ނިއު ރޭޑިއަންޓުގެ އުސޫލާ ޚިލާފުވި ކުޅުންތެރިންނަށް ބޮޑު ޖޫރިމަނާއެއް

ފުރަތަމަ ޑިވިޝަންގައި ވާދަ ކުރަމުން އަންނަ ނިއު ރޭޑިއަންޓް ސްޕޯޓްސް ކުލަބުގެ އުސޫލު ތަކާ ޚިލާފުވި ކުޅުންތެރިން އެ ކުލަބުން ބޮޑު ޖޫރިމަނާއެއް ކޮށްފި އެވެ.

ނިއު ރޭޑިއަންޓްގެ ފަރާތުން ބޭއްވި ނޫސްވެރިންގެ ބައްދަލުވުމުގައި އެ ކުލަބުގެ ޗެއާމަން އަޙުމަދު މުބީން ވިދާޅުވީ، ގޯލްޑް ފުޓްސަލް ޗެލެންޖުގައި ނިއު ރޭޑިއަންޓްގެ ބައެއް ކުޅުންތެރިންނަށް ނުކުޅެވިގެން ބައެއް ފަރާތްތަކުން އެ ކަންބޮޑުވުން ފާޅު ކޮށްފައިވާ ކަމަށެވެ. އެކަމުގައި ކުލަބުން ގެން ގުޅޭ ސްޓޭންޑަކާ ގުޅޭ ގޮތުން ގިނަ ބަޔަކު ސުވާލު ކުރަމުން އަންނަ ކަމަށް މުބީން ވިދާޅުވި އެވެ.

އެގޮތުން މުބީން ވިދާޅުވީ ނިއު ރޭޑިއަންޓްގެ ސްޓޭންޑަކީ އެ ކުލަބުގެ އެއްވެސް ކުޅުންތެރިޔަކު، އެ ކުލަބުން ވާދަ ކުރާ މުބާރާތެއް ނޫން އެހެން އެއްވެސް މުބާރާތެއްގައި ނުކުޅޭނެ ކަމަށެވެ. ނިއު ރޭޑިއަންޓް އިން ހަދާފައިވާ އެންމެހާ އުސޫލު ތަކެއްގައި ވެސް އެ ވާހަކަ ވަރަށް ރަނގަޅަށް ހިމަނާފައި ވާނެ ކަމަށް މުބީން ވިދާޅުވި އެވެ.

އެ އުސޫލާ ޚިލާފަށް ނިއު ރޭޑިއަންޓްގެ ބައެއް ކުޅުންތެރިން ގޯލްޑަންގެ އިތުރުން، އެހެން މުބާރާތް ތަކެއްގައި ވެސް ކުޅެފައިވާ ކަަމަށް މުބީން ފާހަގަ ކުރެއްވި އެވެ. އެގޮތުން އެ ފަސް ކުޅުންތެރިންނަަށް ވެސް ނިއު ރޭޑިއަންޓް އިން މިހާރު ފިޔަވަޅު އަޅާފައިވާ ކަަމަށާއި، އެ ކުޅުންތެރިން ޖޫރިމަނާ ކޮށްފައިވާ ކަމަށް މުބީން ވިދާޅުވި އެވެ. 

މީގެ އިތުރުން މުބީން ވިދާޅުވީ، ގޯލްޑަން ފުޓްސަލް ޗެލެންޖަށް ވަރަށް ބޮޑަށް ތާއީދު ކުރައްވާ ކަމަށާއި، ކުޅުންތެރިން އެ ކުޅުންތެރިން ރަށް ތަމްސީލު ކުރުމުގެ ފުރުސަތު އޮންނަން ވެސް ބޭނުންވާ ކަމަށެވެ. އެހެން ނަމަވެސް، ކުރިއަށްދާ ސީޒަންގައި އެއް މެޗާއި، އަނެއް މެޗާ ދޭތެރޭގައި އޮންނަނީ މަދު ދުވަސް ކޮޅެއް ކަމަށް މުބީން ފާހަގަ ކުރެއްވި އެވެ. އެހެންވެ، އެ މެޗު ނިންމުމަށް ފަހު، ރިކަވަރީ ކުރިއަށް ގެންގޮސް، އަދި ފަރިތަކުރުން ކުރިއަށް ގެންދިޔުމަށް ފަހު، ދެން އޮންނަ މެޗަށް ފުރިހަމަ އަށް ތައްޔާރުވާން އޮންނަނީ މަދު ވަގުތު ކޮޅެއް ކަމަށް މުބީން ވިދާޅުވި އެވެ. 

އަޅުގަނޑުމެން ވެސް ވަރަށް ބޮޑަށް ބޭނުންވޭ މި ކުޅުންތެރިންނަށް، އެ ކުޅުންތެރިންގެ ރަށް ތަމްސީލު ކުރެވޭނެ ގޮތަކަށް މިކަން ވެގެން އަންނަން. އެކަމަކު ސީޒަންގެ ތެރޭގައި އެއް މެޗާއި، އަނެއް މެޗާ ދޭތެރޭގައި މި ލިބެނީ ގާތް ގަނޑަކަށް ޕްރެކްޓިސްކޮށްލަން މި ލިބެނީ ފަސް ވަރަކަށް ދުވަސް، ނޫނީ ހަ ދުވަސް. އެންމެ ގިނަވެގެން ވެސް ލިބޭނީ ގާތް ގަނޑަކަށް ފަސް ދުވަސް. މެޗެއް ނިންމާފައި ރިކަވަރީ ޓްރެއިނިންއެއް އޮވެފައި، އޭގެ ތެރެއިން ތިން ދުވަހު ކޯޗު ރަނގަޅު، ހާޑު ޓްރެއިނިން ތަކެއް މި ގެންދަނީ، އެ މެޗެއްގައި ހެދުނު މިސްޓޭކްތައް ރަނގަޅު ކުރުމަށާއި، ޖެހިގެން އަންނަ ހަފުތާގައި، ޖެހިގެން އަންނަ މެޗުގައި ކުޅެން ޖެހޭ ޓީމުގެ ހުރި ކަންކަން ބަލައިގެން އެއަށް ތައްޔާރުވާން މި ލިބެނީ ގާތް ގަނޑަކަށް ހާޑު ތިން ޓްރެއިނިން ވަރު. އަނެއް ދުވަސް ވެގެން މި ދަނީ މެޗު ޑޭ އަށް ތައްޔާރުވާ ފޯމް އަޕް ޓްރެއިނިން އަކަށް. ޖުމުލަ ތިން ޓްރެއިނިންގެ ތެރެއިން، މި މުބާރާތް ކުޅެން ނޫނީ، އެކި އެކި ކަންކަމުގައި މި އުޅޭ ކުދިންނަށް އަޅުގަނޑުމެންގެ ޓްރެއިނިން ތަކުގައި ބައިވެރި ނުވެވި މި ތިބެނީ. އެ ކުދިންގެ ޕާފޮމެންސް ރަނގަޅަށް ނުދެއްކި.

އަޙުމަދު މުބީން / ނިއު ރޭޑިއަންޓްގެ ޗެއާމަން

އެއާ އެކު، ނިއު ރޭޑިއަންޓްގެ ކުޅުންތެރިން އެހެން މުބާރާތެއް ކުޅުމަށް އެ މުއްދަތުގެ ތެރޭގައި ގޮސްފި ނަމަ، އެ ކުޅުންތެރިންނަށް ނިއު ރޭޑިއަންޓްގެ ފަރިތަކުރުން ތަކުގައި ބައިވެރި ނުވެވޭ ކަމަށާއި، އެކަމުގެ ސަބަބުން ކުޅުންތެރިންގެ އެންމެ ރަނގަޅު ކުޅުން ނުފެންނަ ކަމަށް މުބީން ވިދާޅުވި އެވެ. ކުލަބުން ބޮޑު ހޭދައެއް ކުރަމުން އަންނައިރު، އެ ފަރިތަކުރުންތައް ކުރިއަށް ނުގެންގޮސް ރަނގަޅު ނަތީޖާއެއް ހޯދުމަކީ އުނދަގޫ ކަމެއް ކަމަށް މުބީން ފާހަގަ ކުރެއްވި އެވެ. 

ހަމަ އެއާ އެކު މުބީން ވިދާޅުވީ، ނިއު ރޭޑިއަންޓްގެ އުސޫލުތައް ޤަބޫލުކޮށް، އެއާ ޚިލާފަށް ނުކުޅެ ތިބި ކުޅުންތެރިން ވެސް ކުލަބުގައި ތިބި ކަމަށެވެ. އެކަމުގައި ވަރަށް ގިނަ ރަށް ރަށުން ޝަކުވާ ވެސް ލިބޭ ކަމަށާއި، ނަމަވެސް ނިއު ރޭޑިއަންޓް އިން އެ ކުލަބުން ކުރަމުން އަންނަ މަސައްކަތް ހުއްޓައި ނުލެވޭނެ ކަމަށް ވެސް މުބީން ވިދާޅުވި އެވެ. 

ނިއު ރޭޑިއަންޓްގެ އުސޫލާ ޚިލާފުވުމުގެ ސަބަބުން، އެ ކުލަބުން ޖޫރިމަނާ ކުރި ކުޅުންތެރިންގެ ތެރޭގައި ހިމެނެނީ މުޙައްމަދު ރާއިފް ފަޒީލް އާއި، ޢަބްދުﷲ ޒިމާމް އާއި، އަހުނަފް ރަޝީދު އާއި، އަލީ ފާސިރު (ސެންޓޭ) އަދި އަޒޫމް އެވެ.