އެއްބަސްވުމަކަށް ނުދެވިއްޖެ ނަމަ، ނަތީޖާއާ ކުރިމަތިލާން ޖެހޭނެ ކަމަށް ވިދާޅުވެ، ޓްރަމްޕްގެ އިންޒާރެއް އީރާން އަށް

އެމެރިކާ އާއި އީރާންއާ ދެމެދު ނިއުކްލިއާ މަޝްވަރާތައް ކުރިއަށް ގެންދަމުން އަންނައިރު، އެއްބަސްވުމަކަށް ނާދެވިއްޖެ ނަމަ، އީރާން އިން އެކަމުގެ ނަތީޖާއާ ކުރިމަތިލާން ޖެހޭނެ ކަމަށް ވިދާޅުވެ އެމެރިކާގެ ރައީސް ޑޮނަލްޑް ޓްރަމްޕް އިންޒާރެއް ދެއްވައިފި އެވެ.

އަންގާރަ ދުވަހު ޓްރަމްޕް މިހެން ވިދާޅުވެފައި ވަނީ އެއާ ފޯސް ވަންގައި ހުންނަވައި ނޫސްވެރިންނާ ވާހަކަ ދައްކަވަމުންނެވެ. ވޮޝިންޓަން އަށް އެނބުރި ވަޑައިގެންނެވުމުގެ ތެރޭގައި ޓްރަމްޕް ވިދާޅުވީ، އެމެރިކާ އާއި އީރާންއާ ދެމެދު ކުރިއަށްދާ މަޝްވަރާ ތަކުގައި ނުސީދާ ގޮތެއްގައި އޭނާ ބައިވެރިވެ ވަޑައިގަންނަވާނެ ކަމަށެވެ. 

އިތުރަށް ޓްރަމްޕް ވިދާޅުވީ އެއްބަސްވުމަކަށް ނާދެވިއްޖެ ނަމަ، ދެން ކުރިމަތި ވާނެ ނަތީޖާ ތަކަކީ އީރާން އިން ބޭނުންވާނެ ނަތީޖާ ތަކެއް ކަމަށް ޤަބޫލު ނުކުރައްވާ ކަމަށެވެ. އޮމާން އިން މެދުވެރިއެއްގެ ދައުރު އަދާ ކުރަމުން އަންނަ މަޝްވަރާ ތަކުގެ ދެ ވަނަ ބައްދަލުވުން އަންގާރަ ދުވަހު އޮންނާނެ އެވެ. އެ މަޝްވަރާތައް މިފަހަރު ކުރިއަށް ދާނީ ސްވިޒަލެންޑުގެ ޖެނީވާގަ އެވެ. 

މީގެ ކުރިން ވެސް ޓްރަމްޕް ވަނީ އީރާންއާ ދެކޮޅަށް އަސްކަރީ ފިޔަވަޅު އަޅުއްވާނެ ކަމަށް ވިދާޅުވެ އިންޒާރު ދެއްވައިފަ އެވެ. މި އިންޒާރުތައް އެންމެ ފުރަތަމަ ޓްރަމްޕް ދެއްވީ، އީރާންގައި ކުރިއަށް ދިޔަ މުޒާހަރާތައް ކޮންޓްރޯލް ކުރުމަށް އެ ޤައުމުގެ ސަރުކާރުން ބާރުގެ ބޭނުން ކުރުމާ އެކު އެވެ. އަދި އޭގެ ފަހުން ވަނީ އީރާންގެ ނިއުކްލިއާ ޕްރޮގްރާމްއާ ގުޅޭ ގޮތުން ވެސް އިންޒާރު ދެއްވައިފަ އެވެ. އެމެރިކާގެ އަސްކަރީ އުޅަނދުތައް އަންނަނީ މެދު އިރުމަތީގެ ސަރަހައްދުގައި ޙަރަކާތްތެރި ވަމުންނެވެ. 

އީރާންގެ ނިއުކްލިއާ ޕްރޮގްރާމް އަކީ ނިއުކްލިއާ ބޮން އުފެއްދުމަށް ކުރިއަށް ގެންދާ މަޝްރޫއެއް ކަަމަށް، އެމެރިކާ އާއި ވިލާތުގެ ބައެއް ޤައުމު ތަކުން އަބަދު ވެސް ތުހުމަތު ކުރެ އެވެ. ނަމަވެސް، އީރާން އިން އަންނަނީ ތަކުރާރުކޮށް މި ތުހުމަތުތައް ދޮގު ކުރަމުންނެވެ. ނިއުކްލިއާ މައްސަލައިގެ އިތުރުން، އީރާންގެ ބެލިސްޓިކް މިސައިލް ޕްރޮގްރާމް އާއި، މެދު އިރުމަތީގެ ހަތިޔާރު ޖަމާއަތްތަކަށް އީރާން އިން ދޭ އެހީތެރިކަމާ ގުޅޭ ގޮތުން މަޝްވަރާ ކުރުމަށް އެމެރިކާ އިން އަބަދު ވެސް ބާރު އަޅަމުން ގެންދެ އެވެ. 

މި މަޝްވަރާ ތަކާ ގުޅޭ ގޮތުން އީރާންގެ ފޮރިން މިނިސްޓްރީ އިން ހޯމަ ދުވަހު ބުނީ، އީރާންގެ ނިއުކްލިއާ މައްސަލައިގައި އެމެރިކާގެ ވިސްނުން މިހާރު ހުރީ ކުރިއަށް ވުރެ ބޮޑަށް، ހަގީގަތާ އެއްގޮތް މިސްރާބަކަށް ކަމަށެވެ. މީގެ ކުރިން މިފަދަ މަޝްވަރާ ތަކެއް ބޭއްވުމަށް ކުރި މަސައްކަތް ނާކާމިޔާބުވީ، އިޒްރޭލް އިން ކުއްލި ގޮތަކަށް އީރާން އަށް ހަމަލާ ދިނުމުންނެވެ. އެއާ އެކު، އޭރު ކުރިއަށް ގެންދަމުން އައި މަޝްވަރާތައް ވަނީ މަޑު ޖެހިފަ އެވެ.