އެމްޑީޕީގެ، ހެންވޭރު ހުޅަނގުގެ ދޮރުން ދޮރަށް ހަރަކާތް ކާމިޔާބުކަމާއި އެކު ކުރިއަށް ގެންގޮސްފި
ގޯތީގެ މައްސަލަތަކާއި ރައްޔިތުންނާ ގުޅުން ހުރި ކަންކަމުގައި ސަރުކާރުން އިހުމާލު ވަމުންދާކަން ފާހަގަކުރައްވައި، އާޒިމް އާއި ކައުންސިލަރު ސައިފް ފާތިހު ވަނީ ސަރުކާރުގެ ސިޔާސަތުތަކަށް ވަރަށް ބޮޑަށް ފާޑުވިދާޅުވެފަ. އެމްޑީޕީގެ ކެމްޕެއިން ހަރަކާތްތަކުގައި އާންމުންގެ ކަންބޮޑުވުންތައް އަޑުއަހައި، އެ ޕާޓީގެ ސިޔާސަތުތައް ވަނީ ހިއްސާކޮށްފަ.
މާލޭގެ މެޔަރ އާދަމް އާޒިމް ދޮރުން ދޮރަށް ހަރަކާތުގައި ބައިވެރި ވެވަޑައިގަންނަވަނީ. | ރާއްޖެ އެމްވީ
މޯލްޑިވިއަން ޑިމޮކްރެޓިކް ޕާޓީ އެމްޑީޕީގެ، ހެންވޭރު ހުޅަނގުގެ ދޮރުން ދޮރަށް ހަރަކާތް ކާމިޔާބުކަމާއި އެކު ކުރިއަށް ގެންގޮސްފި އެވެ.
އާދިއްތަ ދުވަހު ހަވީރު ބޭއްވި، އެ ހަރަކާތުގައި ބައިވެރިވެވަޑައިގެން ވާހަކަދައްކަވަމުން މާލޭގެ މޭޔަރ އަދި މޭޔަރ ކެނޑިޑޭޓް އާދަމް އާޒިމް ވިދާޅުވީ މިހާރު ވެސް ތިބި ޕީއެންސީގެ ކައުންސިލް މެމްބަރުންނަށް ކައުންސިލް ބައްދަލުވުންތަކަށް ހާޒިރު ވެސް ނުވެވޭ ކަމަށެވެ. އެ ވަރު ބަޔަކަށް އަލުން ކައުންސިލް މެމްބަރުކަމަށް ހޮވިގެން ވެސް އާއްމުންނަށް ކޮށްދެވޭނެ ކަމެއް ނެތް ކަމަށް އާޒިމް ވިދާޅުވި އެވެ.
"ރައްޔިތުން އެދޭ އެމްޑީޕީ ގެ މަސައްކަތާއި އެކު ކުރިއަށް ދާން. އެއީ ގޯތީގެ ކަންކަން ވެސް ނުކުރެވޭ މި ސަރުކާރަށް. ރައްޔިތުންނާއި ގުޅުން ހުރި ކަންކަމުގައި މަސައްކަތް ކުރަނީ އެމްޑީޕީ އިން." އާޒިމް ވިދާޅުވި އެވެ.
އެ ދޮރުން ދޮރަށް ހަރަކާތުގައި ބައިވެރިވެވަޑައިގެންނެވި ގަލޮޅު އުތުރު ދާއިރާގެ ކައުންސިލް މެމްބަރު، ސައިފް ފާތިހް (އައިކޮ) ވިދާޅުވީ ސަރުކާރު ކެނޑިޑޭޓުންގެ ނަމުގައި ބަޔަކު ނެރެގެން ސަރުކާރަށް ކައުންސިލް އިންތިޚާބަށް ކެމްޕެއިން ކުރަން ކެރުނީތީ ހައިރާންވެވަޑައިގަންނަވާ ކަަމަށެވެ. ސަރުކާރުން ސިޔާސަތުތަކުގެ ވާހަކަދެއްކުމުގެ ކުރިން ކައުންސިލަރުން ބައްދަލުވުންތަކަށް ހާޒިރު ނުވާ ސަބަބު ދެއްކުން މާ ރަނގަޅު ކަމަށް އޭނާ ވިދާޅުވި އެވެ.
"ފުރަތަމަ އެ ތަނަށް ދެވިގެން ނޫންތޯ ކަމެއް ވާނީ. ހާޒިރު ވެސް ނުވެވޭ ބަޔަކު ކޮން ވާހަަކަ އެއްތޯ އިތުރަށް ދައްކަނީ؟" އޭނާ ވިދާޅުވި އެވެ.
އެ ދާއިރާގެ ދޮރުން ދޮރަށް ހަރަކާތުގެ ތެރެއިން އާއްމުންނާއި ބައްދަލުކޮށް އާއްމުންގެ ކަންބޮޑުވުންތައް ކެނޑިޑޭޓުން ވަނީ އަޑު އައްސަވާފަ އެވެ. އަދި އެމްޑީޕީގެ ސިޔާސަތުތައް މެމްބަރުންނަށް ސާފުކޮށްދެއްވާފައިވެ އެވެ.
