ވޮލީ ބޯޅަ އެސޯސިއޭޝަން އޮފް މޯލްޑިވްްސް (ވީއޭއެމް) އިން، ދުނިޔޭގެ ވޮލީ ބޯޅައިގެ ދުވަސް ފާހަގަ ކޮށްފި އެވެ.

ބައިނަލްއަޤުވާމީ ގޮތުން ފާހަގަ ކުރަމުން އަންނަ ދުނިޔޭގެ ވޮލީ ބޯޅައިގެ ދުވަސް ފާހަގަ ކުރުމަށް، ހޯމަ ދުވަހުގެ ރޭ ޒުވާނުންގެ މަރުކަޒުގެ އެތެރޭ ކޯޓުގައި ވީއޭއެމް އިން ވަނީ ޚާއްސް އިވެންޓެއް ބާއްވައިފަ އެވެ.

އެ ޙަރަކާތް ޝަރަފުވެރި ކޮށްދެއްވީ ކޮމިޝަނަރ އޮފް ސްޕޯޓްސް މުޙައްމަދު ޠަލާލް އެވެ. މީގެ އިތުރުން އެ ޙަރަކާތުގައި ވީއޭއެމްގެ ރައީސް މުޙައްމަދު ލަތީފް އިތުރުން، މޯލްޑިވްސް އޮލިމްޕިކް ކޮމެޓީ (އެމްއޯސީ)ގެ ނައިބު ރައީސް އަޙުމަަދު އިސްމާއީލް ވެސް ވަނީ ބައިވެރިވެފަ އެވެ.

އެ އިވެންޓުގައި ވާހަކަ ދައްކަމުން ލަތީފް ވިދާޅުވީ، ވޮލީ ބޯޅައިގެ ޒުވާން ޖީލެއް ބިނާ ކުރުމަކީ ވަރަށް މުހިންމު ކަމެއް ކަމަށާއި، މިހާރު ވެސް އެކަމަށް ޚާއްސަ މަސައްކަތްތަކެއް ކުރަމުން އަންނަ ކަމަށެވެ. އެގޮތުން ޖަޕާންހގެ ތަޖުރިބާކާރު ކޯޗަކު މިހާރު ވީއޭއެމްގައި މަސައްކަތް ކުރަމުން އަންނަކަން ވަނީ ފާހަގަ ކޮށްފަ އެވެ.

މީގެ އިތުރުން ވޮލީ ބޯޅައިގެ ޔޫތު ޑިވެލޮޕްމަންޓް ޕްރޮގްރާމް އަތޮޅު ތެރެއަށް ފުޅާ ކުރުމުގެ މަސައްކަތުގެ ތެރެއިން، ދުނިޔޭގެ ވޮލީ ބޯޅައިގެ އިދާރާ (އެފްއައިވީބީ) ލެވެލް 1 ގެ ކޯޗިން ކޯހެއް މިއަހަރުގެ ސެޕްޓެމްބަރު މަހުގެ ތެރޭގައި ބާއްވާނެ ކަމަށް ވިދާޅުވި އެވެ. އަދި އެ ކޯހުގައި ބައިވެރިވުމުގެ ފުރުސަތު އަތޮޅު ތެރެއަށް ވެސް ދޭނެ ކަމުގައި ލަތީފް ވިދާޅުވި އެވެ.

ހަމައެހެންމެ ލަތީފް ވަނީ، ޔޫތު ޑިވެލޮޕްމަންޓް ޕްރޮގްރާމް ހިންގުމުގައި މާލޭގެ އެކަޑަމީތަކުން ކުރަމުން އަންނަ މަސައްކަތް ފާހަގަ ކޮށްފަ އެވެ. އަދި ވީއޭއެމްގެ ފަރާތުން ދެވެން އޮތް ހުރިހާ އެހީތެރިކަމެއް އެ އެކަޑަމީތަކަށް ދޭނެ ކަމުގައި ލަތީފް ވިދާޅުވި އެވެ.

ވީއޭއެމް އިން ބޭއްވި މި އިވެންޓުގައި ވަނީ ބްލޫސް ފޯ ވޮލީ ބޯލް، މައި ސްޕޯޓްސް އެކަޑަމީ އަދި މުނީޒް ވޮލީބޯލް މޫވްމަންޓްގެ ދަރިވަރުން ބައިވެރިވެފަ އެވެ.