ރަޝިޔާގެ އިދިކޮޅު ލީޑަރު ނަވަލްނީ އަވަހާރަކޮށްލީ ބޮކުގެ ވިހަ ބޭނުންކޮށްގެން ކަމަށް އިނގިރޭސިވިލާތުން ބުނެފި

ރަޝިޔާގެ އިދިކޮޅު ލީޑަރު އެލެކްސީ ނަވަލްނީ އަވަހާރަކޮށްލާފައިވަނީ "ޑާޓް ފްރޮގް" ނަމަކަށް ކިޔާ ބާވަތެއްގެ ބޮކުން އުފައްދާ ވިހައެއް ބޭނުންކޮށްގެން ކަމަށް އިނގިރޭސިވިލާތުގެ ފޮރިން އޮފީހުން ބުނެފި އެވެ.

ސައިބީރިއާގެ ޖަލެއްގައި ނަވަލްނީ އަވަހާރަވިތާ ދެ އަހަރު ފުރުނުއިރު، އިނގިރޭސިވިލާތާއި އެ ގައުމުގެ ބައިވެރިން ވަނީ ނަވަލްނީގެ ހަށިގަނޑުން ފެނުނު ސާމްޕަލްތައް ތަހުލީލުކުރުމަށް ފަހު، މި މަރުގެ ޒިންމާ ރަޝިޔާގެ ސަރުކާރުގެ ބޮލުގައި އަޅުވާފަ އެވެ.

އިނގިރޭސި ފޮރިން އޮފީހުން ހާމަކުރި ގޮތުގައި، ނަވަލްނީގެ ހަށިގަނޑުން ފެނުނު "އެޕިބަޓިޑިން" ނަމަކަށް ކިޔާ މި ވިހަ އަކީ އެއްވެސް އާދައިގެ ސަބަބަކާ ހުރެ އޭނާގެ ހަށިގަނޑުގެ ތެރޭގައި ހުރެދާނެ އެއްޗެއް ނޫނެވެ.

މިއުނިކް ސެކިއުރިޓީ ކޮންފަރެންސްގައި ވާހަކަދައްކަވަމުން އިނގިރޭސި ފޮރިން ސެކްރެޓަރީ އިވެޓް ކޫޕާ ވިދާޅުވީ، ރަޝިޔާގެ ޖަލެއްގައި ބަންދުކޮށްފައި ހުރި އެލެކްސީ ނަވަލްނީއާ ދެކޮޅަށް މިފަދަ ނުރައްކާތެރި ވިހައެއް ބޭނުންކުރުމުގެ ވަސީލަތްތަކާއި، ބޭނުމާއި، ފުރުސަތު އޮތީ ހަމައެކަނި ރަޝިޔާ ސަރުކާރަށް ކަމަށެވެ.

މި ހަފުތާ ބަންދުގައި ބޭއްވި މި ކޮންފަރެންސްގެ ތެރެއިން ކޫޕާ ވަނީ ނަވަލްނީގެ ހުވަފަތް އަނބިކަނބަލުން ޔޫލިއާ ނަވަލްނަޔާ އާ ބައްދަލުކުރައްވާފަ އެވެ.

މި އިވެންޓުގައި ވާހަކަދައްކަވަމުން ކޫޕާ ވިދާޅުވީ، ރަޝިޔާ އިން ނަވަލްނީ ދުށީ ސަރުކާރަށް އޮތް ބޮޑު ނުރައްކަލެއްގެ ގޮތުގައި ކަމަށެވެ.

އަދި މިފަދަ ވިހައެއް ބޭނުންކުރުމުން ދޭހަވަނީ، ރަޝިޔާ ސަރުކާރުގެ އަތުގައި ހުރި ނުރައްކާތެރި ވަސީލަތްތަކާއި، އިދިކޮޅު ސިޔާސީ ފަރާތްތައް ދެކެ ސަރުކާރުން ބިރު ގަންނަ މިންވަރު ކަމެވެ.

ނަވަލްނީ އަށް ވިހަދިން ކަމަށް ބުނެ ރަޝިޔާ އަށް ކުރާ ތުހުމަތުތަކުގައި އިނގިރޭސިވިލާތާއެކު ސްވިޑަން، ފްރާންސް، ނެދަލޭންޑްސް އަދި ޖަރުމަނުވިލާތުން ވަނީ ބައިވެރިވެފަ އެވެ.

ފޮރިން އޮފީހުން ބުނި ގޮތުގައި، ކެމިކަލް ހަތިޔާރު މަނާކުރާ މުއާހަދާއާ ރަޝިޔާ އިން ޚިލާފުވެފައިވާ ކަމަށް ބުނެ، އެ މައްސަލަ އިނގިރޭސިވިލާތުން މިހާރު ވަނީ އޯގަނައިޒޭޝަން ފޯ ދަ ޕްރޮހިބިޝަން އޮފް ކެމިކަލް ވެޕަންސް (އޯ.ޕީ.ސީ.ޑަބްލިއު) އަށް ހުށަހަޅާފަ އެވެ.

ކޮރަޕްޝަނާ ދެކޮޅަށް މަސައްކަތް ކުރެއްވި، ރަޝިޔާގެ އެންމެ ނުފޫޒުގަދަ އިދިކޮޅު ލީޑަރު ނަވަލްނީ ކުއްލި ގޮތަކަށް ޖަލުގައި އަވަހާރަވީ 16 ފެބްރުއަރީ 2024 ގައެވެ. އަވަހާރަވީއިރު އުމުރަކީ 47 އަހަރެވެ.

މީގެ ކުރިން 2020 ވަނަ އަހަރުވެސް "ނޮވިޗޮކް" ނާރވް އޭޖެންޓް ބޭނުންކޮށްގެން ނަވަލްނީއަށް ވިހަދީފައިވެ އެވެ. އެ ފަހަރު ޖަރުމަނުވިލާތުން ފަރުވާ ހޯއްދެވުމަށްފަހު އެނބުރި ރަޝިޔާ އަށް ވަޑައިގަތުމާއެކު އެއާޕޯޓުން އޭނާ ވަނީ ހައްޔަރުކޮށްފަ އެވެ.