ސޮފްވާން، އަންހެން ވޮލީ ޓީމުގެ ކޯޗުކަމުން ސަސްޕެންޑު ކޮށްފި

ސީނިއާ ޤައުމީ އަންހެން ވޮލީ ބޯޅަ ޓީމުގެ ކޯޗު ކަމުގެ މަގާމުގައި ހުރި ސޮފްވާން އަޙުމަދު، މަޤާމުގެ މަސްއޫލިއްޔަތު ތަކުން ސަސްޕެންޑުކޮށް، އެކަހެރި ކޮށްފި އެވެ.

އިތުބާރު ހުރި މަސްދަރަކު މައުލޫމާތު ލިބިފައިވާ ގޮތުގައި، ވޮލީ ބޯޅަ އެސޯސިއޭޝަން އޮފް މޯލްޑިވްސް (ވީއޭއެމް) އިން ވަނީ އަންހެން ޓީމުގެ ކޯޗުކަމުގެ މަސްއޫލިއްޔަތު ޔަކުން ސޮފްވާން އެކަހެރި ކޮށްފަ އެވެ. ވީއޭއެމް އިން އެ ނިންމުން ނިންމާފައި ވަނީ، ސޮފްވާންއާ ގުޅުން ހުރި މައްސަލަ ތަކެއް ބަލަމުން އަންނާތީ ކަމަށް ވެސް މައުލޫމާތު ލިބިފައިވެ އެވެ.

އެކަމާ ގުޅޭ ގޮތުން ވީއޭއެމްގެ ރަސްމީ މީޑިއާ ގުރޫޕުގައި ނޫސްވެރިން ވަނީ އެކަމުގެ ސުވާލު ކޮށްފަ އެވެ. އެގޮތުން ސޮފްވާންގެ މައްޗަށް ކުރެވޭ ތުހުމަތާއި، އެކަމުގެ މައުލޫމާތު ސާފު ކޮށްދިނުމަށް ނޫސްވެރިިޔަކު ސުވާލު ކޮށްފަ އެވެ. އަދި ވީއޭއެމްގެ ރައީސް މުޙައްމަދު ލަޠީފް ކޮމްޕްރޮމައިޒް ވެފައި ހުރި ނަމަ، ޖަވާބު ދެވޭނެ ފަރާތެއް ދެއްކުމަށް ވެސް ވަނީ އެދިފަ އެވެ.

އެ ސުވާލާ ގުޅިގެން ވީއޭއެމްގެ ރައީސް ލަތީފް ވަނީ، ވީއޭއެމްގެ މީޑިއާ ގުރޫޕުގައި މެސެޖު ނުކުރެވޭ ގޮތަށް ސެޓިން ބަދަލު ކޮށްފަ އެވެ. އަދި ގުރޫޕުގައި މެސެޖު ލިޔެވޭނީ ހަމައެކަނި ގުރޫޕުގެ އެޑްމިންގައި ތިބި މީހުންގެ ގޮތަށް ވަނީ ބަދަލު ކޮށްފަ އެވެ.

އެއަށް ފަހު ގުރޫޕުގައި ލިޔުއްވި މެސެޖެއްގައި ލަތީފް ވިދާޅުވެފައި ވަނީ، ކޮމްޕްރޮމައިޒް ވެފައި ނެތް ކަމަށެވެ. އެކަން ފާހަގަކޮށް ލަތީފް ވިދާޅުވީ، މީހެއް ނަން ބޭނުން ކޮށްގެން ޖަވާބެއް ދެވޭނީ ކަންކަން ބެލުމަށް ފަހު ކަމަށެވެ.

މީގެ އިތުރުން އަންހެން ކުދިން އަދި ފިރިހެން ކުދިންނަށް ވެސް އެއްވެސް ބިރުވެރި ކަމެއް ނެތި ޤައުމީ ޓީމު އަދި ވީއޭއެމްގެ ހަރަކާތްތަކުގައި އުޅެވޭނެ މާހައުލެއް އޮންނާނެ ކަމަށް ލަތީފް ވަނީ ވިދާޅުވެފަ އެވެ.

ހަމަ އެހެންމެ، އެއްވެސް ކަމެއް ދިމާ ވެއްޖެ ނަމަ، އެކަމެއް ބެލުމަށް ފަހު އަޅަން ޖެހޭ ފިޔަވަޅެއް އަޅާނެ ކަމުގެ ޔަގީންކަން ދެއްވާ ކަމުގައި ވެސް ގުރޫޕުގައި ލަތީފް ވަނީ ވިދާޅުވެފަ އެވެ.

ޤައުމީ އަންހެން ޓީމުގެ ކޯޗުކަމުގެ މަސްއޫލިއްޔަތު ތަކުން ސޮފްވާން އެކަހެރި ކޮށްފައިވާއިރު، މިވަގުތު ޓީމުގެ ފަރިތަކުރުންތައް ކުރިއަށް ގެންދަމުން އަންނަނީ މުޙައްމަދު ނަދީމް (ނަދީމްބެ)ގެ އިރުޝާދުގެ ދަށުންނެވެ.