ޓްރަމްޕްގެ ވީޑިއޯ އަށް ނުރުހުން އަމާޒު ކުރައްވައި އޮބާމާ ވިދާޅުވީ، ލަދުވެތިކަން ގެއްލެމުންދާ ކަމަށް

އެމެރިކާގެ ކުރީގެ ރައީސް ބަރަކް އޮބާމާ އާއި، އެމަނިކުފާނުގެ އަނބިކަނބަލުން މިޝޭލް އޮބާމާ އަށް ފުރައްސާރަކޮށް، އެ ޤައުމުގެ މިހާރުގެ ރައީސް ޑޮނަލްޑް ޓްރަމްޕް ކުރެއްވި ޕޯސްޓަށް އޮބާމާ ފާޑު ވިދާޅުވެއްޖެ އެވެ. 

މި ހިނގާ ފެބްރުވަރީ މަހުގެ ފަސް ވަނަ ދުވަހު، ޓްރަމްޕްގެ ޓުރުތު ސޯޝަލް މީޑިއާގައި ކުރެއްވި ޕޯސްޓެއްގައި ވަނީ އޮބާމާ އާއި، އޭނާގެ އަނބިކަނބަލުންނަށް ނަސްލީ ގޮތުން ފުރައްސާރަ ކޮށްފަ އެވެ. އެ ޕޯސްޓާ ގުޅިގެން އެތައް ބައެއްގެ ފާޑު ކިޔުން އަމާޒުވުމުން، ވައިޓް ހައުސް އިން ވަނީ އެ ޕޯސްޓު ޑިލީޓު ކޮށްލައިފަ އެވެ. 

ޓްރަމްޕްގެ ޕޯސްޓާ ގުޅޭ ގޮތުން ފުރަތަމަ ފަހަރަށް ވާހަކަ ދައްކަވަމުން އޮބާމާ ވަނީ، އެކަމަށް ވަރަށް ބޮަޑަށް ފާޑު ވިދާޅުވެފަ އެވެ. އަދި އޮބާމާ ވިދާޅުވީ، އެމެރިކާގެ ސިޔާސީ މަސްރަޙުގައި އަދަބުވެރިކަމާއި، ލަދު ޙަޔާތް ކުޑަވަމުންދާ ކަމަށެވެ. އޮބާމާ އަކީ އެމެރިކާގެ ގިނަ ބައެއްގެ މެދުގައި އަދިވެސް މަޤުބޫލުކަން އޮންނަ ބޭފުޅެކެވެ. 

ބްރަޔަން ކޯހެންއާ އެކު ހޮނިހިރު ދުވަހު ކުރިއަށް ގެންދިޔަ ޕޮޑްކާސްޓުގައި ވާހަކަ ދައްކަވަމުން ޓްރަމްޕް ވިދާޅުވި، އެމެރިކާގެ ސިޔާސީ ބަހުަސްތައް މިހާރު ވެއްޓިފައި ވަނީ، މީގެ ކުރިން ދުވަހަކު ވެސް ނުދެކޭ ފަދަ ދަށު ދަރަޖަ އަކަށް ކަމަށެވެ. ޓްރަމްޕްގެ ނަން ސީދާ ވިދާޅުނުވި ނަމަވެސް، އޮބާމާ ފާހަގަ ކުރެއްވި ގޮތުގައި އެފަދަ އަމަލުތަކާ މެދު އެމެރިކާގެ ގިނަ ރައްޔިތުން ކަންބޮޑުވެ އެވެ. 

އެކަން ފާހަގަ ކުރައްވައި އޮބާމާ ވިދާޅުވީ، ސޯޝަލް މީޑިއާ އާއި، ޓީވީ ތަކުން ފެންނަނީ "ކްލައުން ޝޯ" ފަދަ ކަންތައް ތަކެއް ކަމަށާއި، ދައުލަތުގެ މަތީ މަޤާމު ތަކަށް ދޭން ޖެހޭ އިޙުތިރާމް އާއި، އަދަބުވެރިކަން މިހާރު ގެއްލިފައިވާ ކަމަށެވެ. 

ޓްރަމްޕް ޕޯސްޓު ކުރި ވީޑިއޯ އަކީ، 2020 ވަނަ އަހަރު އެމެރިކާގައި އޮތް ރިޔާސީ އިންތިޚާބު އޭނާ އަށް ނާކާމިޔާބުވީ އޮޅުވާލުމާއި، ވައްކަން ކުރުމުން ކަމަށް ވިދާޅުވެ ކުރެއްވި ޕޯސްޓެކެވެ. އެއް މިނެޓުގެ އެ ވީޑިއޯގެ ފަހު ބައިގައި ވަނީ، އޮބާމާ އާއި އޭނާގެ އަނބިކަނބަލުންގެ މޫނުގައި ރާމާމަކުނު ޖަހާފައިވާ މަންޒަރެއް ހިމަނައިފަ އެވެ. އޮބާމާ އަކީ އެމެރިކާގެ ތާރީޚުގައި ކަޅު ނަސްލުގެ ފުރަތަމަ ރައީސް އެވެ. 

އެ ވީޑިއޯއާ ގުޅޭ ގޮތުން ވައިޓް ހައުސް އިން ބުނެފައި ވަނީ، އެއީ މުވައްޒަފަކަށް އޮޅިގެން ހެދުނު ޕޯސްޓެއް ކަމަށާއި، ފަހުން އެ ޕޯސްޓު ޑިލީޓު ކޮށްލާފައިވާ ކަމަށެވެ. އެ މައްސަލައިގައި ނޫސްވެރިން ސުވާލު ކުރުމުން ޓްރަމްޕް ވިދާޅުވީ، އެ ވީޑިއޯގައި އެ މަންޒަރު ހިމަނާފައި ހުރިކަން އެނގިވަޑައި ނުގަންނަވާ ކަމަށެވެ. އެކަމުގައި މައާފަށް އެދޭނެތޯ ސުވާލު ކުރުމުން ޓްރަމްޕް ވިދާޅުވީ، އެފަދަ ގޯހެއް އެކަމުގައި ނެތް ކަމަށެވެ. 

އެ ޕޮޑްކާސްޓުގައި ވާހަކަ ދައްކަވަމުން އޮބާމާ ވިދާޅުވީ ފެޑަރަލް އެޖެންޓުން ހިންގި އެ އޮޕަރޭޝަންގެ ތެރޭގައި އާންމުންގެ ދެ މީހެއްގެ ގަޔަށް ބަޑި ޖަހައި މަރާލާފައިވާއިރު، އެއީ ޚުދުމުޚުތާރު ޑިކްޓޭޓާޝިޕް ތަކުގައި ކަންކަން ކުރާ އުސޫލެއް ކަމަށެވެ. އަދި ފެޑަރަލް ސަރުކާރުގެ އެޖެންޓުންގެ ފަރާތުން ފެންނަ މިފަދަ ނުރައްކާތެރި އަމަލު ތަކަކީ ކަންބޮޑުވާން ޖެހޭ ކަމެއް ކަމަށް ވެސް އޮބާމާ ފާހަގަ ކުރެއްވި އެވެ.