ނިއު ރޭޑިއަންޓްގެ އެކަޑަމީ ފަށަން ނިންމައި، ބައިވެރިވުމަށް ހުޅުވާލައިފި

ނިއު ރޭޑިއަންޓް ސްޕޯޓްސް ކުލަބުގެ ފަރާތުން، އެ ކުލަބުގެ އެކަޑަމީ ރަސްމީކޮށް ފަށަން ނިންމައި އިއުލާން ކޮށްފި އެވެ. 

ނިއު ރޭޑިއަންޓުގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެކަން އިއުލާން ކޮށްފައި ވަނީ، އެ ކުލަބުގެ ޗެއަރމަން އަޙުމަދު މުބީން އެވެ. ނިއު ރޭޑިއަންޓުން ވަނީ އެކަޑަމީގައި ބައިވެރިވުމުގެ ފުރުސަތު ވެސް ހުޅުވާލައިފަ އެވެ. އެގޮތުން އެ ކުލަބުގެ އެކަޑަމީ ކުރިއަށް ގެންދިޔުމަށް ހަމަޖެހިފައި ވަނީ ދެ ޖިންސުގެ ކުދިންނަށް ހުޅުވާލައިގެންނެވެ. 

އެ ބައްދަލުވުމުގައި ވާހަކަ ދައްކަވަމުން ނިއު ރޭޑިއަންޓުގެ ޗެއަރމަން މުބީން ވިދާޅުވީ، އެ ކުލަބުގެ އެކަޑަމީ ކުރިއަށް ގެންދާނީ ސްޕެއިންގެ ކޯޗެއްގެ އިރުޝާދުގެ ދަށުން ކަމަށާއި، ކުރިއަށް އޮތް ދުވަސް ތަކުގެ ތެރޭގައި އޭނާ ރާއްޖެ އަންނާނެ ކަމަށެވެ. މިވަގުތު ނިއު ރޭޑިއަންޓުގެ ޓެކްނިކަލް ޑައިރެކްޓަރުގެ ގޮތުގައި ވެސް މަސައްކަތް ކުރަމުން އަންނަނީ ސްޕެއިންގެ ފްރެންސިސްކޯ މެނުއަލް ކައީންޒޮސް އެވެ. 

ނިއު ރޭޑިއަންޓުގެ ޓެކްނިކަލް ޑައިރެކްޓަރުގެ މަގާމަށް އޭނާ ހަމަޖައްސާފައި ވަނީ މިދިޔަ ޖަނަވަރީ މަހުގެ ތެރޭގަ އެވެ. މުބީން ވިދާޅުވީ ނިއު ރޭޑިއަންޓުގެ އެކަޑަމީގެ ކަންކަން ބެލެހެއްޓުމުގައި އިސްކޮށް މަސައްކަތް ކުރާނީ ވެސް އޭނާ ކަމަށެވެ. އެއާ އެކު، އެ ކުލަބުގެ އެކަޑަމީގެ ސެޝަންތައް ކުރިއަށް ގެންދާނީ ސްޕެއިން އިން ގެންނަ ކޯޗެވެ. އޭނާ އާއެކު، އެކަޑަމީގައި ދިވެހި ކޯޗުން ވެސް މަސައްކަތް ކުރާނެ ކަމަށް މުބީން ވަނީ ވިދާޅުވެފަ އެވެ. 

މީގެ ކުރިން ވެސް ނިއު ރޭޑިއަންޓުން ވަނީ އެ ކުލަބުގެ އެކަޑަމީ ކުރިއަށް ގެންގޮސްފަ އެވެ. މިފަހަރު ވެސް ނިއު ރޭޑިއަންޓުން އެ ކުލަބުގެ އެކަޑަމީ ފަށަން އިއުލާން ކޮށްފައިވާއިރު، މުބީން ވިދާޅުވީ އެކަޑަމީ ފަށަން އިއުލާން ކުރީ އެކަމަށް ވާން ޖެހޭ ހުރިހާ ތައްޔާރީ ތަކެއް ވުމަށް ފަހު ކަމަށެވެ. އެ ކުލަބުން ނިންމާފައި ވަނީ ބޭރުގެ މޮޑެލް އަކަށް ބަލައިގެން އެކަޑަމީ ކުރިއަށް ގެންދިޔުމަށެވެ. 

ނިއު ރޭޑިއަންޓުގެ ޗެއަރމަން ކަމުގެ މަގާމަށް މުބީން އިންތިޚާބު ކޮށްފައި ވަނީ 2024 ވަނަ އަހަރުގެ ނޮވެމްބަރު މަހުގެ ތެރޭގަ އެވެ. އޭގެ ފަހުން މުބީން އާއި، އޭނާގެ ޓީމުން އަންނަނީ ނިއު ރޭޑިއަންޓު އަލުން ކޮޅަށް ޖެހުމަށް ގިނަ މަސައްކަތް ތަކެއް ކުރަމުންނެވެ. ފުރަތަމަ ޑިވިޝަންގައި ނިއު ރޭޑިއަންޓުން ވާދަ ކުރަމުން އަންނައިރު، ޓީމު ވަރުގަދަ ކުރުމަށް އަންނަނީ ގިނަ މަސައްކަތް ތަކެއް ކުރަމުންނެވެ.