ޒުވާން ކުޅުންތެރިޔާގެ ތިން ވަނަ ރައީސް މުޢިއްޒުގެ ދަރިކަލުން އުމެއިރު އަށް، ގަދަ ތިނެއްގައި އިޔާން ނެތުމުން ސުވާލު ތަކެއް

މޯލްޑިވްސް ސްޕޯޓްސް އެވޯޑްސްގެ އެންމެ މޮޅު ފިރިހެން ޒުވާން ކުޅުންތެރިޔާގެ މަގާމުގެ ތިން ވަނަ، ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ދަރިކަލުން އުމެއިރު މުޙައްމަދު މުޢިއްޒު އަށް ލިބިއްޖެ އެވެ.

އާދީއްތަ ދުވަހުގެ ރޭ އޮތް އެވޯޑު ޙަފްލާގައި ޒުވާން ކުޅުންތެރިޔާގެ ތިން ވަނަ އުމެއިރު ހޯދިއިރު، އެންމެ މޮޅު ޒުވާން ކުޅުންތެރިޔާގެ އެއް ވަަނަ ހޯދީ މުޙައްމަދު ރިހާން ޝިހާމް އެވެ. އެންމެ މޮޅު ޒުވާން ކުޅުންތެރިޔާގެ ދެ ވަނަ ހޯދީ ޒީކް ޙަސަން ލަޠީފް އެވެ. 

ޓޭބަލް ޓެނިސް (ޓީޓީ) އިން ނޮމިނޭޓުވެ, ޒުވާން ކުޅުންތެރިޔާގެ ތިން ވަނަ ރައީސް މުޢިއްޒުގެ ދަރިކަލުން އުމެއިރު  ހޯދިއިރު، މިއީ ރާއްޖޭގެ ރައީސެއްގެ ދަރިކަލުންނަށް މިފަދަ އެވޯޑެއް ލިބުނު ފުރަތަަ ފަހަރެވެ. އެވޯޑުގެ ކުރިން ވެސް، ނޮމިނޭޝަންތަކާ މެދު ގިނަ ބަޔަކު ވަނީ ސުވާލު އުފައްދައިފަ އެވެ. 

މީގެ އިތުރުން އެންމެ މޮޅު ޒުވާން ކުޅުންތެރިޔާގެ މަގާމަށް ނޮމިނޭޓުވީ ބޯޑި ބޯޑަރު އިޔާން އަޙުމަދު ގަދަ ތިނެއްގައި ނެތުމުން ގިނަ ބަޔަކު ވަނީ ސުވާލު އުފައްދައިފަ އެވެ. އެގޮތުން 2024 ވަނަ އަހަރު އިޔާން ވަނީ ބޮޑީ ބޯޑިންގެ ޤައުމީ މުބާރާތުގައި ވާދަކޮށް ރަނގަޅު ނަތީޖާ ތަކެއް ނެރެފައި ކަމަށާއި، އެވޯޑުގެ ގަދަ ތިނެއްގައި އިޔާން ހިމެނިފައި ނެތުމުން ސުވާލު އުފެދޭ ކަމަށް ގިނަ ބަޔަކު ބުނެފައިވެ އެވެ.

އެގޮތުން 2024 ވަނަ އަހަރު އިޔާން ވަނީ ޤައުމީ ބަނޑު ފިލާ ޗެލެންޖު ކާމިޔާބު ކޮށްފަ އެވެ. ޒުވާން އެތުލީޓުން އިޔާން އެ މުބާރާތް ކާމިޔާބު ކޮށްފައި ވަނީ ފައިނަލްގައި ސީނިއާ އެތުލީޓު އަަލީ ޖާވިދު (ޖާއްޓެ) ބަލިކޮށްފަ އެވެ. އިޔާން އަކީ ޤައުމީ ބަނޑުފިލާ ޗެލެންޖު ކާމިޔާބު ކުރި އެންމެ ޒުވާން އެތުލީޓެވެ.

މިއަހަރުގެ ސްޕޯޓްސް އެވޯޑްސްގެ ނޮމިނޭޝަންތަކާ މެދު މީގެ ކުރިން ވެސް ގިނަ ބަޔަކު ވަނީ ސުވާލު އުފައްދައި، އިންސާފުވެރި ނޫން ކަމަށް ބުނެފަ އެވެ.