ޖެނީވާގައި އީރާނާ އެކު އޮންނަ މަޝްވަރާ ތަކުގައި ޓްރަމްޕްގެ ފަރާތުން ބައިވެރިވާނީ ވިޓްކޮފް އާއި ކުޝްނާ

އީރާން އާއި އެމެރިކާއާ ދެމެދު ކުރިއަށް ގެންދާ މަޝްވަރާ ތަކުގެ ދެ ވަނަ ބައްދަލުވުން ސްވިޒަލެންޑުގެ ޖެނީވާގައި ބާއްވަން ތައްޔާރު ވަމުން އަންނައިރު، އެމެރިކާގެ ރައީސް ޑޮނަލްޑް ޓްރަމްޕްގެ ފަރާތުން އެ ބައްދަލުވުމުގައި ބައިވެރިވާނީ ސްޓީވް ވިޓްކޮފް އާއި، ޖެރާޑް ކުޝްނާ ކަމަށް ހާމަ ކޮށްފި އެވެ.

އެކަން ހާމަކޮށް އެމެރިކާގެ ރިޔާސީ ގަނޑުވަރު، ވައިޓް ހައުސް އިން ބުނެފައި ވަނީ އެ ބައްދަލުވުމުގައި އެމެރިކާ އިން ފުރިހަމަ އަށް ބައިވެރިވާނެ ކަމަށެވެ. އެގޮތުން އެ މަޝްވަރާ ތަކުގައި ބައިވެރިވާ ވިޓްކޮފް އާއި ކުޝްނާ އަކީ، އީރާންގެ މައްސަލައިގައި ޓްރަމްޕްގެ ފަރާތުން އެންމެ އިސްކޮށް މަސައްކަތް ކުރައްވާ ދެ މަންދޫބުން ކަމަށް ވެސް ހާމަ ކޮށްފައިވެ އެވެ. 

ބައްދަލުވުމާ ގުޅޭ ގޮތުން އީރާންގެ ފޮރިން މިނިސްޓްރީ އިން ބުނެފައި ވަނީ، އެ ބައްދަލުވުމުގައި އެ ޤައުމުގެ ފަރާތުން ބައިވެރި ވާނީ ފޮރިން މިނިސްޓަރު އައްބާސް އަރަގްޗީ ކަމަށެވެ. ބައްދަލުވުމުގައި ބައިވެރިވެ ވަޑައިގަތުމަށް އަރަގްޗީ ޖެނީވާ އަށް ކުރައްވާ ދަތުރުފުޅުގައި އޮމާންގެ ފޮރިން މިނިސްޓަރުގެ އިތުރުން، ބައިނަލްއަޤުވާމީ ނިއުކްލިއާ ހަކަތައާ ބެހޭ އެޖެންސީ (އައިއޭއީއޭ)ގެ ވެރިޔާއާ ވެސް ބައްދަލު ކުރައްވާ ގޮތަށް ހަމަޖެހިފައިވާ ކަމަށް ބުނެފައިވެ އެވެ. 

މިދިޔަ އަހަރުގެ ތެރޭގައި އެމެރިކާ އާއި އީރާންއާ ދެމެދު މަޝްވަރާތައް ފަށައިގެން ކުރިއަށް ގެންދަމުން އަންނަނިކޮށް، އިޒްރޭލް އާއި އެމެރިކާ އިން އީރާން އަށް ދިން ހަމަލާގެ ސަބަބުން ވަނީ މަޝްވަރާތައް މަޑު ޖެހިފަ އެވެ. އޭގެ ފަހުން މަޝްވަރާތައް އަލުން ފަށާފައި ވަނީ ފެބްރުވަރީ މަހުގެ ހަ ވަނަ ދުވަހު އެވެ. މަޝްވަރާ ތަކުގެ ފުރަތަމަ ބައްދަލުވުން ބާއްވާފައި ވަނީ އޮމާންގެ ވެރި ރަށުގަ އެވެ.