އިންތިޚާބެއް ބޯމަތިވާކަން އެބަ އިހުސާސްވޭ! މި ހުރިހާ ދުވަހު ވަރިހަމަ ވި ކަންކަން މިހާރު ހެޔޮފުޅުކަމުން ކޮށްދެއްވަނީ ޔޯލަ!
ސަރުކާރުން މި ދަނޑިވަޅު ރައްޔިތުންނަށް ވަރަށް ގިނަ ކަންކަން ކޮށްދޭނެ ކަމަށް އެބަ ބުނޭ. މިއީ ސަރުކާރު ހެޔޮކަމުން ކުރާ ކަމެއް ނޫން. މިއީ އިންތިޚާބު ކައިރި ވާތީ ކަންކަން ކުރާ ގޮތް.
ރައީސް ޑރ. މުހައްމަދު މުއިއްޒު އަތޮޅު ކައުންސިލްތައް އުވާލާ ބިލު ތަސްދީގުކުރައްވަނީ | ރައީސް އޮފީސް
އިންތިޚާބެއް ބޯމަތިވާކަން އެބަ އިހުސާސްވެ އެވެ. އެހެން މި ބުނަން ޖެހެނީ ސަރުކާރުން، މި ހުރިހާ ދުވަހު ކަޑަ ޖަހާ އުސޫލުން ދޫކޮށްލާފައި ހުރި ކަންކަން ފަށަނީ، ފަށާނަން ގެ އަޑު ގަދަ ވާން ފަށައިފި އެވެ. ނުނިންމާ ދިގުލައިގެން ގޮސްފައިވާ ކަންކަމާއި ފިނިހަކަ ސްޕީޑުގައި ގޮސް ގޮސް ހުރި ކަންކަން ނިންމާނެ ކަމަށް ބުނާ އަޑު ވެސް އެހާ ގަދަ އެވެ. މި ދަޅަތައް ދުވަހަކަށް ވުރެ ދުވަހެއް ވަނީ ގަދަ އެވެ. މި ހުރިހާ ދުވަހު ވަރިހަމަ ކޮށްގެން ދޫކޮށްލާފައި ހުރި ކަންކަން މިހާރު ރަނގަޅު ކޮށްދެއްވާނެ ކަމަށް ވިދާޅުވާން ފަށައިފި އެވެ. ހައްތަހާ ވެސް ހެޔޮފުޅުކަމުން ކުރައްވާ ކަންކަން ކަމަށް އެބަ ވިދާޅުވެ އެވެ.
މި އިން ބައެއް ކަންކަމަށް ބަލާލާ ނަމެވެ. އިންތިޚާބަށް ދޮޅުމަސް ދުވަހަށް ވެފައި ވަނިކޮށް މި އަހަރުގެ ރަމަޟާން މަހުގެ ކަރަންޓު ބިލު 400ރުފިޔާއަށް ވުރެ ބޮޑު ނުވާނެކަމަށް ސްޓޭޓް އިލެކްޓްރިކް ކޮމްޕެނީ (ސްޓެލްކޯ)އިން މި ވަނީ ބުނެފަ އެވެ. ކަރަންޓު ބިލު ބޮޑުވެގެން އެކަން ތުރާލަކަށް ވެގެން އެ ވާހަކަ އާއްމުން ދައްކާތާ އެތައް ދުވަހެއް ވެއްޖެ އެވެ. ރައްޔިތުންގެ ޝަކުވާތަކަށް ހިލާ ހައްލެއް ލިބޭ ވަރެއް ނުވެ އެވެ. ނުވިތާކަށް ކަރަންޓު ބިލު ބޮޑުވުމުން ގޯސް ވަނީ ރައްޔިތު މީހާ އެވެ.
އެކަމަކު މިހާރު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ހެޔޮފުޅުކަމުން ރަމަޟާން މަހުގެ ކަރަންޓު ބިލަށް ޚާއްޞަ ޑިސްކައުންޓެއް ދިނުމަށް ނިންމަވާފައިވާތީ މި ރަމަޟާން މަހަށް ގޭބިސީތަކަށް އަންނާނީ ވަކި ބިލެއް ކަމަށް ސަރުކާރުން އެ ދަނީ ބުނަމުންނެވެ. ރޯދަ މަހުގެ ކަރަންޓު ބިލް، 400 ރުފިޔާއަށް ވުރެ ބޮޑު ނުވާނެހެން ޑިސްކައުންޓް ދިނުމަށް ހަމަ މި އަަހަރު ނިންމުމުން މިއީ އިންތިޚާބާއި ދިމާކޮށް ޖެހި މޮޅު ޗައްކަރެއްކަން ނޭނގޭނެ ދިވެހިންނެއް މިހާރަކު ނުތިބޭނެ އެވެ.
ވެރިކަމުގެ ފުރަތަމަ އަހަރު މާލެ ސަރަހައްދުގެ ފަޅުތައް ހިއްކާ ނިންމާނެ ކަމަށް ވިދާޅުވުމަށް ފަހު ވަޑައިގެން އެކަން އޮތީ މިހާތަނަށް ނުކުރެވި ޕާކު ކުރެވިފައިވާ ކަމެއްގެ ގޮތުގަ އެވެ. ކަން މިހެން އޮތްވާ ކައުންސިލް އިންތިޚާބު ކައިރިވާ ވަރަކަށް މި މަސައްކަތްތައް ވެސް ހިނގާ ސްޕީޑް އަވަސް ކުރަން ފަށައިފި އެވެ. އެހެންވީމަ އިންތިޚާބެއް ކައިރިވާ ކަމުގެ އިހުސާސް ނުވާންވީ ސަބަބެއް ނެތްތާއެވެ.
ގިނަ ދުވަސްތަކެއް ވަންދެން ހުއްޓިފައި އޮތް ގިރާވަރުފަޅު ހިއްކުމުގެ މަސައްކަތް ހުކުރު ދުވަހު ހެދުނު އަލުން ފަށާފައިވާ ކަމަށް ރައީސް މުހައްމަދު މުއިއްޒު އިއުލާނު ކުރެއްވުން ވެގެން ދިޔައީ އެފަދަ ކަމަކަށެވެ. މިކަން ވެސް ނިމޭނެ ކަމަށް އެ ވިދާޅުވާ ތާރީހަކީ ކައުންސިލް އިންތިޚާބާއި ނިކަން ކައިރި ތާރީހެކެވެ. އެގޮތުން މިދިޔަ އަހަރުގެ ނޮވެމްބަރު މަހު މައްޗަންގޯޅި ރައްޔިތުންނާއި ބައްދަލު ކުރައްވައި ރައީސް މުއިއްޒު ވިދާޅުވީ ޖެނުއަރީ މަހުގެ ކުރީކޮޅު ގިރާވަރު ފަޅުގެ ހިއްކުމުގެ އަމަލީ މަސައްކަތް ފަށައި މާރިޗު މަހުގެ ނިޔަލަށް މި މަޝްރޫއު ވެސް އެއްކޮށް ހިންކާ ނިމޭނެ ކަމަށެވެ. އެއީ އިންތިޚާބު ފެށުމުގެ ދުވަސް ކޮޅެއް ކުރި އެވެ. އެކަމަކު މިކަން ވެސް ބަލަންވީ ރައީސްގެ ހެޔޮފުޅުކަމުން މަސައްކަތް އަވަސް ކުރަނީ ކަމަށެވެ.
މިދިޔަ އަހަރު އެކި ދުވަސް ވަރު ރާއްޖޭގެ އަތޮޅުތަކަށް ރައީސް ކުރެއްވި ދަތުރުތަކުގައި އުދައްޔާއި، ފަކީރާ ހިފައިގެން ތަނބުތަކަށް ސިމެންތި އެޅުމާއި، ބިންގާ އެޅުމުގެ މަސައްކަތްތައް ނިކަން ބާރަށް ކުރެއްވި އެވެ. އެ ހިސާބުން މިއަދާއި ހަމައަށް ހުއްޓިފައި ހުރި މަޝްރޫޢުތައް ނުވަތަ އެއްވެސް މަސައްކަތެއް ކުރިއަށް ނުގެންގޮސް ހުރި ތަންތަން ނިންމުމުގެ މަސައްކަތް ފަށާނެ ތާރީހުތައް ސަރުކާރުން ދަނީ ދެމުންނެވެ. އަދި މަޖިލިސް އިންތިޚާބަށް މަސައްކަތް ފެށުމަށް ފަހު އިންތިޚާބު ނިމުމުން މަޑުޖައްސާލި މަޝްރޫޢުތައް ވެސް އަލުން ފަށާނެ ތާރީހުތައް ދިނުމާއި ބައެއް މަސައްކަތްތައް ފެށުމުގެ ކަންކަން ކުރިއަށް އެބަ ދެ އެވެ.
މި ހުރިހާ ކަމެއް ތަރުތީބުކުރަނީ ކައުންސިލް އިންތިޚާބާއި ހަމައަށް ދާއިރު ސަރުކާރު ކެންޑިޑޭޓުންނަށް ވޯޓު ނުދީފި ނަމަ ހުރިހާ ކަމެއް ހުއްޓިދާނެ ކަމަށް ސަރުކާރުން ބުނާ ބުނުމަށް ބާރު ދިނުމަށެވެ. މިއަދު ސަރުކާރުން ވަޒީފާތައް ފަތިފަތި އަށް ބަރި ބަރިއަށް ދެއްވުމާއި، ޕީއެންސީގެ އިސް ބޭފުޅުން ބޮޑެތި އަދަދުތަކުން ފައިސާ ބެހުމުގެ ކަންކަން ކުރަނީ ވެސް ކުރިއަށް އޮތް ކައުންސިލް އިންތިޚާބު އެއް ގޮތުން ނުވިއްޔާ އަނެއް ގޮތުން ކާމިޔާބު ކުރުމުގެ ވިސްނުމުގަ އެވެ. އަދި ކައުންސިލް އިންތިޚާބު ކައިރި ވާ ވަރަކަށް ރައްޔިތުން އެދޭ ކަންކަން ކޮށްދެއްވާނެ ކަމަށް ވިދާޅުވާނެ އެވެ. އަދި ނިކަން އަވަހަށް ކަންކަން ފަށާނެ އެވެ. ހެޔޮފުޅު ކަމަކުން ނޫނެވެ. އިންތިޚާބެއް ކައިރި ވާތީ އެވެ. އިންތިޚާބުތަކަސް ރައްޔިތުން ހެއްލުން މިއީ މި ސަރުކާރުން އަލަށް ކުރާ ކަމެއް ނޫނެވެ.
