2024 ވަނަ އަހަރުގެ ސްޕޯޓްސް އެވޯޑްސް، 2026 ވަނަ އަހަރު

ކުޅިވަރު ކުޅުންތެރިންނާއި، ޚިދުމަތްތެރިންގެ އަގު ވަޒަން ކުރުމުގެ ގޮތުން ދެމުން އަންނަ، މޯލްޑިވްސް ސްޕޯޓްސް އެވޯޑްސް އަންނަ ފެބްރުވަރީ މަހުގެ 15 ގައި ބާއްވަން ނިންމައިފި އެވެ.

ސްޕޯޓްސް އެވޯޑްސްގެ ރަސްމީ ސޯޝަލް މީޑިއާ އެކައުންޓު ތަކުން ކޮށްފައިވާ ވީޑިއޯ ޕޯސްޓެއްގައިި ވަނީ، އަންނަ ފެބްރުވަރީ މަހުގެ 15 ވަނަ ދުވަހު އެވޯޑު އޮންނާނެކަން އިއުލާން ކޮށްފަ އެވެ. 

ކުޅިވަރު ވުޒާރާ އިން ބުނެފައިވާ ގޮތުގައި މި ހިނގާ 2026 ވަނަ އަހަރުގެ ފެބްރުވަރީ 15 ގައި ބޭއްވުމަށް ހަމަޖެހިފައި ވަނީ، 2024 ވަނަ އަހަރުގެ އެވޯޑު ހަފްލާ އެވެ. އެގޮތުން 2024 ވަނަ އަހަރުގެ އެވޯޑު ހަފްލާ މިދިޔަ އަހަރު ބާއްވަން އޮތް ނަމަވެސް، އެކި އެކި ސަބަބުތަކާ ހުރެ ފަސްވެފައިވާ ކަމަށް އެ ވުޒާރާ އިން މީޑިއާ ތަކަށް މައުލޫމާތު ދެމުން ވަނީ ބުނެފަ އެވެ. 

އެހެންކަމުން، 2024 ވަނަ އަހަރުގެ އެވޯޑު ހަފްލާ ފެބްރުވަރީ 15 ގައި ބޭއްވުމަށް ފަހު، 2025 ވަނަ އަހަރުގެ އެވޯޑު ހަފްލާ މިއަހަރުގެ ފަހު ކޮޅު ބާއްވަން މަސައްކަތް ކުރަމުން އަންނަ ކަމަށް ވެސް ކުޅިވަރު ވުޒާރާ އިން ވަނީ ބުނެފަ އެވެ. އެވޯޑު ހަފްލާ ނުބޭއްވުނު ސަބަބެއް ކުޅިވަރު ވުޒާރާ އިން ހާމަ ކޮށްފައި ނުވެ އެވެ. 

މޯލްޑިވްސް ސްޕޯޓްސް އެވޯޑްސްގެ ނަމުގައި އެވޯޑު ތައާރަފު ކުރީ، ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގަ އެވެ. އެގޮތުން 2022 ވަނަ އަހަރާއި، 2023 ވަނަ އަހަރު ވަނީ ދުނިޔޭގެ އެކި ކުޅިވަރު ތަކުން ފާހަގަ ކޮށްލެވޭ ތަރިންނާއި، ލެޖެންޑުންނާ އެކު އެވޯޑު ބާއްވައިފަ އެވެ. އަދި އެ އެވޯޑު ހަފްލާ އަށް ވަނީ ބައިނަލްއަޤުވާމީ މީޑިއާ ތަކުގައި ވެސް ސަމާލުކަން ލިބިގެން ގޮސްފަ އެވެ.

މި ސަރުކާރު އައި ފަހުން 2024 ވަނަ އަހަރު ވަނީ އެވޯޑު ހަފްލާ ބާއްވައިފަ އެވެ. އެއީ 2023 ވަނަ އަހަރު ކުޅުންތެރިން ހޯދާފައިވާ ކާމިޔާބީ ތަކާއި، އެ އަހަރުގެ ޚިދުމަތްތެރިންގެ ކާމިޔާބީ ފާހަގަ ކުރުމަށެވެ.