އިންތިޚާބަކާ ނުލައި 82 މީހުން ހޮވިއްޖެ
އަންނަ އޭޕްރީލް މަހު ބާއްވާ އިންތިޚާބުތަކުގައި ވާދަކުރާ ކެންޑިޑޭޓުންގެ ތެރެއިން 67 ފަރާތަކުން ނަން އަނބުރާ ގެންގޮސްފައިވާއިރު، ވޯޓަކާ ނުލައި 82 ފަރާތަކުން ގޮނޑި ކާމިޔާބުކޮށްފި. މީގެ ތެރެއިން އެންމެ ގިނަ ގޮނޑި ޕީއެންސީން ކާމިޔާބުކޮށްފައިވާއިރު، ދެން އެންމެ ގިނަ ގޮނޑި ލިބުނީ އެމްޑީޕީ އަށް. އިންތިޚާބަކާ ނުލައި ހޮވުނު މީހުންގެ ތެރޭގައި ކައުންސިލަރުންގެ ގޮތުގައި 33 ފަރާތަކާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކުގެ 49 މެންބަރުން ހިމެނޭ.
ތިނަދޫ ސިޓީގެ ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ ނަންތައް ތަރުތީބު ކުރުމަށްޓަކައި ބޭއްވި ގުރުއަތުނެގުމުގެ ތެރެއިން. | އިލެކްޝަންސް ކޮމިޝަން
އަންނަ އޭޕްރީލް މަހު ކުރީކޮޅު އޮންނަ ލޯކަލް ކައުންސިލް އަދި އަންހެނުންގެ ތަރައްޤީއަށް މަސައްކަތްކުރާ ކޮމެޓީގެ އިންތިޚާބުގައި، އިންތިޚާބަކާ ނުލާ 82 މީހުން ހޮވިއްޖެ އެވެ.
އިންތިޚާބަކާ ނުލާ، ކައުންސިލަރ ކަމަށް ހޮވިފައިވަނީ 33 ފަރާތެކެވެ. އޭގެ ތެރޭގައި ހިމެނެނީ ޕީއެންސީ އަށް ނިސްބަތްވާ 28 ފަރާތަކާއި، އެމްޑީޕީ އަށް ނިސްބަތްވާ އެއް ފަރާތަކާއި، އަދާލަތު ޕާޓީން ކުރިމަތިލި ފަރާތަކާއި، އަމިއްލަ ގޮތުން ކުރިމަތިލީ ތިން ފަރާތެކެވެ.
އަންހެނުންގެ ތަރައްގީ އަށް މަސައްކަތް ކުރާ ކޮމިޓީ އަށް ކުރިމަތިލީ ކެންޑިޑޭޓުންގެ ތެރެއިން 49 މީހަކު ވަނީ އިންތިޚާބަކާ ނުލައި ހޮވިފަ އެވެ. އޭގެ ތެރޭގައި ހިމެނެނީ، ޕީއެންސީ އަށް ނިސްބަތްވާ 41 ފަރާތަކާއި، އެމްޑީޕީ އަށް ނިސްބަތްވާ 5 ފަރާތަކާއި، އަދާލަތު ޕާޓީ އަށް ނިސްބަތްވާ އެއް ފަރާތަކާއި އަމިއްލަ ގޮތުން ކުރިމަތިލީ 2 ފަރާތެކެވެ.
ކުރިއަށް އޮތް ދެ އިންތިޚާބުގައި ވާދަ ކުރުމަކާ ނުލައި، އެންމެ ގިނަ ގޮނޑި ލިބުނީ ޕީއެންސީ އަށެވެ. އެ ޕާޓީއަށް 69 ގޮނޑި ލިބިފައިވާއިރު އެމްޑީޕީއަށް އިންތިޚާބަކާ ނުލާ ލިބިފައިވަނީ 6 ގޮނޑިއެވެ.
ލޯކަލް ކައުންސިލްތަކުގެ އިންތިޚާބާއި އަންހެނުންގެ ތަރައްޤީއަށް މަސައްކަތްކުރާ ކޮމިޓީގެ އިންތިޚާބު 2026 ގެ ގަވާއިދު ގެ 51 ވަނަ މާއްދާގެ (ހ) ގައިވާ ގޮތުގެމަތިން، ވޯޓު ނެގުމަކާ ނުލައި އިންތިޚާބުވި ފަރާތްތައް އިލެކްޝަންސް ކޮމިޝަނުން ވަނީ ފެބްރުއަރީ މަހުގެ 15 ވަނަ ދުވަހު ޢާންމުކޮށް އަންގައި އިޢުލާންކޮށްފަ އެވެ.
ނަން އަނބުރާ ގެންދިއުމަށް އޮތް މުއްދަތުގައި ޖުމްލަ 67 ކެންޑިޑޭޓުން ނަން އަނބުރާ ގެންގޮސްފައިވެއެވެ. އޭގެ ތެރޭގައި އަންހެނުންގެ ތަރައްޤީއަށް މަސައްކަތްކުރާ ކޮމިޓީތަކަށް ކުރިމަތިލީ 31 ކެންޑިޑޭޓުން ހިމެނޭ އިރު، ކައުންސިލްތަކަށް ކުރިމަތިލީ 36 ފަރާތް ހިމެނެ އެވެ.
67 ކެންޑިޑޭޓުން ނަން އަނބުރާ ގެންދިޔުމާއެކު އިންތިޚާބުގައި ވާދަކުރަން ހަމަ ޖެހުނީ 2،927 ކެންޑިޑޭޓުންނެވެ.
އިންތިޚާބު ބޭއްވުމަށް ހަމަ ޖެހިފައިވަނީ އެޕްރީލް މަހުގެ 04 ވާ ހޮނިހިރު ދުވަހު އެވެ.
