ދުވާފަރު ކައުންސިލްގެ ރައީސް ކަމަށް ވާދަކުރާ ޕީއެންސީ ކެންޑިޑޭޓްގެ ފަރާތުން ގުރުއަތުނަގަން ދިިޔައީ އެ ރަށު ސްކޫލްގެ ޕްރިންސިޕަލް މުހައްމަދު އަނީސް!
ލޯކަލް ކައުންސިލް އިންތިޚާބުގައި ވާދަކުރާ ޕީއެންސީގެ ކެންޑިޑޭޓެއްގެ ބަދަލުގައި ގުރުއަތުލުމުގައި ބައިވެރިވެވަޑައިގަތުމުން، ރ. ދުވާފަރު ޕްރައިމަރީ ސްކޫލުގެ ޕްރިންސިޕަލް މުހައްމަދު އަނީސްއަށް ބެލެނިވެރިންގެ ފާޑުކިޔުން އަމާޒުވެއްޖެއެވެ. ސިވިލް ސަރވިސްގެ ގަވާއިދުތަކާ ޚިލާފަށް ސިޔާސީ ހަރަކާތްތަކުގައި އިސްކޮށް އުޅުއްވުމަކީ ސްކޫލުގެ އަބުރާއި ކަރާމާތަށް އުނިކަން އަންނާނެ ކަމެއް ކަމަށް ބުނެ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. މި އަމަލަކީ އިންތިޚާބަށް ނުފޫޒު ފޯރުވުމުގެ ގޮތުން ކުރި ކަމެއް ކަމަށް ބެލެނިވެރިން ތުހުމަތު ކުރާއިރު، މި މައްސަލައާ ގުޅިގެން ޕްރިންސިޕަލްގެ ބަހެއް އަދި ލިބިފައެއް ނުވެއެވެ.
ރ. ދުވާފަރު ޕްރައިމަރީ ސްކޫލުގެ ޕްރިންސިޕަލް މުހައްމަދު އަނީސް ޕީއެންސީގެ ފަރާތުން އެ ރަށު ކައުންސިލް ރައީސް ކަަމަށް ވާދަކުރާ ސާހު ގެ ފަރާތުން ގުރުނަގަނީ | ރާއްޖެ އެމްވީ
ކުރިއަށް އޮތް ލޯކަލް ކައުންސިލް އިންތިޚާބުގެ ފޯރި ގަދަވެފައިވާއިރު، ރ. ދުވާފަރު ޕްރައިމަރީ ސްކޫލުގެ ޕްރިންސިޕަލް މުހައްމަދު އަނީސް ޕީއެންސީ ގެ ސިޔާސީ ހަރަކާތްތަކުގައި ސީދާ ބައިވެރިވެ، އެ ޕާޓީގެ ކެންޑިޑޭޓެއް ތަމްސީލު ކޮށް، ގުރުއަތު ނަގަން ގޮސްފައިވާތީ އެ ރަށު ސްކޫލްގެ ބެލެނިވެރިން ކަންބޮޑުވުން ފާޅު ކޮށްފި އެވެ.
އިންތިޚާބަށް ކުރިމަތިލާފައިވާ ކެންޑިޑޭޓުންގެ ކެންޑިޑޭޓް ނަންބަރު ތަރުތީބު ކުރުމަށް ގުރުއަތުލުން ބާއްވާފައި ވަނީ މިދިޔަ ބުރާސްފަތި ދުވަހުގަ އެވެ. އެގޮތުން ގުރުއަތުލުން ކުރިއަށް ދިޔަ ވަގުތު، ޕީއެންސީގެ ފަރާތުން ދުވާފަރު ކައުންސިލްގެ ރައީސް ކަމަށް ކުރިމަތިލާފައިވާ އަހްމަދު ސާހު ތަމްސީލު ކޮށް، އޭނާ ގެ ބަދަލުގައި ގުރުނަގަން ގޮސްފައި ވަނީ ޕްރިންސިޕަލް އަނީސް އެވެ.
ސިވިލް ސަރވިސްގެ ގަވާއިދުތައް ބުނާގޮތުން ސަރުކާރުގެ ވަޒީފާތަކުގައި ތިއްބަވާ އިސްވެރިންނަކީ ސިޔާސީ ގޮތުން ވަކި ފަރާތަކަށް ނުޖެހި، މިނިވަންކަމާއެކު ތިއްބަވަންޖެހޭ ބަޔަކަށްވާއިރު، 500 އަށްވުރެ ގިނަ ދަރިވަރުން ކިޔަވަމުންދާ ސްކޫލެއްގެ ވެރިޔަކު މިފަދަ ހަރަކާތްތަކުން ފެނުމަކީ ބަލައިގަނެވޭނެ ކަމެއް ނޫން ކަމަށް ގިނަ ބަޔަކު ދަނީ ބުނަމުންނެވެ.
ދުވާފަރުގެ ބައެއް ބެލެނިވެރިން ބުނާ ގޮތުގައި، ޕްރިންސިޕަލް އަނީސް އާއި ކެންޑިޑޭޓް އަހްމަދު ސާހުއާ ދެމެދު އެއްވެސް އާއިލީ ގުޅުމެއް ނެތެވެ. އެހެންކަމުން ސިޔާސީ ޕާޓީ އެއްގެ ކެންޑިޑޭޓަކު ތަމްސީލު ކުރުމަށް އޭނާ ދިޔުމުގެ ހަމައެކަނި ބޭނުމަކީ ސަރުކާރު ކެންޑިޑޭޓަށް ތާއީދު އޮތްކަން ދައްކައި، ސްކޫލުގެ ނަމުގައި އިންތިޚާބަށް ނުފޫޒު ފޯރުވުން ކަމަށް ބެލެވޭ ކަމަށް އެފަރާތްތަކުން ތުހުމަތުކުރެއެވެ.
އެއީ ދުވާފަރު ސްކޫލުގެ އިއްޒަތާއި ކަރާމާތް ނަގާލުން ކަމަށާ ދަރިން ތަރުބިއްޔަތު ކުރަން ތިބި މީހުން ސިޔާސީ ކުލަޖެހި، ވަކި ކެންޑިޑޭޓެއްގެ ފަހަތުން ދުވުމަކީ ލަދުވެތި ކަމެއް ކަމަށް ބުނެ ބައެއް ބެލެނިވެރިން ވަނީ ކަންބޮޑުވުން ފާޅުކޮށްފަ އެވެ.
ދުވާފަރު ޕްރައިމަރީ ސްކޫލަކީ ޕްރީ ސްކޫލުން ފެށިގެން ގްރޭޑް 6 އާ ހަމައަށް ކިޔަވައިދޭ، އެ ރަށުގެ ތައުލީމީ މައިނާރެވެ. މިފަދަ މުއައްސަސާއެއްގެ އެންމެ އިސްވެރިޔާ ސިޔާސީ ގޮތުން ނުފޫޒު ފޯރުވަން މަސައްކަތް ކުރުމަކީ، މުޅި ސްކޫލުގެ މުސްތަގުބަލަށާއި ދަރިވަރުންގެ ކުރިމަތީގައި ސްކޫލަށް އޮތް އިތުބާރު ގެއްލިގެންދާނެ ކަމެކެވެ.
މި މައްސަލައާ ގުޅިގެން ޕްރިންސިޕަލް މުހައްމަދު އަނީސް ގެ ބަހެއް ލިބޭގޮތް ވަނީ ނުވެފަ އެވެ.
