އެވޯޑުގެ ނޮމިނޭޝަން އަށް ވީއޭއެމް އިން "ހުސް ގަނޑެއް" ފޮނުވުމުގެ ސަބަބުން، އަދީލް ކޯޗު ނޮމިނޭޓު ނުވި

މި މަހު އޮތް މޯލްޑިވްސް ސްޕޯޓްސް އެވޯޑްސްގެ އެންމެ މޮޅު ކޯޗުގެ ނޮމިނޭޝަން އަށް، ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން "ހުސް ގަނޑެއް" ފޮނުވުމުގެ ސަބަބުން، ތަޖުރިބާކާރު ވޮލީ ކޯޗު އަޙުމަދު އަދީލް (ބޭބެ ކޯޗު) އެވޯޑަށް ނޮމިނޭޓު ނުވި މައްސަލަ ފެންމަތިވެއްޖެ އެވެ. 

މިދިޔަ އާދީއްތަ ދުވަހުގެ ރޭ އޮތް އެވޯޑު ޙަފްލާ އަށް ފަހު އަދީލް ކޯޗު ވަނީ އޭނާގެ ސޯޝަލް މީޑިއާގައި ޕޯސްޓެއް ހިއްސާ ކޮށްފަ އެވެ. އެ ޕޯސްޓުގައި އޭނާ ބުނެފައި ވަނީ، ކަމާ ގުޅުން ހުރި އެސޯސިއޭޝަން ތަކުން ނުވަތަ، ކަމާ ގުޅުން ހުރި ފަރާތް ތަކުގެ އިހުމާލުން، އެވޯޑަށް ހުށަހަޅަން ޖެހޭ ލިޔެ ކިޔުންތައް ހުށަހަޅާފައި ނުވާއިރު، އޭގެ ޒިންމާ އުފުލަން ޖެހެނީ ކޮން ފަރާތަކުންތޯ އެވެ. 

އެ ޕޯސްޓުގައި އަދީލް ކޯޗު ވަނީ 2024 ވަނަ އަހަރު އޭނާ ހޯދާފައިވާ ކާމިޔާބީތައް ވެސް ހިމަނައިފަ އެވެ. އެގޮތުން ވޮލީބޯލް އެސޯސިއޭޝަން ކަޕްގެ އަންހެން ޑިވިޝަންގެ ޗެމްޕިއަންކަން ކުލަބު ވެމްކޯއާ އެކު ހޯދިއިރު، އެ މުބާރާތުގެ އެންމެ މޮޅު ކޯޗަކީ އަދީލް އެވެ. އެ އަހަރު އޮތް ކާވާ އަންހެން ވޮލީ ބޯޅަ ޗެމްޕިއަންޝިޕްގައި ވެމްކޯއާ އެކު ވާދަކޮށް، އަދީލް ވަނީ ވެމްކޯ އަށް ބްރޯންޒް މެޑަލް ހޯދައިދީފަ އެވެ.

މީގެ އިތުރުން ޤައުމީ އަންހެން ވޮލީ ލީގުގެ ޗެމްޕިއަންކަން ހޯދިއިރު، ލީގުގެ އެންމެ މޮޅު ކޯޗަކީ ވެސް އަދީލް އެވެ. މީގެ އިތުރުން ޤައުމީ މުބާރާތުގެ ޗެމްޕިއަންކަން ހޯދައިދީ، އެ މުބާރާތުގެ ވެސް އެންމެ މޮޅު ކޯޗުގެ މަގާމު އަދީލް ހޯދި އެވެ. އެ އަހަރު އޮފީސް ތަކުގެ މެދުގައި އޮތް ވޮލީ މުބާރާތް ވެސް އަދީލްގެ އިރުޝާދުގެ ދަށުން ވެމްކޯ އިން ކާމިޔާބު ކުރިއިރު، އެ މުބާރާތުގެ އެންމެ މޮޅު ކޯޗަކީ ވެސް އަދީލް އެވެ.

މީގެ އިތުރުން ކާވާ އަންހެން ވޮލީ ބޯޅަ ޗެލެންޖް ކަޕްގެ ރިހި މެޑަލް ހޯދިއިރު، ކާވާ ނޭޝަންސް ލީގުގައި ވެސް ބައިވެރިވެފައިވެ އެވެ. 

މައުލޫމާތު ލިބިފައިވާ ގޮތުގައި އެވޯޑަށް ނަން ހުށަހެޅުމަށް އަދީލް ކޯޗު ވަނީ މި ހުރިހާ މައުލޫމާތެއް ވީއޭއެމް އިން އެދިގެން، އެ އެސޯސިއޭޝަންއާ ވެސް ހިއްސާ ކޮށްފަ އެވެ. ނަމަވެސް، ވީއޭއެމްގެ ފަރާތުން އެވޯޑު ކޮމެޓީ އަށް ނަންތައް ފޮނުވިއިރު، އަދީލްގެ ނަމުގައި ފޮނުވާފައި އޮތީ ހުސް ގަނޑެއް ކަމަށް މައުލޫމާތު ލިބިފައިވެ އެވެ. 2024 ވަނަ އަހަރު އަދީލް ކޯޗު ހޯދާފައިވާ ކާމިޔާބީ ތަކަށް ބަލާއިރު، އެވޯޑުގެ ގަދަ ތިނެއްގައި އޭނާ ހިމެނޭނެ ކަމަށް ގިނަ ބަޔަކު ޤަބޫލު ކުރެ އެވެ. 

މީގެ އިތުރުން ވީއޭއެމް އިން އެވޯޑު ކޮމެޓީ އަށް ލިސްޓު ފޮނުވި ފަހުން، އެވޯޑު ކޮމެޓީ އިން އެސޯސިއޭޝަންތަކާ ބައްދަލު ކުރިއިރު ވީއޭއެމްއާ ވެސް ބައްދަލު ކޮށްފައިވެ އެވެ. ނަމަވެސް، އެ ބައްދަލުވުމުގައި ވެސް ވީއޭއެމް އިން އެފަދަ ކަމެއް ފާހަގަ ކޮށްފައި ނުވެ އެވެ. ނަމަވެސް، ނޮމިނޭޝަންގެ ފަހުން ޝަކުވާ ތަކެއް ލިބުމާ އެކު، އެވޯޑު ކޮމެޓީ އިން ވަނީ އަނެއްކާ ވެސް ވީއޭއެމްގައި އެ މައުލޫމާތަށް އެދިފަ އެވެ. އެއާ އެކު ވީއޭއެމް އިން ހިއްސާ ކުރި މައުލޫމާތުގައި އަދީލް ކޯޗުގެ ކާމިޔާބީތައް ހިމަނާފައިވެ އެވެ. 

ނަމަވެސް، އޭރު އެވޯޑު ހަފްލާ ބާއްވަން 24 ގަޑިއިރަށް ވަގުތު ކުޑަތަންވެ، އެވޯޑަށް ކުރިމަތިލުމުގެ މުއްދަތު ހަމަވެފައި އޮތުމުން، ނޮމިނޭޝަން އަށް ބަދަލު ނުގެނެވޭނެ ކަމަށް އެވޯޑު ކޮމެޓީ އިން ނިންމާފައިވެ އެވެ. މިއީ ވީއޭއެމްގެ އިހުމާލުން ވީ ކަމެއް ކަމަށް ބުނެ، ގިނަ ބަޔަކު އަންނަނީ އެ އެސޯސިއޭޝަން އަށް ފާޑު ކިޔަމުންނެވެ.