ބުދަ ދުވަހު އައްޑޫ ހައި ސްކޫލުގެ ގްރޭޑް 12 ގެ ކްލާހެއްގައި ދަރިވަރަކާއި އިންޑިއާ ޓީޗަރަކާ ދެމެދު ހަމަނުޖެހުމެއް ހިނގައި ވީޑިއޯ ސޯޝަލް މީޑިއާގައި ދައުރުވަނީ
އައްޑޫ ހައިސްކޫލުގެ ގްރޭޑް 12 ގެ ކްލާހެއްގައި ހިނގައިދިޔަ މާރާމާރީގެ ވީޑިއޯގެ ސްކްރީން އިމޭޖެއް
އައްޑޫ ހައި ސްކޫލުގައި ކިޔަވަމުން އަންނަ ދަރިވަރަކާއި ބިދޭސީ ޓީޗަރަކާ ދެމެދު ހިނގި ހަމަނުޖެހުމާ ގުޅިގެން، އެ ދަރިވަރު ވެސް ސަސްޕެންޑުކޮށްފި އެވެ.
ރާއްޖެ އެމްވީ އަށް މައުލޫމާތު ލިބޭ ގޮތުގައި މި ހަމަ ނުޖެހުމާއި ގުޅިގެން ދަރުވަރު ސަސްޕެންޑް ކޮށްފައިވަނީ ބުރާސްފަތި ދުވަހު އެވެ. ބުދަ ދުވަހު މެންދުރު ފަހު ހިނގި މި ހަމަނުޖެހުމުގެ ވީޑިއޯ މިހާރު ސޯޝަލް މީޑިއާގައި ދަނީ ދައުރު ވަމުންނެވެ.
ސޯޝަލް މީޑިއާގައި ދައުރުވި 47 ސިކުންތުގެ ވީޑިއޯއަކުން ފެންނަ ގޮތުގައި ކުލާސްރޫމެއްގައި ފިރިހެން ދަރިވަރަކު ބިންމަތީ ވެއްޓި އޮއްވައި، ބިދޭސީ ޓީޗަރު އޮޅުލައިގަންނަ މަންޒަރެވެ. އެއަށްފަހު، ބިންމަތިން ތެދުވެ، ދަރިވަރު ޓީޗަރުގެ ކޮނޑުގައި ޖަހަން މަސައްކަތްކުރުމުން ޓީޗަރު ދަރިވަރު ދުރަށް ޖައްސަން އުޅުނު މަންޒަރު އެ ވީޑިއޯއިން ފެނެ އެވެ. އޭގެ ފަހުން ފިރިހެން ދަރިވަރު ޓީޗަރުގެ ގައިގައި ޖެހުމާއެކު، ރައްދުގައި ޓީޗަރު ކުއްޖާ ގައިގައި ބާރަށް އަތްލަ އެވެ. އަދި ދަރިވަރު ވެސް ފަހުން އަތްލަ އެވެ.
މިކަމާ ގުޅިގެން ވަރަށް ބޮޑު ބަހުސެއް ދިވެހި ސޯޝަލް މީޑިއާގައި ހިނގަމުން އަންނައިރު، ޓީޗަރަށް އެކަނި ފިޔަވަޅު އެޅުމުން ވަރަށް ގިނަ ބަޔަކު އެކަމަށް ފާޑުކި އެވެ.
މިއީ އައްޑޫ ހައި ސްކޫލުގެ ގްރޭޑް 12 ގެ ކްލާހެއް ގައި ހިނގި ހަދިސާ އެއް ކަމަށް ވަނީ މައުލޫމާތު ލިބިފަ އެވެ. ޓީޗަރަކީ އިންޑިއާ އަށް ނިސްބަތްވާ ޓީޗަރެކެވެ.
