއް ކަމަށްވާ ޑރ. ހަރީ ޝަންކަރް ސިންގް ވިދާޅުވިއެވެ.

"އަނބަކީ ފިނިހޫނުމިނަށް ވަރަށް ބޮޑަށް ބަރޯސާވާ މޭވާއެއް،" އޭނާ ތަފްސީލުކޮށްދެއްވިއެވެ.

"ވޭތުވެދިޔަ އަހަރު، މާ އެޅުން އަވަސްވެ، ބާރުގަދަ ވައިގެ ސަބަބުން މޭވާ ބޮޑުވުމަށް ހުރަސް އެޅުނު. އަދި މާ އަވަހަށް މޭވާ ދޮންވުމުގެ ސަބަބުން ގިނަ އަދަދެއްގެ ގަސްކާނާ ބޭކާރުވެގެންދިޔަ.

"މި އަހަރު، އުތުރު އިންޑިއާގައި ފިނިހޫނުމިން ދަށްވެފައި އޮތް މުއްދަތު ދިގުވުމުގެ ސަބަބުން، މާ އެޅުން މުޅިން ލަސްވެގެންދިޔަ،" ސިންގް ވިދާޅުވިއެވެ.

ދަނޑުވެރިންނަށް ކުރިމަތިވާ މިފަދަ ގޮންޖެހުންތަކުން އަރައިގަތުމަށް އެހީތެރިވުމުގެ ގޮތުން، ތަފާތު ފިނިހޫނުމިންތަކަށް ކެތްކުރެވޭ އަދި ފަނިފަކުސައާއި ބަލިތަކަށް ހޭނިފައިވާ އާ ބާވަތްތަކުގެ އަނބު އުފެއްދުމުގެ މަސައްކަތް ދިރާސާވެރިން ދަނީ ކުރަމުންނެވެ.

ނަމަވެސް މިއީ ވަގުތު ހޭދަވާ މަސައްކަތެކެވެ. އަނބު ގަހެއް އުފަންވުމަށްފަހު، އެ ގަހުގައި މާ އެޅުމަށް ފަސް އަހަރާއި ދިހަ އަހަރާ ދެމެދުގެ މުއްދަތެއް ނަގައެވެ.

މީގެ އިތުރުން، އަނބު ގަހުގެ ބަޔޮލޮޖީގައި ހުންނަ އާދަޔާޚިލާފު ސިފައެއްގެ ސަބަބުން ވެސް ދަތިތައް ކުރިމަތިވެއެވެ. އެއީ އަނބު ގަހަކީ 'ހެޓެރޯޒައިގަސް' އެއްޗަކަށް ވުމެވެ. މީގެ މާނައަކީ އޭގެ އޮށުން ފަޅާ ގަސް، އޭގެ މައި ގަހާ އެއްގޮތްވުމަކީ ވަރަށް ނާދިރު ކަމެކެވެ.

"އަނބު އާލާކުރުމަކީ އެތައް ދިހަ އަހަރަކަށް ދެމިގެންދާ ސައިންޓިފިކް މަސައްކަތެއް. އެއީ ކުއްލިއަކަށް ގެނެވޭނެ އީޖާދެއް ނޫން،" ހަރީ ސިންގް ވިދާޅުވިއެވެ.

ޖެނެޓިކް ސައިންސްގެ އެހީގައި މިހާރު އެ މަސައްކަތް ދަނީ އަވަސްކުރެވެމުންނެވެ. އައި.ސީ.އޭ.އާރްގެ ސައިންސްވެރިންގެ ޓީމަކުން ވަނީ 2016 ވަނަ އަހަރު އަނބުގެ ޖީނޯމް ސީކުއެންސިންގް ހަދާފައިވާކަން އިއުލާންކޮށްފައެވެ.

އެ މީހުންގެ މަސައްކަތް މައިގަނޑު ގޮތެއްގައި އަމާޒުކުރީ 'އަލްފޮންސޯ' އަނބަށެވެ.

"އަނބުގެ ޖީނޯމް ސީކުއެންސިންގްގެ ސަބަބުން، މޭވާގެ ކުލައާއި، ވަހާއި، ފޮނިމީރުކަމާއި، މާ އަޅާ ގޮތާއި، މޫސުމަށް ކެތްކުރުމުގެ ގާބިލުކަމާއި އަދި ބަލިތަކަށް ދިފާއުވުމުގެ ބާރާ ގުޅުންހުރި ޖީންތައް ދެނެގަތުމަށް ދިރާސާވެރިންނަށް ފަސޭހަވޭ،" ހަރީ ސިންގް ވިދާޅުވިއެވެ.

އޭނާ ވިދާޅުވި ގޮތުގައި، މީގެ ސަބަބުން އާ ބާވަތްތައް އުފެއްދުމަށް ކުރިން ނަގާ 10 އަހަރާއި 20 އަހަރާ ދެމެދުގެ މުއްދަތު މިހާރު ވަނީ ވަރަށް ބޮޑަށް ކުރުވެފައެވެ.

ދަނޑުވެރިން ތިބީ އާ އީޖާދުތައް ބަލައިގަތުމަށް ތައްޔާރަށެވެ.

ޒަމާނީ ދަނޑުވެރިކަމުގެ އުސޫލުތަކުގެ ސަބަބުން ވެސް އެހީތެރިކަން ލިބެއެވެ.

މި ގޮތުން ގަސްތައް ކޮށުމުގެ ސައިންޓިފިކް ގޮތްތަކާއި، ގަހުގެ މަތީބައި ބަލަހައްޓާނެ ގޮތްތަކާއި، އަދި ގަސް ހެދިބޮޑުވުން ކޮންޓްރޯލްކުރާ މާއްދާތައް ބޭނުންކޮށްގެން ގަހުގެ ސައިޒު ކޮންޓްރޯލްކޮށް، މާ އަޅުވައި، އަދި އެއްވަރަކަށް މޭވާ ބިނުމުގެ މަސައްކަތް މި ގޮތުން ފާހާގަ ކުރެވެ އެވެ.

އައި.ސީ.އޭ.އާރް އިން ދަނީ ދަނޑުވެރިކަން ރަނގަޅު ކުރުމަށްޓަކައި އެކި އުސޫލުތައް ބޭނުންކުރުމަށް ދަނޑުވެރިންނަށް ހިތްވަރު ދެމުންނެވެ.

"ބޭގިންގް" ނުވަތަ އަނބުގައި ކޮތަޅު ހަރުކުރުމަކީ އާދައިގެ ނަމަވެސް ފައިދާހުރި އީޖާދެކެވެ. މީގައި މޭވާ ހެދެން ފަށާ ދުވަސްވަރު، ކޮންމެ މޭވާއެއްގައި ވަކިން، ވައި ދައުރުވާ ފަދަ ރައްކާތެރި ކޮތަޅެއް އޮޅާލެވެއެވެ.

"މި ގޮތް ބޭނުންކުރުމުން މޭވާގެ ވަށައިގެން ރައްކާތެރި މާހައުލެއް އުފެދި، ފަނިފަކުސަ އެޅުމާއި، ފަންގަސް ބަލިތަކާއި، މޭވާއަށް ލިބޭ ގެއްލުންތަކާއި، އަދި އިރުގެ ގަދަ ހޫނުން މޭވާ ރައްކާތެރިކޮށްދޭ،" އައި.ސީ.އޭ.އާރްގެ ޑިރެކްޓަރު ޑރ. ޓީ. ދަމޯދަރަން ވިދާޅުވިއެވެ.

އެ އިދާރާއިން ރެކޮމެންޑްކުރާ އަނެއް އުސޫލަކީ "ގާޑްލިންގް" އެވެ. މިއީ ގަހުގެ ވަކި އޮފިތަކެއްގެ ބޭރު ތޮށިގަނޑުން ހަނި ރިންގެއްގެ ބައްޓަމަށް ކޮށާ ނެގުމެވެ. މީގެ ސަބަބުން ގަހަށް ލިބޭ ޝޮކް ގެ ސަބަބުން، ގަހުގެ ހަކަތަ މާ އެޅުމަށާއި މޭވާ ބޮޑުވުމަށް ބޭނުން ކުރުން އިތުރުވެ އެވެ.

ދުވަސްވީ ދަނޑުތަކުގައި ހުންނަ މުސްކުޅި ގަސްތައް 14 ފޫޓާއި 18 ފޫޓާ ދެމެދުގެ އުސްމިނަކަށް ކޮށާލައިގެން، އެ ދަނޑުތަކަކީ އަލުން އާރޯ ދަނޑުތަކަކަށް ހެދިދާނެއެވެ.

"މިގޮތަށް އާރޯކުރުމުން، މާ އެޅުން ވަރަށް ބޮޑަށް ރަނގަޅުވެ، މޭވާގެ ސައިޒު ބޮޑުވެ، އަދި ގިނަ މޭވާތަކަކީ ބީ ނުވަތަ ސީ ގްރޭޑްގެ ބަދަލުގައި އޭ-ގްރޭޑްގެ މޭވާއަށް ވެގެންދޭ،" ހަރީ ސިންގް ވިދާޅުވިއެވެ.

ނީތީ ގޯޔަލްއަށް އަނބު ދަނޑުވެރިކަމަކީ ފުރަތަމަ ހޮބީއެކެވެ. މީގެ ދިހަ އަހަރު ކުރިން އޭނާ މަދު ގަސްތަކެއް އިންދީ ހަމައެކަނި ޝައުގުވެރިކަމެއް ހުރިލެއް ބޮޑުކަމުންނެވެ.

މިހާރު އޭނާގެ އަތުގައި މަހާރާޝްތުރާގެ އަލީބާގްގައި 27 އޭކަރުގެ ބިމެއްގައި 1،100 އަށްވުރެ ގިނަ ގަސް އެބަހުއްޓެވެ.

"ކުރީގެ އާދައިގެ ގޮތްތަކަށް ދަނޑުވެރިކަން ކުރުމުގެ ބަދަލުގައި، އަޅުގަނޑުމެން ބޭނުންކުރަނީ ސައިންޓިފިކް އުސޫލުތައް،" އޭނާ ބުންޏެވެ.

"އަޅުގަނޑުމެން ކޮންމެ މޫސުމެއް ފަށަނީ ފަސްގަނޑާއި ފަތްތައް ތަހުލީލުކޮށްގެން. އެހެން ނޫނީ ގަސްކާނާ އެޅުމަކީ ހަމައެކަނި ލަފާކުރުމެއް. ބޯރޯން އަދި ޒިންކް ފަދަ މައިކްރޯނިއުޓްރިއަންޓްސް އަކީ މޭވާ އެޅުމުގައި މުހިންމު ދައުރެއް އަދާކުރާ އެއްޗެހި، އެހެންކަމުން އެއަށް ފަރުވާކުޑަކުރުމުން ސީދާ އުފެއްދުންތެރިކަމަށް އަސަރުކުރޭ."

އޭނާ ދެން އެޅި ފިޔަވަޅަކީ ގަސްތައް ގްރީންހައުސްތަކަށް ބަދަލުކުރުމެވެ.

"އަޅުގަނޑުމެން މިހާރު ވާނީ ފިނިހޫނުމިން ކޮންޓްރޯލް ކުރެވޭ ގޮތަށް ގްރީންހައުސްތައް ހަދަން ފަށާފައި. އާ އީޖާދީ ގޮތްތައް ބޭނުން ނުކޮށްފިނަމަ އަޅުގަނޑުމެންނަށް ކުރިމަތިވާނީ ނިމުން."

ސަރަވަނަން އަޗާރީ ވެސް ގަބޫލުކުރާ ގޮތުގައި ގަސްތައް ނިވާކޮށްގެން ގެންގުޅުމަކީ ކާމިޔާބު އޮތް އޮތް ގޮތެވެ.

އަޗާރީއަކީ 13 ގައުމަކަށް އިންޑިއާގެ އަނބު އެކްސްޕޯޓްކުރާ 'ބެރީޑޭލް ފުޑްސް' ގެ ބާނީއެވެ.

ފަނިފަކުސަ އަކީ އޭނާގެ އެންމެ ބޮޑު އެއް ކަންބޮޑުވުމެވެ.

"ބޭރުގެ މާކެޓްތަކުގައި ފަނިފަކުސައަށް އެއްވެސް ފުރުސަތެއް ނޯވޭ. އިންސްޕެކްޓަރުންނަށް އެންމެ ފަންޏެއް ފެނުނަސް، މުޅި ޝިޕްމަންޓް އުކާލަން ޖެހޭ. މީގެ ސަބަބުން ބޮޑެތި ގެއްލުންތައް ކުރިމަތިވޭ،" އޭނާ ބުންޏެވެ.

މޫސުމީ ބަދަލުތަކުގެ ސަބަބުން ފަނިފަކުސަ ކޮންޓްރޯލްކުރުން މިވަނީ އުނދަގޫވެފައެވެ. ވާރޭ ވެހުމަށްފަހު ފްރުޓް ފްލައި އާލާވާއިރު، ވާރޭ ވެހޭ ގޮތް ލަފާކުރަން ނޭނގޭތީ، އަހަރުގެ އެކި ދުވަސްވަރު މި ސޫފިތައް ފެންނަން ފަށައެވެ.

"މޫސުމީ ބަދަލުތަކަކީ މިއަދު އަނބު އެކްސްޕޯޓްކުރުމަށް އޮތް އެންމެ ބޮޑު ނުރައްކާ،" އަޗާރީ ބުންޏެވެ.

އެހެންކަމުން، އަޗާރީ މިހާރު ދަނީ ބެރީޑޭލްގެ ދަނޑުތަކުގައި ގްރީންހައުސް ބޭނުންކޮށްގެން ތަޖުރިބާ ކުރަމުންނެވެ.

"ޖަޕާނާއި އިޒްރޭލު ފަދަ ގައުމުތަކުން މިހާރު ވެސް ދަނީ ގްރީންހައުސް އާއި ރައްކާތެރިކުރެވިފައިވާ ދަނޑުވެރިކަން ބޭނުންކުރަމުން. އެއީ އެ ގައުމުތަކަށް ވެސް މިފަދަ މޫސުމީ ގޮންޖެހުންތައް ކުރިމަތިވާތީ. އިންޑިއާގެ ދަނޑުވެރިން ވެސް، އެއްވަރެއްގައި ފެންވަރު ހިފަހައްޓައި އިތުބާރު ހުރި ގޮތެއްގައި އެކްސްޕޯޓް ކުރަން ބޭނުންނަމަ، މި މިސްރާބަށް ދާން ޖެހޭނެ."