މި މަސް ނިމުމުގެ ކުރިން އީޔޫ-އިންޑިއާ އެފްޓީއޭ ގައި ސޮއި ކުރެވިދާނެ

ވިލާތުގެ އިއްތިޙާދާއި އިންޑިއާއާ ދެމެދު ވެވޭ މިނިވަން ވިޔަފާރީގެ އެއްބަސްވުމު ގައި މި މަސް ނިމުމުގެ ކުރިން ސޮއި ކުރެވިދާނެ ކަމުގެ އުންމީދު އެބަ އޮތް ކަމަށް ޖަރުމަނުގެ ޗާންސެލަރ ފްރެޑްރިކް މާޒް ވިދާޅުވެއްޖެ އެވެ.

މާޒް މިހެން ވިދާޅުވީ އިންޑިއާގެ ބޮޑުވަޒީރު ނަރެންދުރަ މޯދީއާ ހޯމަ ދުވަހު ބައްދަލު ކުރެއްވުމަށް ފަހު ނޫސްވެރިންނާ ވާހަކަ ދައްކަވަމުންނެވެ.

އިންޑިއާގެ އަހުމަދުއާބާދަށް ކުރެއްވި ޒިޔާރަތެއްގައި މާޒް ވިދާޅުވީ، އެއްބަސްވުމުގެ ކަންކަން އެ މުއްދަތަށް ނިމިއްޖެ ނަމަ، ޔޫރަޕިއަން ކޮމިޝަނާއި ޔޫރަޕިއަން ކައުންސިލްގެ ރައީސުން މި މަސް ނިމޭ ކޮޅު އެއްބަސްވުމުގައި ސޮއި ކުރެއްވުމަށް އިންޑިއާ އަށް ވަޑައިގަންނަވާނެ ކަމަށެވެ. ޗާންސެލަރުކަމާ ހަވާލުވެ ވަޑައިގަތުމަށްފަހު އިންޑިއާ އަށް ކުރެއްވި ފުރަތަމަ ދަތުރުފުޅުގައި މާޒް ވިދާޅުވީ، ކޮންމެ ގޮތެއް ވިޔަސް މި އެއްބަސްވުން ހަގީގަތަކަށް ހެދުމަށްޓަކައި ކުރެވޭ މަސައްކަތަށް ބޮޑު ކުރިއެރުމެއް ލިބިގެންދާނެ ކަމަށެވެ.

ކުރިން ބެލެވިފައި އޮތީ މިދިޔަ އަހަރު ނިމުމުގެ ކުރިން މަޝްވަރާތައް ނިމޭނެ ކަމަށެވެ. ނަމަވެސް، ޖަރުމަނުގެ ސަރުކާރުގެ މަސްދަރުތަކާ ހަވާލީ ބޭރުގެ ނޫސްތައް ބުނާ ގޮތުގައި، މާޒް އާއި މޯދީއާ ދެމެދު ކުރެވުނު މަޝްވަރާ ތަކަށް ފަހު، ޖެނުއަރީ މަސް ނިމޭއިރު އެއްބަސްވުމުގައި ސޮއި ކުރެވޭނެ ކަމުގެ ބޮޑު އުންމީދެއް މިހާރު އެބަ އޮތެވެ.

އިންޑިއާގެ ވިޔަފާރިއާ ބެހޭ ވަޒީރު ޕިޔޫޝް ގޯޔާލް، ގުޖުރާތުގައި ބޭއްވި އެހެން އިވެންޓެއްގައި ވާހަކަ ދައްކަވަމުން ވިދާޅުވީ، އެއްބަސްވުން މިހާރު އޮތީ އެންމެ ފަހު މަރުހަލާގައި ކަމަށެވެ.

ޗައިނާ އާއި އެމެރިކާއާ ދެމެދު ހިނގަމުންދާ ވިޔަފާރީގެ ހަނގުރާމައިގެ ސަބަބުން، ކާރުގެ އުފެއްދުން ތަކަށް ބޭނުންވާ މައުދަންތައް ބޭރު ކުރުން ޗައިނާ އިން ކޮންޓްރޯލް ކުރުމާ ގުޅިގެން މިދިޔަ އަހަރު ޖަރުމަނުގެ ކާރު އުފައްދާ ކުންފުނި ތަކަށް ސަޕްލައި ޗެއިންގެ ދަތިތަކާ ކުރިމަތިލާން ޖެހުނެވެ.

އަދި ނެދަލޭންޑްސް ސަރުކާރުން ޗައިނާގެ ނެކްސްޕީރިއާ ކުންފުނީގެ ކޮންޓްރޯލް ނެގުމާ ގުޅިގެން، ޗައިނާ އިން ވަނީ ކާރު އުފެއްދުމަށް ބޭނު ންކުރާ ބައެއް ސެމީކޮންޑަކްޓަރުތަކަށް ވެސް ހުރަސް ތަކެއް ކުރިމަތި ކުރުވާފަ އެވެ.